OBUCHACHILO 24
24
Isaka ateeshia Rebeka
1Kho Aburahamu yali nali omukofu wemiyika eminji. Khandi OMWAMI Nyasaye yali niyamuhelesia ikhabi mubindu biosi. 2Mana Aburahamu naboolela omukholiwe omukhongo muboosi, owali omusinjilili webindu bia Aburahamu yalinji ninabio biosi ari, “Ra omukhonokwo mumarango kanje, 3ndenya mbu, witsube muliira elia OMWAMI Nyasaye, Nyasaye welikulu nende eshialo mbu, shiolareererakhwo omusiani wanje omukhasi okhurula mubakhaana ba Abakanani abemenyilemwo ta, 4nebutswa okalushe mushialo shianje, khubekho banje, oreerere omusiani wanje Isaka omukhasi.”
5Omukholi oyo nareeba Aburahamu ari, “Haundi omukhaana oyo shialachama okhwitsa ninasi mushialo shino tawe. Okhuula embukule omusianiwo emukalusie mushialo shia warulamwo eshio noho?”
6Aburahamu namukalusia ari, “Shiolakalusiakhwo omusiani wanje ebweneyo tawe. 7OMWAMI Nyasaye, Nyasaye womwikulu, owarusia mubolwibulo lwa papa nende mushialo shiandebulwamwo, owamboolela niyanzitsubila ari, ‘Ndalahelesia Omukunda kuno khubolwibulolwo,’ alaruma omumalaikawe imbeliwo, naye omumalaika oyo alakhukhoonya okhunyoolela omusiani wanje omukhasi okhurula ebweneyo. 8Ne omukhaana oyo naba nalachama okhwitsa ninawe ta, kho olaba omulekhuule mushitsubo shianje shino. Nebutswa olakalusiakhwoyo omusiani wanje eyo tawe.” 9Kho omukholi oyo nara omukhonokwe mumarango komwamiwe Aburahamu, ne niyetsuba okhukhola amakhuwa ka Aburahamu yali namubooleele.
10Mana omukholi oyo nabukula tsingamia tsiomwamiwe ekhumi, khandi nabukula ebihaanwa ebiahule, ebietsimbia tsiosi okhurula khumwamiwe, ne nachaaka okhutsia Mesopotamia mwitookho lia Nahori. 11Olwa yolayo, khungoloobe ebise biabakhasi betsanga okhutaha amaatsi, yasikamia tsingamia hasi elwanyi welitookho ahambi khusebele yamaatsi. 12Mana nasaaya ari, “Iwe OMWAMI Nyasaye, Nyasaye owomwami wanje Aburahamu, ekhusaaya mbu, unyalile inyanga yino, enyole eshie nditsile, khandi ololesie obuheeli oburalilu khumwami wanje Aburahamu. 13Lola, esinjiile hambi neisebele yamaatsi yino, ne abakhaana babandu beene litookho lino, betsanga hano okhutaha amaatsi. 14Ndalaboolela mulala khubo endi, ‘Nochama ruula isiongo hasi, umbekhwo amaatsi enywe.’ Naba nafuchilila mana yamboolele ari, ‘Nywakhwo, khandi ndalakhureerera akandi ohelesie tsingamiatsio,’ ochame omwenoyo abe ye owa oloboleele omusumbawo Isaka. Eliene elo nilio elilamanyia mbu, ololesiye obuheeli oburalilu khumwami wanje.”
