MARIKO 12

Oluchelo lwabalimi bomukunda kwemitsabibu

(Mat. 21:33-46; Luka 20:9-19)

1 # Isa. 5:1,2 Mana Yesu nachaaka okhubeechesia mutsinjelo naboola ari, “Omundu undi yaraaka emitsabibu mumukunda, nasira olukaka okhubotokhana omukunda okwo. Khandi nayaba obwina bwokhutiinyilamwo emitsabibu, niyombakha omunaara kwabalindi, nahosia omukunda okwo khubalimi ne natsia mushialo shindi. 2Ne olwa tsinyanga tsiokhuchesa tsiola, yaruma omukholi undi khubalimi abo, mbu bamuhelesiekhwo khubiamo biemitsabibu. 3Ne abalimi abo nibamutiila, nibamukhupa, nibamulonda nakalukhayo eshikhaya nibalamuhelesiyekhwo eshindu shiosi tawe. 4Khandi nabarumila omukhabaniwe undi. Omwenoyo naye nibamwara tsinguma, nibamukholela akeshifimbwa murwe. 5Mwene mukunda naruma omukholiwe undi, oyo naye nibamwira. Khandi bakholela abakhalabani bandi abanji akafwana kario. Banywekha abandi ne nibera abandi. 6Yali nashili nende oundi mulala owokhuruma. Omwenoyo yali omwanawe omuheelwa muno. Mukhumalilikha yamuruma khubo, ne naboola mumwoyokwe ari, ‘Balahelesia Omwana wanje oluyali.’ 7Nebutswa abalimi abo baboolelana abeene khu beene bari, ‘Uno niye mwene bulaame bwomukunda kuno. Kho yitse, chende khumwiire, mana obulaamebwe bulaba obwefwe.’ 8Kho nibamutiila nende okhumwiira, nibamusukuna elwanyi womukunda kwemitsabibu okwo. 9Opaara mbu, omwene mukunda kwemitsabibu okwo alakhola shiina? Aletsa okhwira abalimi abo nende okhuhelesia abandi omukunda okwo.

10 # Tsits. 118:22,23 Shimwasomakhwo Amahandiko kano ta? Akaboolanga mbu,

‘Lichina liene liabombashi baloba,

liekhola olwanzilo lwomukoona.

11Buno, bwali obukholi obwa OMWAMI Nyasaye.

Ne kano nakokhuhuchisia khwifwe!’ ”

12Kho abesaaliisi abakhulundu nibateema okhumuhamba. Ne nibaria abomukanda, shichila bali nibanyile mbu ababooleleele oluchelo olwo okhubafukula. Kho nibamulekha nibatsia.

Lireebo khu akokhurunga obushuru

(Mat. 22:15-22; Luka 20:20-26)

13Abandi khu Abafarisayo nende khu aba Herode barumwa khu Yesu mbu bamureche namarebo. 14Kho betsa nibamuboolela bari, “Omwechesia, khumanyile mbu oli owobwatoto khandi shiotebanga omundu yesi yesi tawe. Shichila shiohenganga khubukhongo bwomundu yesi yesi ta, habula wechesinjia aka Nyasaye yenya mubwatoto. Lilako likhufuchilila ifwe okhurunga obushuru khumuruchi wa Roma noho tawe?” 15Khukhoyile okhurunga, noho tawe? Yesu yali namanyile obwikaati bwabwe, ne nabareeba ari, “Mundeemanga mbushiina? Mbelesiekhwo ling'ondo#12:15 Ling'ondo: Abaroma balaanganga amang'ondo kabwe mbu tsidinari. Ne elala balilanganga mbu Idinari. elala endolekhwo.” 16Mana nibamureerera, naye nabareeba ari, “Obukondo buno, nende akahandikwakhwo kano nebiawina?” Nibamukalusia bari, “Nebia omuruchi wa Roma.” 17Yesu nabakalusia ari, “Ebili ebia omuruchi wa Roma muhelesie omuruchi wa Roma; ne ebili ebia Nyasaye muhelesie Nyasaye.” Nabo nibahuchisibwa muno namakhuwake.

Yesu yechesia khukobulamushi

(Mat. 22:23-33; Luka 20:27-40)

18 # Ebikh. 23:8 Abasadukayo#12:18 Abasadukayo: Barula khu Zadoki abakhulundu abe idiini eya Abayahudi eshisina mbu, “Abalunjishi beene.” bandi ababoolanga mbu obulamushi toto bubulaho, betsa ewa Yesu yali nibamureeba bari, 19#Okhuk. 25:5“Omwechesia, Musa yakhuhandichila ari, ‘Omundu naba nali nomusiani wabwe, mana omusiani wabwe oyo afwe, ne aleshe omukhasi, nabula omwana, omusiani wabwe oyo okhuula akalusie omukhasi oyo, mana yebule ninaye abaana okhuchinguula eliira liomusiani wabwe omufu oyo.’ 20Baliho abasiani musafu abomunzu ndala, omukhulundu yareera omukhasi, ne nafwa nalalikhwo nomwana tawe. 21Omusiani wabwe wakhabili nakalusia omuklhasiwe naye yesi nafwa, nalalekhwo omwana tawe. Khandi omusiani wabwe wakhataru yesi ario. 22Mana boosi musafu nibalalekhakhwo omwana yesi yesi tawe. Olunyuma, omukhasi oyo yesi khandi nafwa. 23Kho khunyanga yobulamushi, omukhasi oyo yakhabe owa wina khubandu musafu abo, shichila yali omukhasi owa boosi musafu?” 24Yesu nabareeba ari, “Shikali nikano akachilanga nimukorwa, mbu obulamanya Amahandiko nende obulamanya obunyali bwa Nyasaye shinga olwa buli ta? 25Okhuba olwa abafu balamukha, shibateeshia noho kata okhuteeshibwa tawe. Baba butswa shinga abamalaika bomwikulu. 26#Okhur. 3:6Ne okhulondokhana khumakhuwa kabafu shinga olwa balamusibungwa, shimwasoomakhwo mushitabu shia Musa, khumakhuwa akeshitsakha, eshiali nishiakhanga omulilo, nebutswa shishiayitsanga ta? Kahandikwamwo mbu, Nyasaye yaboolela Musa ari, ‘Nisie Nyasaye wa Aburahamu, Nyasaye wa Isaka nende Nyasaye wa Yakobo.’ 27Kho shiali Nyasaye wabafu ta, habula owa abandu abaliho mwoyo. Shimuli habwene, kata nahatutu ta!”

