EBIKHOLE BIA ABARUME 10
10
Petero ayaalila Korinelio Amakhuwa Amalayi
1Omundu undi yali Kaisaria owalangwa mbu Korinelio, owali omwimilisi weing'anda yabelihe Abaroma eyilangwa mbu, “Ing'anda ya Italia.” 2Yali omundu oweyidini owenamilanga Nyasaye halala nende abeinzuye boosi. Khandi yakhoonyanga abatakha aba Yudea muno, ne shiyachweyanga okhusaaya Nyasaye tawe. 3Tsiali ahambi tsisaa shienda tsieshiteere olwa yalola lilolelo. Ne mwilolelo elo, yalola toto mwene omumalaika wa Nyasaye niyetsa namulanga ari, “Korinelio!” 4Naye narangaala omumalaika oyo noburi, mana namureeba ari, “Nishiina Omwami.”
Naye omumalaika oyo namukalusia ari, “Nyasaye afuchiliile amasaayoko nende emilimochio chietsimbabasi. 5Kho bulano ruma abandu Yopa okhwenda omundu undi oulangwa mbu, Simoni, eliiralie lindi niye Petero. 6Ali munzu yomunyushi wamaseelo oulangwa mbu Simoni, inzuye yili ahambi khulukuku lweinyanza.” 7Olwa omumalaika wali naboolile ninaye yarulaho, Korinelio yalanga abakholibe bomunzu babili nende mulala khubelihe bamukhalabanilanga khandi owenamilanga Nyasaye. 8Nababoolela akali nikekholeeshe koosi mana nabaruma Yopa.
9 #
Yudt. 8:5
Inyanga yalondakhwo, olwa bali nibashili khuluchendo, nibali ahambi okhuula Yopa, Petero yanina khushitsafu shieinzu ahambi khutsisaa tsisasaba tsieshiteere okhusaaya. 10Inzala yamuluma ne niyekomba eshiokhulia, nebutswa olwa eshiokhulia shiali nishikasibungwa, yalola lilolelo. 11Yalola likulu nilikuushe, ne eshindu nishikhanga hasi eshiafwana shinga ishuka imbambalifu niyishibungwa hasi khushialo, niyitiililwe tsimbeka tsiayo tsine. 12Ishuka eyo yalikhwo tsimbia tsiosi tsietsisolo; etsimoolanga khwiloba, nende amanyonyi akomubulimo. 13Mana nahulila omwoyo nikumuboolela kuri, “Petero, buukha osinzekhwo tsisolo etsio olie!” 14Naye Petero nakalusia ari, “Tawe, Omwami! Eshili okhuliakhwo eshindu shiosi shiosi eshiomusilo kata eshieshifwabwi tawe.”
15Mana omwoyo okwo nikumuboolela khandi kuri, “Eshindu shiosi shiosi eshia Nyasaye atsienuule olashilaangakhwo mbu, neshiomusilo tawe.” 16Kano kekholekha akhandi khataru, mana eshindu tsana nishikalusibwa mwikulu.
17Olwa Petero yali nashiyililisinjia eshisina shielilolelo elo, abandu aba Korinelio yali narumile boola khuinzu ya Simoni, ne nibasinjila hashiliibwa. 18Balaanga nibareeba bari, “Omucheni alikhwo muno oulangwa mbu, Simoni Petero?”
19Petero yali nashiteemanga okhumanyilisia eshisina shielilolelo elo, ne Roho Omutakatifu namuboolela ari, “Recheresia! Abasaatsa bataru#10:19 bataru: Amahandiko kandi kahandika mbu, Abandu; nakandi kahandika mbu Abandu babili. bali hano bakhukhaabanga. 20Kho buukha, wishe hasi, ne olakanakania okhutsia ninabo tawe, shichila nisie oubarumile.” 21Kho Petero niyekha hasi natsia khubasaatsa abo nababoolela ari, “Nisie omundu owamukhaabanga. Eshichilile nimwitsa nishiina?”
22Nabo nibamukalusia bari, “Omukhongo wabelihe oulangwa mbu, Korinelio akhurumile. Nomundu omulayi owinamilanga Nyasaye, khandi owa abandu aba Yudea boosi bahelesinjia oluyali. Omumalaika wa Nyasaye yamubooleele mbu, akhwinjisie iwe munzuye, kho mbu ahulile akomuboolela.” 23Mana Petero nabenjisia ne nababoolela mbu, beyalisiaho shinga abachenibe.
