MARIKO 13

Yesu aboola khukokhulikululwa okhwa Ihekalu

(Mat. 24:1-2; Luka 21:5-6)

1Ne olwa Yesu yali narulanga muhekalu, mulala khubeechibe yamuboolela ari, “Omwechesia, lolakhwo shinga olwa amachina kano kali akokhuhuchisia, khandi shinga olwa amombakho kano kali akokhuhuchisia!” 2Mana Yesu namukalusia ari, “Ololanga amombakho amakhongo kano? Lichina shililitong'akhwo khulindi kata elala tawe. Kakhakwisibwe hasi koosi pe.”

Amanyakhano nende obusandibwi

(Mat. 24:3-14; Luka 21:7-19)

3Ne olwa Yesu yali niyekhaale khushikulu shia Miseituni, ahahengana nende Ihekalu, Petero, Yakobo, Yohana nende Andereya nibamureeba mumasilisi bari, 4“Khuboolelekhwo, amakhuwa kano kakhekholeshe liina? Ne eshiakhamanyisie mbu koosi kali hambi okhwikholelekha nishiina?” 5Mana Yesu nachaaka okhubaboolela ari, “Mube meeso, omundu yetsukhana yamukaatia namukoyasia. 6Abandu abanji bakhetse muliira lianje, nibaboola bari, ‘Isie nisie Ye!’ Ne bakhakoyasie abandu abanji. 7Ne olwa mwakhahulile khukelihe nende abandu okhuboola khukelihe, shimulahendekhwo emioyo ta. Ako okhuula kekholeshe, nebutswa eshihesi shiakhabe nishishili okhuula. 8Okhuba lihanga liakhalwane nende lihanga lindi, khandi oburuchi, bwakhalwane nende oburuchi bundi. Okhurenga khweshialo okhukhongo khwakhabeho mubialo ebiahukhane, inzala nayo yakhabeho, ne ako koosi kakhabe shinga obuchaachilo bwomukhasi oulumwa inzibula.

9 # Mat. 10:17-20; Luka 12:11,12 “Nebutswa, inywe abeene mube meeso, shichila bakhamutiile nibamuyila mushiina okhuyaasibwa, khandi mwakhakhupwe mutsisinagogi, ne mwakhasinjile imbeli wabami nende abaruchi khulweliira lianje, okhukhola obuloli khwisie nende okhubayaalila Injiili. 10Ne okhuula Injiili yakharanjilile okhuyaalilwa amahanga koosi. 11Ne olwa bamutiila nibamuyila mushiina okhuyaasibwa, shimularanjililekhwo okhuhenda nende okhukanakania mumioyo aka namuboole ta. Habula muboole aka muba nimuhelwe khushise shieneshio. Okhuba shimuli inywe ababoola ta, habula ni Roho Omutakatifu. 12Khandi abandu bakhakhobe abasiani babwe beene okhwiirwa, abasamwana abaana bosi bakhakhole bario, ne abaana nabo bakhabuushile khu bebusi babwe, nibachila niberwa. 13#Mat. 10:22Khandi mwakhasilwe nende abandu boosi khulwa isie. Nebutswa owifwila okhuula khushihesi, yakhahonibwe.

Amatinyu amakhongo kokhuhuchisia

(Mat. 24:15-28; Luka 21:20-24)

14 # Dan. 9:27; 11:31; 12:11; 1 Mak. 1:54; 6:7 “Nebutswa olwa mulola amatinyu amakhongo kokhuhuchisia nikarecheekhwe aha kalakhoyile okhuba ta (Ousoma akhoyile okhumanyilisia eshisina), muleshe abandu abali mu Yuda belushile nibatsia mubikulu. 15#Luka 17:31Omundu ouba khushilama shieinzuye aleshe okhwikha kata okhwinjila munzuwe nende okhuyiniamwo eshindu shiosi shiosi tawe. 16Khandi omundu ouli mumukunda shialakalukhakhwo ingowe okhubukula ikanzuye tawe. 17Bali mushilaamo shiobubi, abakhasi abakhabe nibahela tsinda nende abakhabe nibanuninjia abaana abatoro mutsinyanga etsio! 18Musaaye mbu, kaleshe okhwikholekha kario mutsinyanga tsiomunyiri. 19#Dan. 12:1; Obufw. 7:14Shichila mutsinyanga etsio, amatinyu kakhabeho amakhongo, akashili okhubakhwoho okhurula khukhuchaaka khweshialo okhuula bulano tawe. Khandi shikakhabekhwoho shinga ako tawe. 20Ne OMWAMI Nyasaye alabula okhuba mbu, yembichitia tsinyanga etsio ta, abulaho omundu yesi yesi, owakhahonibwe ta, nebutswa yembichitia tsinyanga etsio khulwa abalobolebe, aba omwene yaahula.