Lilako likhulundu

(Mat. 22:34-40; Luka 10:25-28)

28Ne mulala khu abahandichi bamalako niyetsa aha bali. Mana nahulila nibayingananga nende Yesu. Ne olwa yalola mbu Yesu abakalusiye obulayi, yamureeba ari, “Ne lilako shiina eliambeli mu koosi?” 29#Okhuk. 6:4,5Yesu nakalusia naboola ari, “Eliambeli ndielino mbu, ‘Inywe Abaisiraeli, hulile, OMWAMI Nyasaye wefwe niye OMWAMI mulala yenyene. 30Ne okhuula omuheelenje OMWAMI Nyasayewo nende omwoyokwo kwosi, nende amapaaroko koosi nende amaaniko koosi.’ 31#Abal. 19:18Ne eliakhabili ndielino mbu, ‘Okhuula omuheelenje owashio shinga olwa wiheela omwene.’ Libulaho lilako lindi elishila kabili ako tawe.” 32#Okhuk. 4:35Omuhandichi wamalako oyo namuboolela ari, “Omwechesia, oli habwene. Toto mwene oboolile mbu, Nyasaye nimulala, ne shialiho oundi ta, habula ye yenyene. 33#Hos. 6:6Ne okhumuheela Nyasaye nomwoyo kwosi, nende amapaaro koosi, nende amaani koosi, nende okhuheela owashio shinga olwa wiheela omwene, nelikhoongo muno okhushila ebihaanwa biemilukha nende emisango emisambe chiosi.” 34#Luka 10:25-28Nolwa Yesu yalola, shinga lwomuhandichi wamalako oyo yakalusia nobuchesi, yamuboolela ari, “Shioli ehale nende Obwami bwa Nyasaye tawe.” Ne okhurula olwo, abulaho owatsaalikha okhumureeba lireebo liosi liosi tawe.

Lireebo khu aka Kristo

(Mat. 22:41-46; Luka 20:41-44)

35Ne olwa Yesu yali niyechesinjia muhekalu yareeba abandu ari, “Mbushiina abahandichi abamalako baboolanga mbu, Kristo nomwana wa Daudi? 36#Tsits. 110:1Daudi mwene niyemiliilwe nende Roho Omutakatifu, yarumbula ari,

‘OMWAMI Nyasaye yaboolela Omwami wanje ari,

yikhala khumukhono kwanje omusaatsa,

okhuula olwa ndakhare abasukubo hasi webilenjebio!’

37Daudi omwene amulanganga mbu, Omwami. Kho yakhaba arie Omwana wa Daudi khandi?”

Yesu achetsiyia Abahandichi bamalako

(Mat. 23:1-36; Luka 20:45-47)

Mana omukanda kwabandu omukhongo nibamurecheresia nobusaangaali. 38Ne mukhwechesiakhwe, Yesu nababoolela ari, “Mube meeso nende ahandichi bamalako, abachamanga okhuchendachenda nibefwalile tsikanzu tsirambi, nende okhushiesibwa nibali mubiiro. 39Bachama okhwikhala khubifumbi ebilayi, ebieimbeli mutsisinagogi,#12:39 tsisinagogi: Nemikhung'ano echia Abayahudi chiokhwinamila Nyasaye nende chiokhwechesibwa amakhuwa ka Nyasaye. nende okhulobola habundu aholuyali ahokhwikhala nibali mumasabo. 40Abasandinjia abakhasi abalekhwa, ne khulwa okhwikaatia, nibasaaya amasaayo amarambi. Abo nibo abakhahebwe eshinyasio eshilulu muno.”

Eshihaanwa shiomukhasi omulekhwa

(Luka 21:1-4)

41Kho Yesu niyekhala habundu hahengaane nende lisanduku liebihaanwa, nahenga nalola shinga olwa abandu baretsanga amapesa mwisanduku omwo. Abayinda abanji baramwo amapesa amanji. 42Mana omukhasi undi omulekhwa omumanani niyetsa, naramwo amang'ondo kabili, akahela isende ndala. 43Ne Yesu nalanga abeechibe, nababoolela ari, “Emuboolela toto mbu, omukhasi omulekhwa omumanani uno, areeremwo amapesa amanji okhushila boosi abarusiye nibara mwisanduku lino. 44Shichila abandi bareeremwo khubitong'anga khubuyinda bwabwe, ne naye mubumananibwe, areeremwo koosi akabeele ninako, niko konyene akayeleetilekhwo mubulamubwe bwosi.”

Currently Selected:

MARIKO 12: OLUPR

Highlight

Copy