Inyanga yalondakhwo, yarula natsia ninabo. Ne balala khubasuubili okhurula Yopa nibatsia ninaye. 24Ne khunyanga yalondakhwo yola Kaisaria, ewa Korinelio halala nende abekhobe nende abetsabe aba yali nalanjile bali nibamulindililanga. 25Olwa Petero yali nali ahambi okhwinjila munzu, Korinelio yamwakaanila, nakwa mumakuluke, ne namwinamila. 26Nebutswa Petero yamubuusiaho, namuboolela ari, “Sinjila, isie endi omundu namundu.” 27Ne olwa Petero yaboola nende Korinelio, yenjila munzu, omwa yanyoola abandu abanji nibakhung'anile. 28Nababoolela ari, “Inywe mumanyile obulayi abeene shinga olwa kuli omusilo khwifwe Abayahudi okhucheniha noho okhusanjilana nende omundu omumahanga. Nebutswa Nyasaye yamanyiye mbu, shingwanile okhulanga omundu yesi yesi owomusilo noho oweshifwabwi tawe. 29Kho olwa murumane, nditsile nelakanakaniakhwo mumwoyo tawe. Kho mboolelekhwo, eshichilile nimunanga nishiina?”
30Mana Korinelio naboola ari, “Tsinyanga tsitaru tsihwele, khutsisaa shinga tsino, ndabeele nisaayanga munzu mwanje ahambi tsisaa shienda tsieshiteere. Mana ninditsukhana butswa omundu nasinjiile imbeli wanje niyefwalile tsingubo tsing'inang'inu, 31niyamboolela ari; ‘Korinelio! Nyasaye afuchilile amasaayoko nende emilimochio chietsimbabasi. 32Khulweshio, ruma abandu Yopa balanje omundu oulangwa ameerake koosi mbu, Simoni Petero. Nomucheni munzu ya Simoni, omunyushi wamaseelo, owamenya khulukuku lweinyanza.’ 33Kho neruma abandu okhukhulanga bwangu, nawe okholile obulayi okhwitsa. Kho bulano fwesi khuli hano imbeli wa Nyasaye nikhulindililanga okhuhulila koosi aka wibaalilwe nende Omwami okhukhuboolela ifwe.”
Aka Petero yayaala munzu mwa Korinelio
34 #
Okhuk. 10:17
Mana Petero nachaaka okhuboola ari, “Endola toto mbu, Nyasaye shialimwo ebiela tawe. 35Omundu yesi oumwinamilanga nakhola akobulunjishi, Nyasaye amufuchililanga obulateeba oluyialwe tawe. 36Mumanyile oburume obwa yarumila abandu ba Isiraeli, mukhuyaala Amakhuwa Amalayi kokhureera omulembe okhubirira mu Yesu Kristo, ouli Omwami wa boosi. 37Mumanyile likhuwa likhongo liekholekha mushialo shia Isiraeli shiosi, okhuchaachila Galilaya olunyuma lwa Yohana okhuyaala oburumebwe bwobubatiisibwi. 38Mumanyile aka Yesu wa Nazareti, khandi shinga Nyasaye yamutsushilila Roho Omutakatifu nende obunyali. Yachenda buli habundu, nakholanga amalayi nende okhuhonia boosi abali hasi wobunyali bwa Setani, okhuba Nyasaye yali halala ninaye. 39Ifwe khuli abaloli abamakhuwa koosi aka yakhola mushialo eshia Abayahudi nende Yerusalemu. Ne nibamwira khulwa okhumubamba khumusalaba. 40Nebutswa Nyasaye yamulamusia okhurula mukhufwa olunyuma lwetsinyanga tsitaru, mana namukhola okhulolekha. 41Shiyamukhola okhulolekha khubandu boosi ta, habula khubaloli aba Nyasaye yali namalile okhwahula, ne nifwe abatsana, khwalia khandi nikhunywa ninaye olunyuma lwokhulamukhakhwe mukhufwa. 42Naye yakhulachilisia okhuyaala Injiili khubandu khandi okhuboola obuloli mbu, niye owa Nyasaye yaahule okhuyasia abalamu nende abafu. 43Abalakusi boosi barumbula khuye nibaboola mbu, omundu yesi yesi ousuubila muye, alaleshelwa obwonoonibwe mubunyali bweliiralie.”
Abamahanga banyoola Roho Omutakatifu
44Olwa Petero yali nashiboolanga amakhuwa ako, Roho Omutakatifu yeekha khu boosi abali nibarecheresinjia aka yali nayaalanga. 45Abayahudi abasuubili abali nibarulile Yopa nibali nende Petero bahuchisibwa mbu, Nyasaye yatsushilila eshihaanwashie eshia Roho Omutakatifu khu Abamahanga khandi.
46Okhuba bahulila abamahanga nibaboolanga mutsinimi tsinjeni, nibetsoominjia obukhongo bwa Nyasaye. Petero naboola nomwoyo omukhongo ari, 47“Abandu bano banyoolile Roho Omutakatifu shinga ifwe fwesi khwanyoola. Aliho omundu yesi yesi bulano ounyala okhubekalila okhubatiisibwa namaatsi?” 48Kho nalaka mbu, babatiisibwe muliira lia Yesu Kristo. Mana nibamusaaya mbu amenyekhwo ninabo khulwa tsinyanga tsindiiti.
Currently Selected:
EBIKHOLE BIA ABARUME 10: OLUPR
Highlight
Share
Copy
Want to have your highlights saved across all your devices? Sign up or sign in
