MARIKO 11

Yesu yenjila Yerusalemu nomwikhoyo

(Mat. 21:1-11; Luka 19:28-40; Yoh. 12:12-19)

1Ne olwa Yesu nabeechibe bali nibali ahambi okhuula Yerusalemu, boola khumataala ka Betsefage nende Betsania, khushikulu shia Miseituni. Yesu naruma babili abokhubechibe, 2nababoolela ari, “Mutsie mwitaala elihengaane ninenywe. Ne olwa mwinjilamwo butswa, mulanyola eshimoosi shieisishili nishiboyilwe, eshiomundu alashianinakhokhwo tawe. Mushiboholole, mana mushireere hano. 3Ne omundu yesi yesi namureeba mbu mukholanga murio mbushiina, mumuboolele mbu, Omwami yenyile okhushiikhoonyela ne, alashikalusia hano bwangu.” 4Kho nibatsia nibanyoola eshimoosi shieisishili nishiboyilwe elwanyi mushilibwa, khunjila yomwitookho elo, ne nibashiboholola. 5Ne abali nibasinjiileho nibabareba bari, “Kho mukhakholanga shiina, mbohololanga eshimoosi shieisishili?”

6Ne nibababoolela shinga olwa Yesu yali nababooleele. Mana nibalekha abandu abo ne nibatsia. 7Nabo abeechi nibareerera Yesu eshimoosi shieisishili eshio, ne nibara ebifwalo biabwe khumukongo kwashio, naye Yesu niyekhalakhwo. 8Khandi abandu abanji baala tsingubo tsiabwe khunjila, ne abandi nibaala amasafu aka bali nibaremile okhurula mumikunda. 9#Tsits. 118:25,26Nabo abamwimilila, nende abamuloondakhwo boosi bachinga olukhu nibalanjilisia nomwoyo omukhongo bari, “Hosana#11:9 Hosana: Mulu Heburania mbu, khuhonie noho honia., noweikhabi owitsa muliira elia Omwami! 10Buli neikhabi Obwami bwa kuuka wefwe Daudi, obitsanga! Hosana ikulu mwikulu!”

11Mana Yesu niyenjila mu Yerusalemu, natsia muhekalu. Ne olwa yali nahenjile tsimbeka tsiosi khubindu bialimwo biosi, yarula elwanyi welitookho lia Yerusalemu, natsia Betsania halala nende abeechibe ekhumi nababili. Okhuba eshialo bwali nibwilile.

Yesu atsuba omukhuyu

(Mat. 21:18-19)

12Khunyanga yalondakhwo, olwa bali nibarulanga Betsania, Yesu yali nali inzala. 13Ne nalola omukhuyu ehale nikuli namasafu amanji. Yatsia okhulola nikakhaba mbu, eshiamo shiosi shiosi shilikhwo. Ne olwa yoola ewa kwali, shiyanyoolakhwo eshindu shiosi shiosi ta, habula amasafu konyene, shichila shitsiali tsinyanga tsiamakhuyu okhwama tawe. 14Yesu nakutsuba naboola ari, “Omundu yesi yesi shiyakhaliekhwo khandi ebiamo khwiwe okhurula olwaleelo tawe.” Mana abeechibe nibahulila amakhuwa ako.

Yesu alonda abakholi bobukhala okhurula muhekalu

(Mat. 21:12-17; Luka 19:45-48; Yoh. 2:13-22)

15Mana nibetsa Yerusalemu. Naye Yesu niyenjila muhekalu,#11:15 Ihekalu: Ikanisa ikhongo eya Abaheburania benamilangamwo Nyasaye. ne nibachaaka okhulonda abali nibakusinjia nende okhukula ebindu muhekalu boosi. Khandi nafuumamia tsimesa tsiabandu abafunjinjia amapesa, nende ebifumbi biabandu abali nibakusinjia amakuuku. 16Khandi shiyafuchilila omundu yesi yesi okhubira muhekalu nachinjile eshindu tawe. 17#Isa. 56:7; Yer. 7:11Mana niyechesia abandu, nende okhubareeba ari, “Shikahandikwa mumahandiko mbu, ‘Inzu yanje yakhalangwe mbu inzu yokhwinamilamwo Nyasaye, eya amahanga koosi,’ ta? Nebutswa inywe muchikholile okhuba imbinga yabanuuli!” 18Kho abesaaliisi abakhulundu nabahandichi bamalako, nibahulila, ne nibakhaaba shinga olwa banyala okhumwira. Bali nibamuria, shichila abomukanda boosi bahuchisibwa nende omeebaaloke. 19Khubwile, Yesu nende abeechibe barula mwitookho elo.

Eliechesio khumukhuyu okwaniala

(Mat. 21:20-22)

20Kho mumabwibwi olwa bali nibabirangaho, balola omukhuyu okwo nikunialile okhuula khumisi chiakwo. 21Mana Petero niyetsulila ne naboolela Yesu ari, “Omwami, lola! Omukhuyu kwawalaamile eshilaamo shiobubi kunialile!”

22Mana Yesu nakalusia nababoolela ari, “Mube nobusuubili mu Nyasaye. 23#Mat. 17:20; 1 Abakor. 13:2Emuboolela toto mbu, omundu yesi yesi oulaboolela eshikulu shino mbu, rula hano, okwe munyanza, nalakanakania mumwoyokwe ta, ne asuubile mbu aka aboola ketsa okhwikholekha, alakholelwa ario. 24Khulweshio emuboolela mbu, shiosi shiosi eshiamusaba, mumasaayo, suubile mbu mumalile okhushinyoola, ne shilaba eshienywe. 25#Mat. 6:14,15Ne buli olwa musinjila okhusaaya, muleshelane nimuba nimuli nelikhuwa khumundu yesi yesi. Naye Senywe ouli mwikulu yesi khandi alamuleshela obumayanu bwenywe.”

[ 26“Nebutswa nimuba nimulabaleshela abashienywe ta, Senywe ouli mwikulu shialamuleshela inywe obumayanu bwenywe tawe.”]

Lireebo khuko bunyali bwa Yesu

(Mat. 21:23-27; Luka 20:1-8)

27Mana Yesu nende abeechibe, khandi nibatsia Yerusalemu. Ne olwa Yesu yali nachendanga muhekalu, babesaaliisi abakhulundu nabahandichi bamalako, nende abakofu betsa ewa yali. 28Kho nibamureeba bari, “Nobunyali shiina obwokholelanga ebindu bino, noho owakhuhelesia obunyali buno okhukhola bino niwiina?”

29Naye Yesu nabakalusia ari, “Leshe ebareebekhwo lireebo, mungalusie, kho mbu emuboolele obunyali bwekholelanga ebindu bino mbu ni bwa wina. 30Ngalusie, Obubatiisi bwa Yohana bwarula mwikulu noho mubandu?” 31Kho nibayingana abeene khu beene bari, “Nikhuboola mbu, ‘Bwarula mwikulu.’ Alakhureeba mbu, ‘Kho ni shiina eshichila nimulasuubila Yohana ta?’ 32Ne nikhukhaboole mbu, ‘Bwarula mubandu noho’ (Ne bali nibariire abandu tsana, shichila abandu boosi bali nibafuchilila mbu Yohana nomulakusi wa toto). 33Kho nibakalusia Yesu bari, ‘Shikhumanyile tawe.’ Mana Yesu shiyabareeba obunyali bwakholelanga ebindu bino tawe.”

Currently Selected:

MARIKO 11: OLUPR

Highlight

Copy