MARIKO 4

Oluchelo lwomumiitsi

(Mat. 13:1-9; Luka 8:4-8)

1 # Luka 5:1-3 Khandi Yesu nachaaka okhwechesia nali khuluchinga lweinyanza ya Galilaya. Ne omukanda kwabandu omukhongo nikumubotokhana. Naye niyenjila muliaro eliali munyanza, ne niyekhalamwo. Nakwo omukanda kwabandu okwo kwosi nikusinjila khuluchinga lweinyanza. 2Mana nabeechesia amakhuwa amanji mutsinjelo. Ne mumechesioke ako nababoolela ari, 3“Recheresie! Inyanga yindi, omundu yarula natsia okhumiitsa imwo. 4Ne olwa yamiitsa, imwo yindi yakwa khunjila, ne amanyonyi niketsa nikachibootsa. 5Imwo yindi niyikwa khulwanda, aha liloba lilali elinji ta, niyimela lwangu, shichila liloba shiliali elinji tawe. 6Ne lwomubasu kwakha omunji, kwasamba imbale eyo, ne khulwa okhuba yali niyibula emisi, yamala niyifululukha niyuma. 7Imwo yindi yakwa mumahwa, ne olwa kakhula lwangu nikachitiiya mana imbale eyo niyikhuunya okhukhula niyilaamakhwo ebiamo tawe. 8Nayo imwo yindi niyikwa mwiloba lilayi, niyimela niyikhula, niyaama ebiamo nibitsiililila okhumeetekha akhandi amakhumi kane, eyindi akhandi amakhumi kasasaba, nayo eyindi akhandi eshikhumi.” 9Mana Yesu naboola ari, “Ouli namarwi kokhuhulila, ahulile!”

Eshisina shietsinjelo

(Mat. 13:10-17; Luka 8:9-10)

10Olwa Yesu yali niyakhatong'a yenyene, abamuloondakhwo nende abarume abo ekhumi nababili nibamureeba mbu, abenoosiekhwo eshisina shietsinjelo etsio. 11Naye nabakalusia ari, “Inywe mwahebwa amabiso aka Obwami bwa Nyasaye, nebutswa abali elwanyi wobwami, balechesibwa buli shindu mutsinjelo, 12#Isa. 6:9,10Kho mbu,

‘Bahenje nibahenga, ne nibalalola eshindu ta.

Khandi mbu, Bahulile nibahulila, ne nibalamanyilisia eshisina ta.

Okhuba bakhetsukhana bekalukhasia mana nibaleshelwa obwonooni bwabwe.’ ”

Yesu yenoosia eshisina shioluchelo lwomumiitsi

(Mat. 13:18-23; Luka 8:11-15)

13Kho Yesu nabareeba ari, “Inywe shimumanyile oluchelo luno ta? Kho bulano namukhamanye murie tsinjelo tsindi tsiosi? 14Omumiitsi amiitsanga likhuwa lia Nyasaye. 15Ne abandu bandi bali shinga imwo eyamiitswa ne niyikwa khunjila. Olwa bahulila butswa likhuwa, ne Setani yetsa bwangu nende okhubukula likhuwa elo okhurula mubo. 16Ne imwo eyamiitswa niyikwa khwiloba liokhulwanda, nibo abandu abahulilanga likhuwa, ne bwangu bwene balinjisia mumioyo chiabwe nobusaangaali. 17Ne shibaralila mulio ta, habula besimilisia butswa hatiiti, ne olwa amatinyu nende obusandibwi bwitsa khulwa likhuwa lia Nyasaye, ne barula khubusuubili bwangu.

18“Abandi nabo bali shinga imwo eyamiitswa niyikwa mwiloba liamahwa. Abo nibo abalihulilanga likhuwa lia Nyasaye, 19habula okhuhendela amakhuwa komushialo, okhuchama obuyinda nende obwikombi bwebindu bindi, binjilanga mubo mana bitiiya likhuwa elo nibilikhola okhulekha okhwama ebiamo.

20“Nebutswa imwo eyamiitswa khwiloba lilayi, nibo abandu abahulilanga likhuwa lia Nyasaye, nibalifuchilila mana baama ebiamo, akhandi amakhumi kataru, abandi akhandi amakhumi kasasaba, ne abandi akhandi eshikhumi.”

