YOHANA 16
16
1“Emubooleele ako kho mbu, muleshe okhwisichirala mubusuubili bwenywe. 2Bakhamulonde okhurula mutsisinagogi, khandi ebise bitsanga ebia omundu yesi yesi oumwira inywe, alapaara mbu akhalabanilanga Nyasaye. 3Abandu balamukholela inywe ako koosi shichila shibamanyile Papa, kata isie tawe. 4Nebutswa emubooleele ako, kho mbu olwa ebise biabwe biula ebia okhumukholela inywe ako, mwakhetsulile akandamuboolela.
Emilimo chia Roho Omutakatifu
“Shindamuboolela amakhuwa ako okhurula mukhuchaaka ta, shichila ndali ninenywe. 5Ne bulano enzia khu oyo owaruma. Ne shialikhwoho kata mulala khwinywe oureebanga isie aha enzitsanga tawe. 6Ne okhuba mbu, emubooleele amakhuwa ako, emioyo chienywe chibeeleele. 7Nebutswa isie emuboolelanga akatoto mbu, nobulayi muno isie okhutsia, okhuba nindalatsia ta, Omuhabini oyo shialetsa khwinywe tawe. Nebutswa ninzia, ndalamuruma khwinywe. 8Ne olwa aba niyetsile, alamanyia abandu abomushialo mbu, nabamayanu khulwa obwonooni bwabwe, nende khukobulunjishi, halala nende khukobukhalachi bwa Nyasaye. 9Nabamayanu khulwa akobwonooni, shichila shibasuubilanga isie tawe. 10Nabamayanu khukobulunjishi, shichila enzia ewa papa, ne shimulandolakhwo khandi tawe. 11Nabamayanu khukobuchalachi, shichila omuruchi weshialo shino amalile okhuyaasibwa nakhalachilwa eshiina.
12“Isie endi namakhuwa amanji akokhumuboolela, nebutswa bulano shimunyala okhukefwila tawe. 13#Obuch. 9:11Ne olwa Roho oufwimbulanga obwatoto bwa Nyasaye alitsa, yakhamwimilile mubwatoto bwosi. Shiyakhaboole khulwa obunyalibwe omwene ta, habula yakhaboole aka yahulila khandi yakhamuboolele khuketsanga. 14Yakhambelesie isie oluyali, shichila yakhabukule akemuboolela, ne namuboolela inywe. 15Koosi aka Papa ali ninako nakanje, niko akachila nimboola mbu, Roho alabukula akemuhelesia naye namuboolela inywe.
Eshibeela nende Obusangaafu
16“Mushise shituutu shinamundolekhwo isie khandi ta, ne olunyuma lweshise shituutu, mulandola khandi.”
17Balala khubeechibe nibareebana abeene khubeene bari, “Eshisina shiamakhuwa ako nishiina? Akhuboolelanga mbu mushise shituutu shinakhumulole ta, khandi mbu, olunyuma lweshise shindi shituutu nakhumulole. Khandi aboolanga ari, ‘Kali kario shichila enzitsanga ewa Papa.’ 18Eshisina shiamakhuwa mbu, ‘Mushise shituutu,’ nishiina? Shikhumanyile eshisina shiamakhuwa ako tawe!”
19Yesu yamanya mbu benyanga okhumureeba, kho nababoolela ari, “Isie emubooleele endi, ‘Mushise shituutu shinamundole tawe, khandi mbu, mushise shindi shituutu namundole.’ Ako niko akamureebananga abeene khubeene? 20Emuboolela toto mbu, namulile amasika khandi namwikhuule, nebutswa abomushialo balekhoya. Mulabeelela, nebutswa eshibeela shienywe shilakalukhana nishikwa omwikhoyo. 21Olwa omukhasi alumungwa inzibula, abeelelanga shichila eshiseshie shiokhulumwa shibetsanga nishiulile. Nebutswa lwomwana yebulwa, ne yebilila okhulumwakhwe okhwo, okhuba abetsanga niyekhoya mbu, omwana yebuulwe mushialo. 22Nolwa kali kario ninenywe. Bulano mubeeleele, nebutswa ndakhamulole khandi, mana emioyo chienywe chiakhekhoye, ne shialiho owakhamuyiniekhwo omwikhoyo kwenywe okwo tawe.
23“Olwa inyanga eyo yakhoole, shimwakhaareebekhwo likhuwa liosi liosi tawe. Emuboolela toto mbu, Papa alamuhelesia shiosi shiosi eshia mulamusaba muliira lianje. 24Okhuula bulano mushili okhusabakhwo eshindu shiosi shiosi muliira lianje ta. Sabe ne mulanyoola, kho mbu obusangaafu bwenywe bwitsule.
Okhuhula eshialo
25“Isie emubooleele amakhuwa ako koosi mutsinjelo. Nebutswa ebise bitsanga, ne shindakhamuboolele mutsinjelo khandi ta, habula ndakhamuboolele habulafu khu aka Papa. 26Olwa inyanga eyo yakhoole, mwakhasabe muliira lianje. Ne shiemuboolela inywe mbu, ndalamusabila khu Papa tawe. 27Okhuba Papa mwene yamuheela inywe. Yamuheela inywe shichila inywe mwaheela isie, khandi mwasuubila mbu ndarula khu Nyasaye. 28Isie ndarula khu Papa, ne ninditsa mushialo, bulano isie erulanga mushialo ne enzitsanga khu Papa.”
29Mana abeechibe nibamuboolela bari, “Bulano oboolanga amakhuwa habulafu, shioboolanga mutsinjelo tawe. 30Khumanyile bulano mbu, iwe wamanya amakhuwa koosi, shiokhoyile okhureebwa amareebo tawe. Ako niko akachilanga nikhusuubila mbu, iwe warula khu Nyasaye.”
31Yesu nabakalusia ari, “Bulano musuubile? 32Ebise bitsanga, ne bimalile okhuula, olwa mulasalaasibwa mwesi, buli mundu natsia mwitaalalie, nasi ndalatong'a sienyene. Ne shiendi sienyene ta, shichila Papa ali halala ninasi. 33Isie emubooleele ako, kho mbu nimuli halala ninasi, mube nomulembe. Abomushialo balamusandia, nebutswa mube abeitswoni! Isie emalile okhuhula eshialo.”
Currently Selected:
YOHANA 16: OLUPR
Highlight
Share
Copy
Want to have your highlights saved across all your devices? Sign up or sign in
