EBIKHOLE BIA ABARUME Okhumanyisia akalimwo
Okhumanyisia akalimwo
Eshitabu shia Ebikhole bia Abarume shitsiilililanga nende amakhuwa akali mu Injiili eya Luka yahandika. Lichoomo likhulundu lieshitabu shino, nokhwinoosia shinga olwa abalondi ba Yesu bambeli, nibemiliilwe nende Roho Omutakatifu, batswania Amakhuwa Amalayi ka Yesu “mu Yerusalemu, mu Yudea, mu Samaria nende mushialo shiosi” (1:8). Shinoosinjia shinga lwobusuubili bwa Abakristo bwachaachila mu Yudea, ne nibutsiililila okhuula nibutswana mushialo shiosi. Omuhandichi yenya khandi okhusuubisia abasoomibe mbu, Abakristo shibaali omukanda kwobukhayi, okwenya okhukalukhasia oburuchi bwa Abaroma ta, habula mbu, obusuubili bwabwe bwali obwokhuhesia akeidiini ya Abayahudi.
Eshitabu eshia Ebikhole bia Abarume shinyala okhukabulwamwo ebitonye ebikhongo bitaru, ebimanyisinjia obukhongo bwetsingongo tsia Amakhuwa Amalayi ka Yesu kayaalwamwo, nende okhusimikhwa khwelikanisa. Ebitonye tsana mbiebino.
1. Okhuchaaka khwomukanda kwabakristo mu Yerusalemu, olunyuma lwokhukulukha khwa Yesu.
2. Okhulaanda khwomukanda okwo mutsimbali tsindi tsieshialo shia Palesitina.
3. Okhumeeta okhulaanda khwomukanda okwo okhuula mutsingongo tsirondokhaane nende inyanza ya Mediterenia okhuula Roma.
Lichoomo likhulundu mushitabu eshia Ebikhole, nokhumanyia emilimo chia Roho Omutakatifu, owetsa nobunyali khubasuubili abali mu Yerusalemu khunyanga ya Pendekote. Khandi atsiilililanga okhwimilila nende okhutinyisia likanisa nende abemilisi balio mumakhuwa koosi akahandikwa mushitabu shino. Oburume bwambeli bwa Abakristo bayaala, bwinoosibungwa mubwimbichiti okhubirira mukhuyaala. Khandi nende okhubirira mubikhole ebiahandikwa mushitabu shino, ebilolesinjia obunyali bwoburume obwo mubulamu bwabasuubili nende mubusanjilani bwelikanisa elo.
Akalimwo mubwimbichiti
Okhwirechekha okhuba abaloli ba Kristo 1:1-26
a. Lilako liokhumalilikha lia Yesu nende obusuubisiebwe 1:1-14
b. Owakalukha mushilenje shia Yuda Isikarioti 1:15-26
Okhokhola obuloli khu Kristo mu Yerusalemu 2:1–8:3
Okhukhola obuloli khu Kristo mu Yudea nende mu Samaria 8:4–12:25
Obukhalabani bwa Paulo 13:1–28:31
a. Oluchendo lwambeli lwa Paulo lwokhuyaala Injiili 13:1–14:28
b. Omukhung'ano okwa Abarume nende abemilisi mu Yerusalemu 15:1-35
c. Oluchendo lwakhabili lwa Paulo olwokhuyaala Injiili 15:36–18:22
d. Oluchendo lwakhataru lwa Paulo lwokhuyaala Injiili 18:23–21:16
e. Okhubohwa khwa Paulo mu Yerusalemu, Kaisaria nende Roma 21:17–28:31
Currently Selected:
EBIKHOLE BIA ABARUME Okhumanyisia akalimwo: OLUPR
Highlight
Share
Copy
Want to have your highlights saved across all your devices? Sign up or sign in