EBIKHOLE BIA ABARUME 7

Aka Sitefano yaboola mushiina

1Mana omwisaaliisi omukhongo nareeba Sitefano ari, “Aka abandu bano baboolanga khwiwe nakatoto noho?” 2#Obucha. 12:1Naye Sitefano nakalusia ari “Baana befwe nende Bapapa banje, recheresiekhwo. Nyasaye owoluyali yaloleshela kuuka wefwe Aburahamu olwa yali Mesopotamia nashiili okhutsia okhumenya Harani. 3Mana namuboolela ari, ‘Rula mubandu bolwibulolwo nende abomushialoshio otsie mushialo eshia ndalakhumanyia.’ 4#Obucha. 11:31; Obucha. 12:4Kho Aburahamu narula mushialo shia Abakalidayo natsia okhumenya Harani. Olunyuma lwokhufwa khwa samwana Aburahamu, Nyasaye yamuhuyia namureera mushialo eshia inywe mumenyilemwo shino. 5#Obucha. 12:7; 13:15; 15:18; 17:8Nyasaye shiyakabilakhwo Aburahamu eshitonye shiosi shiosi eshia eshialo eshio mbu, shibe eshishie omwene, kata likulu elala lionyene tawe. Nebutswa yamusuubisia mbu, alimuhelesia eshialo eshio, khandi mbu, shiliba eshishie nende eshiabandu abolwibulolwe abalitsa inyumawe. Olwa Nyasaye yahaana obusuubisie buno, Aburahamu shiyali nalikhwo nomwana yesi yesi tawe. 6#Obucha. 15:13,14Nyasaye yamuboolela ari, ‘Abolwibulolwo balimenya mushialo eshicheni, ewa balikholwa abasumba nibasandibwa khulwemiyika ebikhumi bine (400). 7#Okhur. 3:12Nebutswa ndilikhalachila abalibakhola abasumba abo eshiina, ne olunyumakhwo balirula mushialo eshio nibetsa okhunzinamila habundu hano.’ 8#Obucha. 17:10-14; Obucha. 21:2-4; Obucha. 25:26; Obucha. 29:31–35:18Mana Nyasaye nakhola indakano nende Aburahamu, ne namuhelesia omulukha kweshishebo okhuba eshilolelo shieindakano eyo. Kho olwa Aburahamu yebula Isaka, yamusheba khunyanga yomunane, naye Isaka yasheba omwanawe Yakobo, naye Yakobo yasheba abasianibe ekhumi nababili, abali abakuuka abakhulundu aboluyia lwefwe.

9 # Obucha. 37:11; Obucha. 37:28; Obucha. 39:2,21 “Abakuuka abo batiilwa neimbalikha khu Yosefu omwana wabwe, ne nibamukusia Misiri okhuba omusumba. Nebutswa Nyasaye yali ninaye, 10#Obucha. 41:39-41namuhonokosia mukhusandibwakhwe khwosi. Ne olwa Yosefu yalolekha imbeli womuruchi wa Misiri, Nyasaye yamuhelesia obuchesi nende okhukoosibwa. Mana omuruchi nakhola Yosefu okhuba omukhongo Misiri nende khubeinzu yoburuchi. 11#Obucha. 42:1,2Bulano inzala yamala niyibaho mushialo shia Misiri shiosi nende eshia Kanani, eya reera amanyakhano amanji. Abakuuka befwe nibalabakhwo neshiokhulia shiosi shiosi tawe. 12Ne olwa Yakobo yahulila mbu ebiokhulia bili Misiri, yarumayo abaanabe, abali abakuuka befwe khuluchendo lwambeli. 13#Obucha. 45:1; Obucha. 45:16Ne olwa bali khuluchendo lwakhabili, Yosefu yeebuula khubaana babwe nikachila omuruchi wa Misiri namanya oluyia lwa Yosefu. 14#Obucha. 45:9,10,17,18; Obucha. 46:27Kho Yosefu narumana mbu, Yakobo samwana nende abeinzuye boosi betse Misiri. Abandu boosi abetsa Misiri bali amakhumi musafu nabarano (75). 15#Obucha. 46:1-7; Obucha. 49:33Mana Yakobo natsia Misiri, ewa ye nende abakuuka befwe bafwila. 16#Obucha. 23:3-16; 33:19; 50:7-13; Yos. 24:32Amakumba kabwe kachiingwa nikarerwa Shekemu, nikayabilwa mung'ani eya Aburahamu yali niyakula namapesa okhurula khuboluyia lwa Hamori.

17 # Okhur. 1:7,8 “Ne olwa indukho yobusuubisie bwa Nyasaye yetsubila Aburahamu yali niyili ahambi okhuula, abandu befwe abali Misiri bali nibameeteeshe muno. 18Olunyumakhwo, omuruchi undi oulaali niyamanya Yosefu ta, yetsa khuburuchi Misiri. 19#Okhur. 1:10,11; Okhur. 1:22Omwene oyo yakholela abakuuka befwe akobubatsa, nabakholela amabi nende okhubalunyia, nabahachia mbu basukune abaana babwe abatoro mbu bafwe. 20#Okhur. 2:2Biali ebise bino ebia Musa yebulilwakhwo, yali omwana owelikondo lilayi. Yalelelwa munzu eya samwana emiesi chitaru, 21#Okhur. 2:3-10ne olwa yasukunwa, omukhaana womuruchi yamutoola, mana namulela shinga omwanawe! 22Musa yechesibwa amakhuwa kobuchesi bwa Abamisiri bwosi, kho naba omundu owamaani mumakhuwa khandi mubikhole.