21“Kho bulano omundu naba niyakhamuboolela inywe ari, ‘Lole, Kristo ali hano,’ kata mbu, ‘Lole, ngwoyo ali halia,’ mulasuubile tawe. 22Okhuba Kristo bobubeeyi nende abalakusi bobubeeyi, bakhetse nibalolesia ebilolelo, akamakana nende akokhuhuchisia, mbu nikaba nikanyalikha bakoyasie abalobole ba Nyasaye. 23Nebutswa, inywe mube meeso! Isie emubooleele khale amakhuwa koosi nikalashiekholekha ta.

Okhwitsa okhwa Omwana womundu

(Mat. 24:29-31; Luka 21:25-28)

24 # Isa. 13:10; Yoe. 2:10,31; 3:15; Obufw. 6:12; Isa. 13:10; Ezek. 32:7 “Ne mutsinyanga tsienetsio, olunyuma lwamatinyu ako, eshialo shiakhelime ti, kata omwesi shikwakhashekhwo tawe. 25#Isa. 34:4; Obufw. 6:13; Yoe. 2:10Tsing'ining'ini natsio tsiakhakwe nitsirula mwikulu, ne obunyali bwomwikulu bwakhatechesibwe. 26#Dan. 7:13; Obufw. 1:7Nolwa bakhalole Omwana womundu niyetsela mumaleesi nende obunyali obukhongo nende oluyali. 27Mana yakharume abamalaikabe okhukhung'asia abalobolebe, okhurula mutsimbeka tsiosi tsieshialo okhuchaachila khundulo khwashio okhuula khwikulu khwashio.

Eliechesio khumusaala kwomukhuyu

(Mat. 24:32-35; Luka 21:29-33)

28“Kho bulano, mweche elieko khumusaala kwomukhuyu, ndielino mbu, olwa lisaka liakwo libetsanga nilihalulushe ne amasafu kalio nikakhachaaka okhusebukha, nimumanya mbu, eshimiyu shili hambi okhuula. 29Kho mwesi olwa mwakhalole amakhuwa ako nikekholekha, mumanye mbu, Omwana womundu ali ahambi okhwitsa, kata ali hamuliango bwene. 30Emuboolela toto mbu, olwibulo luno shilwakharuleho tawe, okhuula olwa ako koosi kakhabe nikamalile okhuusibwa. 31Likulu nende eshialo bikharusibweho, nebutswa amakhuwa kanje shikakharusibweho tawe.

Abulaho oumanyile inyanga kata isaa ta

(Mat. 24:36-44)

32 # Mat. 24:36 “Abulaho oumanyilekhwo khu akeinyanga yene kata isaa yene tawe, kata abamalaika bomwikulu, kata Omwana, shibamanyile ta, habula Papa yenyene niye oumanyile. 33Mwirecheshe, nimuba meeso, nende okhusaaya,#13:33 okhusaaya: Liameetwakhwo mumahandiko amakhulu. shichila shimumanyile olwa indukho yakhoole tawe. 34#Luka 12:36-38Kali shinga oolwa omundu ouli khuluchendo mushialo shindi, alekha litaalalie nahelesia abasumbabe obunyali, nabakabila buli mulala omulimokwe, nende okhulaka omulindi weshilibwa mbu yekhalenje meeso nalinda. 35Khulweshio, mwesi mube meeso, okhuba shimumanyile eshise eshia Omwami omwenengo yetsa ta, anyala okhwitsa khungoloobe, noho mushilo hakari, noho tsingokho nitsikholiokha noho kata mumabwibwi. 36Yakhetsukhana yetsa matetekhana namunyoola nimukonanga tsindoolo. 37Ne elia emuboolela inywe, emboolela abandu boosi mbu, mube meeso!”

Currently Selected:

MARIKO 13: OLUPR

Highlight

Copy