EBIKHOLE BIA ABARUME 8

1Naye Saulo nafuchilisania nokhwiirwa khwa Sitefano.

Saulo asandia abasuubili

Okhuchachila khu inyanga eyo, ikanisa ya Yerusalemu niyichaka okhusandibwa obutinyu. Abasuubili boosi basalasibwa mumbali tsiosi tsia Abayahudi nende Abasamaria okhuyiniakhwo abarume bonyene nibo abalasalasibwa tawe. 2Abandu abesiikwa khu Nyasaye nibayabila Sitefano khandi nibamwikhuula obutinyu.

3 # Ebikh. 22:4,5; 26:9-11 Nebutswa Saulo yateema okhusandia ikanisa. Yenjila mubuli inzu, natiila abasuubili boosi, abasaatsa nende abakhasi nabayila mumbohe.

Abasuubili bayaala Injiili Samaria

4Abasuubili abasalasibwa batsia buli habundu nibayaalanga likhuwa lia Nyasaye. 5Filipo natsia mwitookho likhongo lia Samaria, ne nayaalila abandu Injiili ya Kristo. 6Shinga abemikanda bahulila nende okhulola akamakana aka yali nakholanga, boosi barecheresia nomwoyo mulala khu aka yali naboolanga. 7Ebishieno biayula nibirula mubandu abanji aba biali nibienjilamwo, khandi abemibili chiafwokoya nende abalema bahonibwa. 8Kho okhwikhoya okhunji nikhubaho mwitookho omwo.

9Yaliho omundu undi oweliira mbu, Simoni. Khulwa tsinyanga tsinyinji yakholanga obufumu mwitookho elo, ne niyeyitsiala mbu nomundu omukhongo. 10Abandu boosi abomwitookho abatiiti nabakhoongo barecheresinjia amakhuwake mana baboola bari, “Omundu uno niye obunyali bwa Nyasaye obulangwa mbu, ‘Obunyali Obukhongo.’ ” 11Kho bamuhulilisinjia shichila khulwa oluhoono olurambi yabahuchisinjia nobufumubwe obwo. 12Nebutswa olwa basuubila oburume bwa Filipo obwa Amakhuwa Amalayi kobwami bwa Nyasaye nende eliira lia Yesu Kristo, bamala boosi nibabatiisibwa abasaatsa nende abakhasi. 13Kata Simoni omwene yesi yamala nasuubila, ne namalile okhubatiisibwa, yatsiililila okhuba ahambi nende Filipo, ne nahuchisibwa olwa yalola akamakana nende akokhuhuchisia akali nikakholungwa.

14Bulano olwa abarume abali Yerusalemu bahulila mbu, abandu ba Samaria bafuchiliile likhuwa lia Nyasaye, babarumila Petero nende Yohana. 15Olwa boolayo basaayila abasuubili abo kho mbu, banyoole Roho Omutakatifu. 16Shichila Roho Omutakatifu yali nashili okhwishilakhwo omundu yesi yesi khubo; bali nibabatiisibwa butswa muliira elia Omwami Yesu. 17Kho Petero nende Yohana nibabarakhwo emikhono chiabwe, nabo nibanyoola Roho Omutakatifu.

18Bulano olwa Simoni yalola mbu, abarume bahaanile Roho Omutakatifu khulwa okhura emikhono chiabwe khubasuubili, yahelesia Petero nende Yohana amapesa 19naboola ari, “Mbelesiekhwo siesi obunyali buno, kho mbu omundu yesi yesi owa erakhwo emikhono chianje anyoole Roho Omutakatifu.” 20Nebutswa Petero yamukalusia naboola ari, “Iwe halala namapesako musishe busikha, shichila opaaranga mbu, onyala okhwikhoonyela amapesa okhukula eshihaanwa shia Nyasaye! 21Obulakhwo eshindu kata omukabo mumilimo chiefwe ta, shichila omwoyokwo shikuli omukololofu imbeli wa Nyasaye tawe. 22Khulweshio wikalukhasie okhurula mubumayanubwo buno, mana osaaye khu Omwami mbu, nikaba kanyalikha akhuleshele khulwa okhuba nelipaaro shinga elo mumwoyokwo. 23Okhuba enduutsi mbu oli neshikhalikhali khandi oli omubohe wobwonooni.”