15Olwa yali nashisaayanga, Rebeka omukhaana wa Betsweli, omusiani wa Milika, owali omukhaye wa Nahori, omusiani wabwe Aburahamu narula niyetsa elwanyi nachinjile isiongo yamaatsi khwibeka. 16Omukhaana oyo, yali owelikondo lilayi, khandi yali nashili omushisila. Yakholomokha natsia khusebele, niyetsusia amaatsi musiongoye ne natikulukha okhurula musebele nakalukha. 17Mana omusumba wa Aburahamu oyo niyelukha natsia okhumwakanila, ne namuboolela ari, “Ekhusaaya mbu, umbekhwo amaatsi matiiti okhurula musiongoyo yino enywekhwo.” 18Rebeka namukalusia naboola ari, “Omwami wanje, nywakhwo.” Mana naruula bwangu isiongo, ne nachitiila mumakhonoke, kho namuhelesie amaatsi nanywa. 19Olwa Rebeka yali namalile okhuhelesia omukholi wa Aburahamu oyo amaatsi, yaboola ari, “Khandi ndalatayila tsingamiatsio amaatsi tsinywe, okhuula olwa tsilekura.” 20Kho natsukhulula amaatsi kali musiongo koosi mulwelo#24:20 mulwelo: olukaraya olwakaasiabwa okhurula khumusaala. bwangu bwangu, khandi nakalukha musebele tsimbilo okhutaha amaatsi kandi, okhuula olwa yali namalile okhunywesia tsingamia tsiomukholi wa Aburahamu tsiosi. 21Omusaatsa oyo nahenjelesia Rebeka naholeelile tsi, okhulola nikaba mbu, Nyasaye amukaasiliye oluchendolwe shinga olwa yali namusaayile.
22Olwa Rebeka yali niyakhamala okhunywe sia tsingamia amaatsi, omusaatsa oyo nabukula ingaka yobukusi khandi yeitsahabu, ne nara khushiulu shia Rebeka, khandi nabukula tsibangili tsieitsahabu tsibili tsikhongo namufwala khumakhonoke. 23Namureeba ari, “Mboolelakhwo, oli omukhaana wa wiina? Obwiyangu bulikhwo munzu mwa papawo, obwa khunyala okhwiyalisiamwo?” 24Naye Rebeka namukalusia ari, “Endi omukhaana wa Betsweli omusiani wa Milika, omukhaye wa Nahori.” 25Khandi Rebeka nameeta okhumuboolela ari, “Obunyaasi obuumu, obwakaasibwa okhurula khungano nende obunyasi obubisi, obwa tsingamiatsio tsinyala okhulia buliyo, khandi khuliyo nende inzu eyonyala okhwiyalisiamwo.”
26Mana omusaatsa oyo niyenamia obwenibwe hasi, niyenamila OMWAMI Nyasaye, 27khandi naboola ari “OMWAMI Nyasaye, Nyasaye womwami wanje Aburahamu, witsoomibwe, okhuba mubwisiikwabwo, shiwibiliile okhuusia aka walaka omwami wanje Aburahamu tawe. OMWAMI Nyasaye yanyimiliile shilunji okhuula khubekho bomwami wanje.”
28Mana Rebeka niyelukha natsia naboolela abeinzu ya nyinamwana amakhuwa ako. 29Rebeka yali nomusiani wabwe omukhulundu owalangwa mbu, Labani. 30Olwa Labani yalola ingaka khushiulu nende tsibangili khumakhono komukhaana wabwe, ne nahulila amakhuwa ka Rebeka omukhaana wabwe yali nabooleelwe, Labani yelukha tsimbilo natsia khusebele, ewa omusaatsa oyo yali. Namunyoola nasinjiile ahambi netsingamiatsie hasebele. 31Labani namuboolela ari, “Khutsie ingo, iwe owa OMWAMI Nyasaye ahelesiye ikhabi, osinjiile elwanyi mbushiina? Ekhukaasiliye habundu munzu mwanje, khandi engaasiye aha tsingamiatsio tsinyala khukona.”
32Mana omusaatsa oyo niyenjila munzu. Naye Labani naboholola emisiiko okhurula khu tsingamia etsio, Namuhelesia obunyasi obuumu, obwakaasibwa okhurula khungano nende obunyasi obubisi, obwa tsingamia tsinyala okhulia. Khandi namuhelesia amaatsi akokhwiyosia ebilenjebie nende ebia abasaatsa aba yali nachendile ninabo. 33Mana narenjeshelwa eshiokhulia mbu, alie. Nebutswa omusaatsa oyo naboola ari, “Shindalalia ta, okhuula olwa ndalaba nimubooleele eshichilile nindiitsa.” Labani namuboolela ari, “Khuboolelekhwo eshichilile niwiitsa.”
