OBUCHACHILO 22
22
Nyasaye alachilisia Aburahamu okhuhaana Isaka shinga omusango omusambe
1 #
Obuch. 10:5; Sira 44:20; Abaheb. 11:17-19 Olunyuma lwamakhuwa ako, Nyasaye yateema Aburahamu. Nyasaye nalanga ari, “Aburahamu!” Naye Aburahamu nafuchilila ari, “Endi hano.” 2#2 Akak. 3:1Nyasaye namuboolela ari, “Bukula omusianiwo omuteelwa Isaka, owa waheela muno, mana otsie mushialo shia Moria, omusinze nomuhaana shinga omusango omusambe khushikulu eshia ndalakhumanyia.” 3Kho Aburahamu nabuukha mumabwibwi, nabukula abakholibe ababuukha babili nende omusianiwe Isaka. Kho narechekha tsikhwi khulwa omusango okwo. Ne narula niyekhala khusishili ne natsia habundu aha Nyasaye yali namubooleele. 4Khunyanga yakhataru, Aburahamu yachinguula tsimonitsie, ne nalola habundu tsana ehalekhwo okhurula aha yali. 5Mana Aburahamu naboolela abakholibe ababuukha abo ari, “Toonye hano nende isishili yino, nasi nende omuraaka uno khwambushe injelekha khwinamile Nyasaye kho khuchelele.”
6Kho Aburahamu nabukula tsikhwi tsiomusango etsio natukha omusianiwe Isaka khumurwe. Khandi nabukula omubano emumemu, ne nibatsia boosi babili halala. 7Mana Isaka nareeba samwana ari, “Endolanga omulilo nende tsikhwi. Nebutswa likondi liomusango tsana lili hena!”
8Aburahamu namukalusia ari, “Mwana wanje, Nyasaye mwene alahaana eshimeeme shiomusango omusambe.” Kho boosi nibalondokhana nibatsia.
9 #
Yak. 2:21
Olwa boola aha Nyasaye yali namubooleele, Aburahamu yombakhaho eshimalilo eshiemisango, niyanzakhwo tsikhwi, ne naboha omusianiwe Isaka nomukoye namwalisia khu tsikhwi etsiali khushimalilo shiemisango eshio. 10Mana Aburahamu nanyiila omukhonokwe nabukula emubano mbu, asinze omusianiwe. 11Nebutswa omumalaika wa Nyasaye yamulanga okhurula mwikulu naboola ari, “Aburahamu, Aburahamu!” Naye Aburahamu nakalusia ari, “Endi hano.”
12Omumalaika oyo namuboolela ari, “olasaalisiakhwo omuraaka oyo kata okhumukhola eshindu shiosi shiosi eshibi ta, okhuba emanyile mbu, ohelesinjia Nyasaye oluyali khandi omuriitsanga, okhuba shiohandile khumwanawo omuteelwa oyo tawe.”
13Naye Aburahamu nachinguula tsimonitsie, ne nalola likondi limiiku namukongowe, nilitiililwe tsinzika tsialio mushitsakha. Mana Aburahamu natsia nabukula likondi limiiku elo nalihaana shinga omusango omusambe mushilenje shiomusianiwe Isaka. 14Khulweshio, Aburahamu nakulikha habundu tsana mbu, “OMWAMI Nyasaye alahaana.” Okhuula bulano, habundu yaho hashilangungwa butswa mbu, “Khushikulu eshia OMWAMI Nyasaye, alahaana.”
15Khandi omumalaika wa Nyasaye nalanga Aburahamu olwakhabili okhurula mwikulu namuboolela ari, 16#Abaheb. 6:13,14“OMWAMI Nyasaye aboola ari, ‘Isie ndayetsubile omwene mbu, shichila wakholile kano, khandi shiohandile khumwanawo omuteelwa ta, 17#Abaheb. 11:12ekhusuubisia mbu, ndalakhukhuhelesia tsikhabi, khandi ndalenjiyia abolwibulolwo shinga tsing'ining'ini, khandi shinga omuyeshe kwokhulukuku lweinyanza. Khandi abolwibulolwo okhuula bakhahule abasuku babwe boosi. 18#Ebikh. 3:25Ne okhubirira mutsinzibulotsio, amahanga akeshialo koosi kakhanyoole tsikhabi shichila olindile lilako lianje.’ ” 19Kho Aburahamu nakalukha wa abakholibe bali, ne boosi halala nibatsia Berisheba, ewa Aburahamu yamala namenya.
Tsinzibulo tsia Nahori
20Mana olunyuma lwamakhuwa ako koosi, Aburahamu naboolelwa ari, “Milika yesi yebuliile omusiani wenywe Nahori abaana mbu, 21Uzi omwikulanda, Busi omusiani wabwe, Kamueli samwana Aramu, 22Khesedi, Hazo, Pilidashi, Yidilafu, nende Betsweli.” 23Betsweli naba samwana Rebeka. Abasiani munane abo nibo aba Milika yebulila Nahori, omusiani wabwe Aburahamu. 24Okhumeetakhwo, omukhasi omubiikha owalangwa mbu, Reuma yebula Teba, Gahamu, Tahashi nende Maaka.
Currently Selected:
OBUCHACHILO 22: OLUPR
Highlight
Share
Copy
Want to have your highlights saved across all your devices? Sign up or sign in