Itaha yirenjekhungwa khushichibi shiayo

(Luka 8:16-18)

21 # Mat. 5:15; Luka 11:33 Mana Yesu nabareeba ari, “Itaha yihafibungwakhwo munzu mana yifuunishilwa mushimwelo noho mulwalo mweshitali? Itaha shiyihafibungwa mana yirenjekhwa khushichibi shiayo noho? 22#Mat. 10:26; Luka 12:2Kho shiosi shiosi eshiabiswa, shilabisulwa, ne shiosi shiosi eshiafuunishilwa shilafuunulilwa. 23Ne yesi yesi ouli namarwi akokhuhulila, ahulile!”

24 # Mat. 7:2; Luka 6:38 Mana nababoolela khandi ari, “Muloonde nimutiila obulayi akamuhulilanga. Eshichelo shiene shiamuhaanilangamwo nishio eshiamulahelwamwo. Ne khandi mulameetelwakhwo amanji. 25#Mat. 13:12; 25:29; Luka 19:26Shichila ouli ninabio alameetwa ebindi, naye oubula, kata shitiiti eshia ali ninashio, alanuulwa.”

Oluchelo lweimwo eyikhulanga

26Yesu naboola khandi ari, “Obwami bwa Nyasaye buli shinga omundu oumiitsa imwo mumukunda. 27Eshilo akonanga tsindoolo, ne eshiteere abuukha naba meeso, ne mubise ebio imwo yirombokha niyikhula. Nebutswa shiamanya shinga olwa yikhulanga tawe. 28Liloba eliene likholanga ebiraache okhumela nibiama ebiamo. Biranjililanga okhurusia emirombo, ne bilosiakhwo okhwakara mana bimalilisia nende okhulaba khweimele yene. 29#Yoe. 3:13Ne olwa biba nibilabile, omwene mukunda abukulanga injesoye, nachaaka okhuchesa.”

Oluchelo lwolufwa lwomutarakwe

(Mat. 13:31-32,34; Luka 13:18-19)

30Khandi Yesu nabareeba ari, “Khwakhachelasia obwami bwa Nyasaye nende shiina? Kata khwakhekhoonyela luchelo shiina okhubwinoosia? 31Obwami bwa Nyasaye buli shinga olufwa lwomutarakwe, olwa lumiitswa mwiloba, nolutuutu muno khubufwa bundi bwosi mushialo. 32Ne nilumiitsilwe lukhulanga nilwikhola omusaala omukhongo okhushila echindi chiosi. Amasaka kakwo kakhula nikaba amakhongo mbu kata amanyonyi kombakha ebitsu biako mumasaka kakwo.”

33Yesu yabayaalila amakhuwa amanji mutsinjelo tsindi tsinyinji shinga etsio, shinga olwa bakhanyalilwa okhulihulila. 34Shiyaboolakhwo ninabo nalekhoonyeele oluchelo ta, habula nali yenyene nende abeechibe, yabenoosilinjia buli shindu.

Yesu ahotselesia imbumbuyeka ikhongo

(Mat. 8:23-27; Luka 8:22-25)

35Khunyanga yene eyo nibwakhela, Yesu yaboolela abeechibe ari, “Chende khwambushe khutsie injelekha weinyanza.” 36Ne nibalekha omukanda, nibenjila muliaro lia Yesu yali niyekhalemwo, nibatsia halala ninaye. Ne amaaro kandi kali nikaliho. 37Mana imbumbuyeka ikhongo niyichaaka okhuhutsa. Ne amarunda kamaatsi nikekhupa muliaro, amaatsi nikachaaka okhwitsulamwo. 38Ne Yesu yali niyekhaale inyuma weliaro niyeyichiishe omuto, nakonanga tsindoolo. Abeechibe nibamubuusia nibamureeba bari, “Omwechesia, shiotebakhwo mbu khuli ahambi okhufwa ta?”

39Naye Yesu nabuukha nahalabila imbumbuyeka eyo, ne naboolela inyanza ari, “Holeela! Wihotselesie!” Habwene nahabwene, imbumbuyeka niyihotselesia, ne omulenjeelo omukhongo nikubaho. 40Kho Yesu nareeba abeechibe ari, “Eshichila nimuria nishiina? Mubula obusuubili noho?” 41Bahuka muno, nibareebana abeene khu beene bari, “Kho uno naye niwiina, mbu kata imbumbuyeka nende amarunda keinyanza bimuhulilanga?”

Currently Selected:

MARIKO 4: OLUPR

Highlight

Copy