OBUCHACHILO 23
23
Sara afwa naye Aburahamu akula omukunda kwokhumuyabilamwo
1Sara yamenya emiyika eshikhumi shilala nende amakhumi kabili namusaafu. Echio nichio echiali emiyika chia Sara yamenya khushialo. 2Sara yafwila habundu halangwa mbu, Kiriatsi-ariba (niho Heburoni), mushialo shia Kanani, mana Aburahamu niyekhuula nende okhulila amasika.
3Mana Aburahamu narula habundu aha omubili kwomukhayewe kwali, natsia naboolela Abahiti ari, 4#Abaheb. 11:9,13; Ebikh. 7:16“Isie endi omurende oumenyile mwinywe. Mungusiekhwo omukunda kwokhuyabilamwo omubili kwomukhaye wanje, endeshe okhukulola.”
5Nabo Abahiti nibakalusia Aburahamu nibaboola bari, 6“Omwami, recheresia, iwe oli omundu omukhongo khandi owobunyali mwifwe. Yabira omukhayewo mu ndala khu tsing'ani tsindayi etsia khuli ninatsio. Abulaho khwifwe oulakhwima ing'aniye noho kata okhukhwikalila okhuyabila omubili kwomukhayewo tawe.”
7Aburahamu nasinjila ne niyenamila Abahiti khulwokhubahelesia oluyali, abali bene shialo eshio. 8Khandi nababoolela ari, “Nimuba nimuchamile mbu, eyabile omubili kwomukhaye wanje hano yarulekhwo, chame mureebelekhwo Efuroni omusiani wa Zohari 9mbu, nachama yambelesie imbingaye eyili Makipela, eyili khundulo khwomukundakwe. Mumureebe naba nachama yambesie omukunda okwo khubukusi bwahabwene imbeli wenywe mwesi, kho mbu, kube okwanje kwokhuyabilangamwo abafu.” 10Efuroni mwene yali niyekhaale halala nende Abahiti bashie mumukhung'ano, hambi khushiliibwa shiokhwinjila mwitookho. Naye nakalusia Aburahamu, Abahiti boosi abaliho nibahulila naboola ari, 11“Omwami wanje, rechelesia. Ndalakhuhelesia omukunda okwo nende ing'ani eyilimwo eyo, imbeli wabandu banje beene kho mbu, oyabilemwo omubili kwomukhayewo.”
12Mana Aburahamu niyenamila Abahiti beene shialo abo, khulwa okhubahelesia oluyali. 13Khandi naboolela Efuroni, Abahiti nibahulilanga ari, “Ekhusaaya mbu, nochama, orechelesiekhwo. Ndalakula omukunda okwo kwosi, fuchililila ekhurunje, mana eyabilemwo omubili kwomukhaye wanje.” 14Naye Efuroni nakalusia Aburahamu ari, 15“Omwami wanje, recheresia. Omukunda okuhela ebitonye bieifetsa ebikhumi bine bionyene nishiina hakari wanje ninawe? Yabila omubili kwomukhayewo.” 16Aburahamu nafuchilisania nende Efuroni, ne namuhelesia ebitonye bieifetsa ebikhumi bine imbeli wa Abahiti boosi, okhulondokhana nende obukusi bwabakholi bobukhala bomutsinyanga etsio.
17Nolwa omukunda kwali kwa Efuroni, okwali Makipela, ebukwe wa Mamure, kwahelesibwa Aburahamu kurio. Omukunda okwo kwalimwo ing'ani khandi kwalimwo emisaala kwosi. 18Aburahamu yahebwa omukunda okwo imbeli wa Abahiti, abali nibetsile mumukhung'ano okwo boosi, mana nikumanyikha mbu, nokukwe. 19Mana olunyuma Aburahamu nayabila omubili kwomukhayewe Sara, mung'ani eyali mumukunda kwa Makipela, okwali ebukwe wa Mamure (niyo Heburoni) mushialo shia Kanani. 20Khulweshio, Abahiti bahelesia Aburahamu omukunda kwalinji okwabwe mbu, kube okukwe, ayabilenjemwo abafube.
Currently Selected:
OBUCHACHILO 23: OLUPR
Highlight
Share
Copy
Want to have your highlights saved across all your devices? Sign up or sign in
