YOHANA 20
20
Yesu alamukha okhurula mukhufwa
(Mat. 28:1-8; Mrk. 16:1-8; Luka 24:1-12)
1Ne mumabwibwi, khunyanga yambeli yelichuma, eshialo nishishiiliime, Mariamu Magadalene yatsia khung'ani, nalola lichina nilirusibwekhwo. 2Mana natsia tsimbilo, niyoola khu Simoni Petero nende omwechi undi, owa Yesu yali niyaheela. Nababoolela ari, “Barusiye Omwami mung'ani, ne shikhumanyile aha bamureere tawe!”
3Kho Petero nende omwechi oyo, nibatsia khung'ani eyo. 4Mana boosi babili nibatsia tsimbilo, nebutswa omwechi undi oyo yelukha okhushila Petero, mana naranjilila okhuula khung'ani. 5Yenama nahengamwo ne nalola tsingubo tsieisanda yeikitani tsionyene, nebutswa shiyayenjilamwo tawe. 6Simoni Petero yesi niyetsa, ne niyenjila mung'ani. Nalola tsingubo tsieisanda yeikitani nitsilimwo tsionyene. 7Khandi nalola eshitambaya eshiali nishiboyilwe khumurwe kwa Yesu. Nebutswa shishiali halala nende tsingubo tsieisanda yeikitani eyo tawe, nebutswa shiali nishikanyiilwe habundu shionyene. 8Mana omwechi undi oyo, owali naranjiliile okhuula khung'ani, yesi niyenjilamwo nalola ne nasuubila. 9Bali nibashili okhumanyilisia Amahandiko akaboolanga mbu, okhuula alamushe okhurula mukhufwa.
10Mana abeechi abo nibakalukha ingo wabwe.
Yesu aloleshela Mariamu Magadalene
(Mat. 28:9-10; Mrk. 16:9-11)
11Mariamu yasinjila hang'ani nalilanga. Ne olwa yali nashililanga ario, yenama nahenga mung'ani. 12Nalolamwo abamalaika babili nibefwalile ebifwalo ebilafu tswe, abali nibekhaale ahomubili kwa Yesu kwali nikubelenje, mulala namurwe noundi nabilenje.
13Nibamureeba bari, “Mukhasiiwe, olilanga mbushiina?”
Naye nabakalusia ari, “Babukuule Omwami wanje, ne shiemanyile aha bamureere tawe!”
14Mana nashiukhana nalola Yesu nasinjiileho, nebutswa nalamanya mbu ni Yesu tawe. 15Yesu namureeba ari, “Mukhasiiwe, olilanga mbushiina? Ne okhaabanga wina?”
Naye Mariamu napaara mbu, nomukholi womumukunda okwo, mana namuboolela ari, “Omwami, noba nomubukuule, chama umboolela aha omureere, nasi ndalatsia emubukule.”
16Yesu yamulanga ari, “Mariamu!”
Naye Mariamu nashiukhana nahenga ewa Yesu yali, ne naboola muluheburania ari, “Raboni!” Eshisina mbu, “Omwechesia.”
17Mana Yesu namuboolela ari, “Shiolandiilakhwo ta, shichila eshili okhukulukha okhutsia ewa Papa ta. Nebutswa tsia oboolele abaana befwe mbu, engalukhanga khu Papa wanje khandi Papa wenywe, Nyasaye wanje khandi Nyasaye wenywe.”
18Kho Mariamu Magadalene natsia naboolela abeechi abo mbu, aluutsi Omwami. Ne nababoolela koosi aka Yesu yali namubooleele.
Yesu aloleshela abeechibe
(Mat. 28:16-20; Mrk. 16:14-18; Luka 24:36-49)
19Mana khunyanga eyo nibwakheela, abeechi bali nibakhung'anile halala munzu. Ne emiliango chiali nichikaalwe obutinyu, shichila bali nibariire abemilisi ba Abayahudi. Mana Yesu niyetsa nasinjila hakari mubo. Nababoolela ari, “Omulembe kube ninenywe.” 20Olunyuma lwokhuboola ako, yabamanyia amakhonoke nende mumbafumwe. Olwa abeechi abo balola Omwami, bekhoya muno. 21Yesu nababoolela khandi ari, “Omulembe kube ninenywe. Shinga olwa Papa yaaruma isie, nolwa siesi emuruma inywe.” 22Mana nabahelela omuya, ne nababoolela ari, “Munyoole Roho Omutakatifu. 23#Mat. 16:19; 18:18Nimuba nimuleshela abandu obwonooni bwabwe, balaleshelwa, ne nimuba nimulabaleshela ta, shibalaleshelwa tawe.”
Yesu aloleshela Tomasi
24Tomasi, owalangwa mbu Likhwana, owali mulala khubeechi ekhumi nababili, shiyali halala nende abeechi abo olwa Yesu yabaloleshela tawe. 25Kho abeechi bandi nibamuboolela bari, “Khuluutsi Omwami!”
Tomasi nababoolela ari, “Isie neshili okhulolakhwo tsimbala tsiemisumari mumakhonoke, endiilemwo olwala lwanje, khandi omukhono kwanje kutiile mumbafumwe, shienyala okhusuubila tawe.”
26Olunyuma lwetsinyanga munane, abeechi bali nibali halala khandi munzu, naye Tomasi yali ninabo. Emiliango chiali nichikaalwe, nebutswa Yesu yetsa nasinjila hakari mubo, ne naboola ari, “Omulembe kube ninenywe.” 27Mana naboolela Tomasi ari, “Ra olwalalwo hano, mana ohenje khumakhono kanje, khandi onyiile omukhonokwo otiile mumbafu mwanje. Lekha okhukanakania, suubila!”
28Tomasi namukalusia naboola ari, “Omwami wanje, khandi Nyasaye wanje!”
29Yesu namureeba ari, “Iwe osuubiile shichila unduutsi? Nabeikhabi abasuubila nibalanduutsi isie ta!”
Lichoomo Lieshitabu shino
30Yesu yakhola ebilolelo bindi ebinji abeechibe nibalolanga ebilahandikwa mushitabu shino tawe. 31Nebutswa kano kahandikwa kho mbu, musuubila mbu, Yesu niye Kristo, Omwana wa Nyasaye. Ne okhubirira mubusuubili bwenywe obwo, munyoole obulamu khulwa obunyalibwe.
Currently Selected:
YOHANA 20: OLUPR
Highlight
Share
Copy
Want to have your highlights saved across all your devices? Sign up or sign in