24Simoni nakalusia Petero nende Yohana ari, “Chame musaayile khu Omwami, kho mbu kata elala khu aka muboolile kano lilanzikholekhakhwo tawe.”

25Olwa Petero nende Yohana bali nibamalile okhurusia obuloli bwabwe nende okhuyaala oburume obwa Omwami, bakalukha Yerusalemu. Khunjila nibatsitsanga bayaala Injiili mumataala amanji aka Samaria.

Filipo nende omukhongo wa Etsiopia

26Omumalaika wa Omwami naboolela Filipo ari, “Wirecheshe, otsie emulambo okhubirira khunjila yomushitsiimi eyirula Yerusalemu niyitsia Gaza.” 27Mana Filipo narula natsia. Ne omulate wa Etsiopia, owali omusinjilili omukhongo welibishilo liomuruchi mukhasi wa Etsiopia, yali niyetsile Yerusalemu okhwinamila Nyasaye. 28Yali nakalukhanga ingo, niyekhaale mwikaarilie lieshibia. Yali nasoomanga eshitabu shiomulakusi Isaya. 29Roho Omutakatifu naboolela Filipo ari, “Tsia ahambi nende likaari elo, orondokhane ninalio.” 30Kho Filipo natsia tsimbilo ewa omulate oyo yali, nahulila nasoomanga mushitabu shiomulakusi Isaya. Filipo namureeba ari, “Omanyilisinjia eshisina shiamakhuwa akosoomanga ako?” 31Omulate oyo namukalusia ari, “Ndakhamanyilisia endie omundu nalanzinoosiye?” Mana naboolela Filipo mbu yenjile mwikaari yekhale ninaye. 32#Isa. 53:7,8Ne olunyaali lwa yali nasoomanga mu Amahandiko lwali mbu,

“Yali shinga likondi eliyilungwa okhusinzwa,

yali shinga eshimeeme shielikondi eshilaana olwa shitetwa obukoya ta,

shiyaboolakhwo likhuwa liosi tawe.

33Yanyekwa, ne nalakhalachilwa eshiina habwene ta.

Abulaho oulinyala okhurumbula khukolwibulolwe,

shichila obulamubwe khushialo bumalile okhuula khushiakamo.”

34Omulate oyo nareeba Filipo ari, “Mboolelakhwo, niwiina owomulakusi aboolangakhwo uno? Aboolanga khuye omwene noho khumundu undi?” 35Mana Filipo nachaaka okhuboola, okhuchaachila khushiasia shia Amahandiko ako, namwinoosia Amakhuwa Amalayi ka Yesu. 36Olwa bali nibashitsilililanga noluchendo, boola habundu aha amaatsi kali. Mana omulate oyo naboola ari, “Amaatsi ngakano hano. Nishiina eshiakhanzikalila okhubatiisibwa?” [ 37Filipo namuboolela ari, “Onyala okhubatiisibwa noba nosuubila nomwoyokwo kwosi.” Naye nakalusia ari, “Esuubile mbu, Yesu Kristo niye Omwana wa Nyasaye.”]#8:37 Amahandiko kandi shikali nolunyaali luno tawe. 38Omulate oyo nalachilisia mbu, likaarilie lisinjisibwe. Mana bosi Filipo nende omulate oyo, nibekha okhurula khwikaari nibatsia mumaatsi, ne Filipo namubatiisia. 39Olwa barula mumaatsi, Roho owa Omwami yarusiaho Filipo. Omukhongo oyo nalamulolakhwo khandi ta, habula yatsilila khuluchendolwe nasangaalile muno. 40Filipo yenyoola nali Azotusi; mana nabirira mumatookho koosi nayaalanga Injiili okhuula olwa yola Kaisaria.

Currently Selected:

EBIKHOLE BIA ABARUME 8: OLUPR

Highlight

Copy