YOHANA 21
21
Yesu aloleshela abeechibe musafu
1Olunyuma lwako, Yesu khandi yaloleshela abeechibe khunyanza ya Tiberia. Kekholekha karinanwa; 2Simoni Petero, Tomasi owalangwa mbu, Likhwana, Natsanieli owarulanga Kana mu Galilaya, abasiani ba Zebedayo, nende abeechi ba Yesu bandi babili, boosi bali nibali halala. 3#Luka 5:5Simoni Petero naboolela abashie ari, “Isie enzia okhunaaba tsinyeeni.”
Nabo nibamuboolela bari, “Fwesi khulatsia ninawe.” Kho nibarula nibatsia nibenjila muliaro. Nebutswa eshilo eshio shiosi, shibatiilakhwo inyeeni kata ndala tawe. 4Ne olwa eliuba liali nilifwindanga, Yesu yasinjila khuluchinga lweinyanza, nabo abeechi nibalamanya mbu ni Yesu tawe. 5Kho nabareeba ari, “Baana banje, shimutiililekhwo inyeeni kata ndala ta?”
Nabo nibakaana bari, “Tawe.”
6 #
Luka 5:6
Nababoolela ari, “Fuube olukhanda lwenywe elubeka lwomukhono musaatsa kweliaro, ne mulatiila tsinyeeni.” Kho nibafuuba olukhanda lwabwe mumaatsi, ne nibalanyalilwa okhulukhwesa okhurulamwo ta, shichila bali nibatiilile tsinyeeni tsinyinji muno.
7Omwechi owa Yesu yali niyaheela naboolela Petero ari, “Ni Omwami!” Ne olwa Simoni Petero yahulila mbu, oyo yali Omwami, yeboha ikanzuye okhuba yali eshiechenye, ne niyekhupa mumaatsi. 8Abeechi bandi abo nabo nibetsela muliaro niboola khulukuku nibakhwesanga olukhanda lwabwe nilwitsuulemwo tsinyeeni. Shibaali ehale okhurula khulukuku ta, habula bali ahambi tsimita eshikhumi shilala okhurula khulukuku. 9Ne olwa boola khulukuku olwo, banyoola omulilo kwamanda nikuliho, tsinyeeni nende emikaate nibisambungwa khumulilo okwo. 10Mana Yesu nababoolela ari, “Reerekhwo hano tsinyeeni tsia mwakhatiila.”
11Mana Simoni Petero nakalukha muliaro, ne nakhweesa olukhanda nilwitsuulemwo tsinyeeni tsikhongo. Tsiosi halala tsiali eshikhumi shilala nende amakhumi karano natsitaru. Ne kata olwa tsiali tsinyinji tsirio, olukhanda shilwarandukhakhwo tawe. 12Yesu nababoolela ari, “Yitse mulie eshiokhulia.” Ne shiyalikhwoho kata mulala khubeechibe owamureeba ari, “Niwe wina?” Tawe. Shichila bamanya mbu, yali Omwami. 13Mana Yesu natsia nabukula omukaate nabahelesia, khandi nabukula tsinyeeni nabahelesia.
14Olwo lwali olwakhataru, Yesu naloleshelanga abeechibe okhurula olwa yali namulamusiibwe okhurula mukhufwa.
Yesu aboola nende Petero
15Olwa bali nibamalile okhulia, Yesu yareeba Simoni Petero ari, “Simoni omwana wa Yohana, waaheela isie okhushila shinga olwa abandi bano baaheela noho?”
Naye nafuchilila ari, “Omwami, iwe omanyile mbu, ndakhuheela.”
Yesu namuboolela ari, “Waaye ebimeeme bianje.” 16Yesu namureeba khandi olwakhabili ari, “Simoni omwana wa Yohana, waaheela isie noho?”
Naye Petero namukalusia ari, “Omwami, iwe omanyile mbu, ndakhuheela.”
Yesu namuboolela ari, “Olinde amakondi kanje.” 17Yesu namureeba olwakhataru ari, “Simoni omwana wa Yohana, waaheela?”
Petero nabeelela, shichila Yesu yamureeba olwakhataru ari, “waaheela?” Kho namuboolela ari, “Omwami, iwe omanyile amakhuwa koosi, omanyile mbu, ndakhuheela.”
Yesu namuboolela ari, “Waaye amakondi kanje. 18Ekhuboolela toto mbu, olwa wali noshili omubuukha webohanga niwirechekha mana otsia hosi hosi aha wenya okhutsia. Nebutswa olwa witsa okhuba nokofuule, olanyiila amakhonoko, ne oundi alakhuboha nakhuyila aha olenyile okhutsia tawe.” 19Yesu yaboola ako, khulwa okhumanyia shinga olwa Petero alifwa nareera oluyali khu Nyasaye. Mana Yesu namuboolela ari, “Noondakhwo!”
Yesu aboola khu akomwechi owa yaheela
20 #
Yoh. 13:25
Petero yashiukhana, ne nalola inyumawe omwechi undi oyo, owa Yesu yali niyaheela, owasita ahambi khu Yesu olwa bali nibalitsanga ebiokhulia, namureeba ari, “Omwami, niwiina ounaukhukhobe?” 21Ne olwa Petero yalola omwechi oyo, yareeba Yesu ari, “Omwami, eshiliikholekha khu uno naye nishiina?”
22Yesu namukalusia ari, “Nimba nindenya mbu, amenye okhuula olwa ndilichelela, kakhuhendilia shiina? Iwe nondakhwo?”
23Mana amakhuwa nikatswana mubeechi ba Yesu mbu, omwechi oyo shialifwa tawe. Nebutswa Yesu shiyali naboolile mbu, shialifwa ta, habula mbu, “Nimba nindenya mbu, amenye okhuula olwa ndilichelela, kakhuhendilia shiina?”
24Omwechi tsana oyo niye oukholanga obuloli khumakhuwa ako, khandi niye owakahandika, khandi khumanyile mbu, obulolibwe nobwatoto.
Akokhuhelelesia
25Kaliho amakhuwa kandi amanji aka Yesu yakhola, nikakhandiikwe koosi, eshialo shiosi shishiakhahelilemwo ebitabu ebiakhahandiikwe tawe.
Currently Selected:
YOHANA 21: OLUPR
Highlight
Share
Copy
Want to have your highlights saved across all your devices? Sign up or sign in
