EBIKHOLE BIA ABARUME 9
9
Saulo yekalukhasia okhuba omulondi wa Kristo
(Ebikh. 22:6-16; 26:12-18)
1Munyanga etsio Saulo yali nashisiomanga obululu okhwiira abalondi aba Omwami Yesu. Yatsia khumwisaaliisi omukhongo, 2mana nasaba mbu, ahebwe tsibarwa tsiokhumanyia abomutsisinagogi Damasiko, kho naba nanyanyoolayo abalondi aba Omwami, abasaatsa noho abakhasi abe ounyala okhubatiila nende okhubareera Yerusalemu.
3Olwa Saulo yali khunjila nali ahambi okhuula khwitookho lia Damasiko, mubwangu obulafu okhurula mwikulu bwamwashila tsimbeka tsiosi. 4Yakwa hasi, ne nahulila omwoyo nikuboola kuri, “Saulo, Saulo! Eshichilanga niusandia nishiina?” 5Naye Saulo nareeba ari, “Niwe wina Omwami?” Omwoyo okwo nikukalusia kuri, “Nisie Yesu, owa iwe osandinjia. 6Nebutswa buukha otsie mwitookho, ewa olaboolelwa aka okwanile okhukhola.” .
7Abandu aba yali nachendanga ninabo basinjila nibang'ang'alile, shichila bahulila omwoyo, ne shibalolakhwo omundu yesi yesi tawe. 8Saulo yabuukhaho, ne olwa yatimbula tsimonitsie shiyanyalilwa okhulola eshindu shiosi shiosi tawe. Kho nibamutiila omukhono okhumwimilila okhuula Damasiko. 9Ne khulwa tsinyanga tsitaru shiyanyalilwa okhulola ta, kata shiyaliakhwo noho okhunywakhwo eshindu shiosi shiosi tawe.
10Bulano yaliho omulondi undi wa Kristo Damasiko, owalangwa mbu, Anania. Omwami yamulanga mwilolelo ari, “Anania!”
Naye nakalusia ari, “Endiho Omwami.” 11Kho Omwami namuboolela ari, “Buukha otsie khunjila eyilangwa mbu, Inunji. Mana olwa huula munzu mwa Yuda, oreebe bakhumabyie omundu urulile Tariso, oulangwa mbu Saulo. Saulo mwene oyo bulano asaayanga. 12Ne mumalolelo aluutsi omundu oulangwa mbu Anania niyenjila munzu namurakhwo amakhono kho mbu anyalilwe okhulola khandi.”
13Nebutswa Anania yakalusia naboola ari, “Omwami, ndaahulile amakhuwa komundu oyo okhurula khubandu abanji, shinga yakholeele abandubo amakhuwa amabi Yerusalemu. 14Ne yetsile Damasiko nobunyali okhurula khubesaaliisi abakhulundu okhutiila boosi abasaayanga muliiralio.”
15Nebutswa Omwami yamuboolela ari, “Tsia, shichila ndamwahule okhukhalabanila isie, khulwa okhukhola eliira lianje okhumanyishila abamahanga nende abandu ba Isiraeli. 16Ne nasi omwene ndalamumanyia amanyakhano koosi kakhoyeele okhunyakhana khulwa eliira lianje.” 17Mana Anania natsia niyenjila munzu eya Saulo yalimwo, ne namurakhwo amakhono namuboolela ari, “Saulo mwana wefwe, Omwami Yesu omwene owakhuloleshele khunjila olwa wabele niwitsanga niye ourumile. Yarumile mbu onyalilwe okhulola khandi mana witsulemwo Roho Omutakatifu.” 18#Tob. 11:13-15Habwene nahabwene ebindu shinga amakhambaya#9:18 amakhambaya: Abandi balaanga mbu, amakamba. ake inyeeni nibikwa okhurula khumoni tsia Saulo, ne nanyalilwa okhulola khandi. Mana nasinjila, ne nabatiisibwa. 19Ne olwa yamala okhulia eshiokhulia, omubilikwe kwanyoola amaani.
Saulo ayaala Injiili Damasiko
Saulo yamenya Damasiko halala nabasuubili khulwa tsinyanga tsindiiti. 20Mana nachaaka okhuchenda mutsisinagogi nayaala mbu, Yesu nomwana wa Nyasaye.