34Mana omusaatsa oyo naboola ari, “Isie endi omukholi wa Aburahamu. 35OMWAMI Nyasaye yahelesia omwami wanje Aburahamu tsikhabi tsinyinji muno, mana nomuyinda muno. Nyasaye yahelesia Aburahamu amakondi amanji nende emiruko chietsing'ombe, ifetsa nende itsahabu, abakholi beshisaatsa nende abeshikhasi, tsingamia nende tsisishili. 36Khandi Sara, omukhaye womwami wanje, mubushielebwe yamwibulila omwana omusiani. Aburahamu yahelesia omusianiwe oyo ebindu biosi ebia yali ninabio. 37Omwami wanje yaakhola isie okhwitsuba naboola ari, ‘Shiolareererakhwo omusiani wanje omukhasi okhurula mu Abakanani, abomushialo shiemenyilemwo tawe. 38Nebutswa olatsia muboluyia lwa papa wanje khandi abali abekho banje, mana obukuleyo omukhaana, abe omukhasi womusiani wanje.’ 39Nasi nemboolela omwami wanje endi, ‘Haundi omukhaana oyo anyala okhuloba okhwitsa ninasi noho!’ 40Nebutswa yangalusia naboola ari, ‘OMWAMI Nyasaye wekholelanga amakhuwa amalayi buli lwosi, alakhurumila omumalaikawe, naye alakhola oluchendolwo lube olulayi. Ne okhuula olareerera omusiani wanje omukhasi okhurula mubekho banje, khandi abali aboluyia lwa papa wanje! 41Mana olaba omulekhuule okhurula mushitsubo shianje. Ne notsia khubekho banje, mana baleshe okhukhuhelesia omukhaana, olaba omulekhuule okhurula mushitsubo shianje!’
42“Olwa nditsile khusebele inyanga yino, esaayile nemboola endi, ‘Iwe OMWAMI Nyasaye, Nyasaye womwami wanje Aburahamu, chama unyalile mukekola inyanga yino mbu, kabe amalayi. 43Lola, esinjiile hasebele hano. Chama mbu, omukhaana ouletsa okhutaha amaatsi, mana emusabekhwo amaatsi kokhunywa matiiti okhurula musiongoye, 44mana yambelesie, khandi atayilekhwo tsingamiatsio tsianje tsiosi tsinywekhwo, abe ye owa OMWAMI Nyasaye aloboole okhuba omukhasi womusiani womwami wanje.’
45“Olwa embeele neshisaayanga endio mumwoyo kwanje, nditsukhane Rebeka niyoola nachinjile isiongo yamaatsi khwibekalie, nakholomokha khusebele, ne nataha amaatsi. Nasi nemuboolela endi, ‘Nochama mbelesiakhwo amaatsi kokhunywa.’ 46Naye naruula bwangu isiongo okhurula khwibekalie nachitiila mumikhono, ne niyamboolela ari, ‘Nywa amaatsi, khandi ndalahelesia tsingamiatsio tsiosi tsinywe.’ Kho nenywa amaatsi ako, khandi nahelesia tsingamia tsiosi nitsinywa. 47Mana nemureeba endi, ‘Iwe oli omukhaana wa wiina?’ Naye nakalusia naboola ari, ‘Isie endi omukhaana wa Betsweli, omusiani wa Nahori, owa Milika yamwibulila!’ Kho nemufwala ingaka mushiulushie nende emikasa khumakhonoke. 48Mana nindinamia omurwe kwanje, ne nisaaya, khandi ninditsoomia OMWAMI Nyasaye, Nyasaye womwami wanje Aburahamu, ounzimiliile khunjila shilunji, okhuula khumukhaana wabekho bomwami wanje Aburahamu, okhunyoolela omusianiwe omukhasi. 49Kho bulano nimuba nimuchama okhukholela omwami wanje akobusuubisia khandi akobwatoto, mumboolele. Ne nikalali kario ta, khandi mumboolele kho mbu, endole eshiekhola.”