21Abandu boosi abamuhulila bahuka, nibareebana abeene khubene bari, “Shiali niye owa yerirenje abo abasaayanga muliira lia Yesu, mwitookho lia Yerusalemu? Ne shiyayetsile hano khulwa lichoomo liene elo, eliokhutiila abandu abo nende okhubayila imbeli wabesaaliisi abakhulundu?” 22Ne Saulo nameeta okhuyaala, nikachila okhwechesiakhwe mbu, Yesu yali Kristo nikhutswana mubandu. Kata Abayahudi abamenya Damasiko nibakhaywa eliabakhamukalusia.
23 #
2 Abakor. 11:32,33 Ne olunyuma lwetsinyanga tsinyinji, Abayahudi basanjilana halala nibakaasia shinga olwa bakhanyala okhwiira Saulo. 24Nebutswa Saulo yaboolelwa aka bali nibakasinjia. Eshilo neshiteere bamukoneshelanga mubiliibwa bielitookho mbu, bamwiire. 25Nebutswa abeechibe bamubukula eshilo nibamura mushimwelo mana nibamwishilia mwitirisha khwisiisi.
Saulo acheniha abeechi Yerusalemu
26Saulo yatsia Yerusalemu nateema okhwiyunga halala nabeechi. Nebutswa shibasuubila mbu nomwechi washiabwe ta, kho boosi nibamuria. 27Habula Baranaba yamubukula namuyila khubarume. Mana Baranaba nabenoosia shinga olwa Saulo yali naluutsi Omwami khunjila, ne naboola ninaye. Khandi nabenoosia shinga olwa Saulo yayaala Damasiko muliira lia Yesu obularia tawe. 28Saulo namenya ninabo nayaala muliira lia Yesu mu Yerusalemu obularia likhuwa liosi liosi tawe. 29Yaboola nayingana nende Abayahudi abeshigiriki, nabo nibakhaaba okhumwiira. 30Olwa abasuubili bamanya kano, babukula Saulo nibamuyila Kaisaria, nibamuruma okhutsia Tariso.
31Kho mana abasanji beikanisa boosi mu Yudea, Galilaya nende Samaria nibaba nomulembe. Mubukhoonyi bwa Roho Omutakatifu nibeyumbakha, nibameetekha mubunji ne nibamenya mukhuria Omwami.
Petero akhola akamakana Lida nende Yopa
32Petero yachenda mumbali tsiosi, ne inyanga yindi natsia okhucheniha abasuubili abali nibamenya Lida. 33Ebweneyo yabukaana nende omundu oulangwa mbu Aineya, owali nalanyala okhubuukha okhurula khushitali ta, shichila yali niyafwokoya khulwemiyika munane. 34Petero namuboolela ari, “Aineya, Yesu Kristo alakhuhonia. Sinjila ofumbe eshitalishio.” Habwene nahabwene Aineya nasinjila. 35Abandu boosi abamenya Lida nende Sharoni bamulola mana nibasuubila mu Omwami.
36Nayo Yopa, yaliho omukhasi omusuubili oulangwa mbu, Tabitsa (Eliiralie mulugiriki ni Dorika, eshisina mbu, “Eshitsusu.”) Yekhoonyela ebisebie biosi okhukhola amalayi nende okhukhoonya abatakha. 37Munyanga etsio, yalwala ne nafwa. Abandu basinga omubilikwe nibakwalisia mushikoro shiahekulu. 38Litookholie shiliali ehale okhurula Lida tawe. Kho olwa abeechi abali Yopa bahulila mbu, Petero ali Lida, baruma abandu babili khuye nibaboola bari, “Chama witsekhwo bwangu ewefwe.” 39Kho Petero natsia ninabo. Olwa yolayo yayilwa mushikoro shiehekulu, ewa abakhasi abalekhwa boosi bamubotokhana, nibekhuulanga nibamumanyia amashati nende amakoti aka Dorika yanaba nashili omulamu. 40Petero yabarusia boosi elwanyi weshikoro, nasikama hasi nasaaya. Mana nashiukhana nahenga omufu naboola ari, “Tabitsa, buukha!” Naye natimbula tsimonitsie. Ne olwa yalola Petero yabuukha, niyekhala. 41Petero natiila omukhonokwe namukhoonya okhusinjila. Mana nalanga abandu ba Nyasaye boosi, halala nabakhasi abalekhwa abo, namuhaana mumakhono kabwe nali omulamu. 42Amakhuwa ako nikatswana habundu hosi Yopa, ne abandu abanji nibasuubila mu Omwami. 43Petero yamenya Yopa tsinyanga tsinyinji nende omunyushi wamaselo owalangwa mbu, Simoni.
Currently Selected:
EBIKHOLE BIA ABARUME 9: OLUPR
Highlight
Share
Copy
Want to have your highlights saved across all your devices? Sign up or sign in