50Mana Labani nende Betsweli nibamukalusia bari, “Likhuwa lino lirula khu Nyasaye, ifwe shikhunyala okhulobola eliokhola tawe. 51Rebeka ngwoyo, mubukule mana otsie ninaye abe omukhasi womusiani womwamiwo shinga olwa OMWAMI Nyasaye aboolile.” 52Olwa omukholi wa Aburahamu oyo yahulila amakhuwa kabwe, yenamia obwenibwe hasi okhumwinamira OMWAMI Nyasaye. 53Mana omukholi wa Aburahamu oyo narusia ebihetso beifetsa, nende ebietsahabu nende ebifwalo nahelesia Rebeka; khandi nahelesia Labani nende nyina mwana Rebeka ebihaanwa biobukusi obukhongo.
54Mana omukholi oyo nabasaatsa ba yali ninabo nibalia khandi nibanywa ne nibeyalisiaho eshilo eshio. Olwa babuukha nibushiele, omukholi oyo yaboola ari, “Muuseebule engalushe ewomwami wanje.”
55Labani omusiani wabwe Rebeka nende nyinamwana nibamusaaya bari, “Muleshe omukhaana yekhalekhwo ninefwe kata khulwoluhoono lwetsinyanga ekhumi tsionyene, ne olunyuma anyala okhutsia.”
56Naye omukholi oyo nabakalusia naboola ari, “Shimulaashiisiekhwo ta, shichila OMWAMI Nyasaye amalile okhukhola oluchendo lwanje okhuba olulayi. Leshe isie enzie kho mbu, engalushile omwami wanje.”
57Nabo nibaboola bari, “Leshe khumulanje omukhaana mwene khumureebe.” 58Kho nibalanga Rebeka nibamureeba bari, “Olatsia nomusaatsa uno?” Rebeka nakalusia ari; “Ndalatsia ninaye.”
59Kho nibaseebula Rebeka omukhaana wabwe halala nende omulesiwe, omukholi wa Aburahamu nende abasaatsa ba yali ninabo. 60Nibalaamila Rebeka tsikhabi ne nibamuboolela bari,
“Omukhaana wefwe, obe nyinamwana abandu ebikhumila nebikhumila,
ne abolwibulolwo banyalilwe okhuhula nende okhubukula amatookho kabasuku babwe!”
61Mana Rebaka nende abakholibe beshikhasi nibarula nibaniina khutsingamia, nibatsia nomusaatsa oyo. Nolwa omukholi wa Aburahamu yabukula Rebeka natsia ninaye ario. 62Ne ebise ebio, Isaka naye yali niyarulile Beerilahairoi, namenyanga mushialo shia Negebu. 63Mana inyanga yindi khungoloobe, Isaka yatsia mumukunda okhuyililisia. Ne olwa yachinguula tsimonitsie nahenga, yalola tsingamia nitsitsanga. 64Khandi Rebeka yesi yachinguula tsimonitsie nahenga. Ne olwa yalola Isaka, yekha hasi okhurula khungamia. 65Mana nareeba omukholi wa Aburahamu oyo ari, “Niwiina ouchendanga niyetsa okhukhwakaanila oyo?” Naye omukholi oyo namukalusia naboola ari, “Nomwami wanje.” Kho nabukula olububilwe niyefuunikha mubwenibwe.
66Mana omukholi oyo naboolela Isaka koosi aka yali nakholile. 67Kho Isaka niyenjisia Rebeka mwiheema, eliali lia Sara nyinamwana, namuteshia naba omukhasiwe. Mana Isaka naheela Rebeka, khandi nalemibwa omwoyo olunyuma lwokhufwa khwa nyinamwana.
Currently Selected:
OBUCHACHILO 24: OLUPR
Highlight
Share
Copy
Want to have your highlights saved across all your devices? Sign up or sign in