23 # Okhur. 2:11-15 “Ne olwa Musa yali nali owemiyika amakhumi kane, lipaaro liamwitsila mumwoyokwe mbu, atsie akonyekhwo Abaisiraeli bashie, alole shinga olwa bali. 24Yalola mulala khubo nanyasibungwa nomumisiri, mana natsia mbu amukhoonye. Ne khulwa okhumala eshikwoli niyeera omumisiri oyo. 25(Yapaara mbu abandube beene balamanyilisia mbu, Nyasaye yali niyetsanga okhubahabina okhubirira muye kho mbu babe abalekhuule, nebutswa shibamanyilisia tawe). 26Inyanga yalondakhwo yalola Abaisiraeli babili nibasoolananga, kho nateema okhubakabukhasia naboola ari, ‘Recheresie, inywe mwesi muli aboluyia lulala, eshichila nimusoolana nishiina?’ 27Nebutswa owali nasoolasinjia owashie oyo yasindikha Musa, namureeba ari ‘Niwiina owakhukhola iwe okhuba omuruchi khandi omukhalachi weshiina khwifwe? 28Wenyanga okhunzira shinga olwa wayeerire omumisiri mukoloba noho?’ 29#Okhur. 18:3,4Ne olwa Musa yahulila amakhuwa ako, yelukha okhurula Misiri natsia okhumenya mushialo eshia Midiani, ebweneyo yebulilayo abaana babili abasiani.

30 # Okhur. 3:1-10 “Emiyika amakhumi kane nichihwele, omumalaika wa Omwami yaloleshela Musa mumulilo okwakha mushitsakha mushitsiimi, ahambi neshikulu shia Sinai. 31Olwa Musa yalola kano yarangaala, nasita ahambi neshitsakha eshio kho mbu, ashilole obulayi. Nebutswa yahulila omwoyo okwa Omwami nikuboola kuri, 32‘Isie nisie Nyasaye wabakuukabo, Nyasaye wa Aburahamu, Isaka nende Yakobo.’ Musa natechela khulwoburi mana nalenya okhushihengakhwo khandi ta. 33Omwami namuboolela ari, ‘Fwalula ebilaaro ebili mubilenjebio, shichila habundu ahosinjiile hano nahabundu hatakatifu. 34Enduutsi amanyakhano akabandu banje balimwo Misiri. Embuliile okhulila khwabwe, mana ndishile hasi okhubahabina. Kho bulano ekhuruma iwe Misiri.’

35 # Okhur. 2:14 “Musa uno owa Abaisiraeli baloba nibamureeba mbu, ‘Owakhukhola iwe okhuba omuruchi khandi omukhalachi weshiina khwifwe niwiina?’ Niye owa Nyasaye yaruma okhuba omuruchi khandi omuhabini wabwe khulwa obunyali bwomumalaika owamuloleshela mushitsakha shiali nishiyitsanga. 36#Okhur. 7:3; Okhur. 14:21; Obub. 14:33Yemilila abandu abo okhurula Misiri, nakholanga akamakana nende akokhuhuchisia mu Misiri, khunyanza inzakhanyu, nende mushitsiimi khulwemiyika amakhumi kane. 37#Okhuk. 18:15,18Musa uno niye owaboolela abandu Abaisiraeli ari, ‘Nyasaye alimurumila omulakusi butswa shinga olwa yaruma isie, ne yakhabe mulala khubandu benywe.’ 38#Okhur. 19:1–20:17; Okhuk. 5:1-33Niye owali nabandu Abaisiraeli nibakhung'anile mushitsiimi. Yaliyo nende bakuuka befwe nende omumalaika owaboola ninaye khushikulu shia Sinai, khandi nahebwa oburume bwa Nyasaye obwobulamu mbu akhuhelesie ifwe.

39“Nebutswa abakuuka befwe baloba okhumuhulila, nibamufukula nibekomba okhukalukha Misiri. 40#Okhur. 32:1Kho nibaboolela Haroni bari, ‘Khukasilie abanyasaye bakhwimilile shichila shikhumanyile eshikholeeshe khumundu mbu Musa, owakhureelile okhurula Misiri tawe,’ 41#Okhur. 32:2-6Mutsinyanga etsio, balonga eshifwanani shieshimoosi nibashikholela emisango, mana nibahelesia oluyali eshia bali nibalonjile abeene. 42#Amo. 5:25-27Nebutswa yabalekha mana nabahaana okhwinamila tsing'ining'ini tsiomwikulu, shinga olwa kahandikwa mushitabu shiabalakusi mbu,

‘Inywe abandu ba Isiraeli!

Toto nisie owamwasinzila

nende okhukholela emisango

khulwemiyika amakhumi kane mushitsiimi?

43Inywe mwachinga liheema liomunyasaye Moloki,

nende eshifwanani shieing'ining'ini yomunyasaye Refani.

Bino biali ebifwanani biamwaloonga khulwa okhubinamila.

Khulweshio ndalamuhuyia nemuyila mubuhambe mushialo eshili injelekha wa Babuloni.’

44 # Okhur. 25:9,40 “Abakuuka befwe balinji mushitsiimi neliheema litakatifu, eliali niliakasibwa shinga Nyasaye yali niyaboolela Musa okhulikaasia, okhulondana shinga olwa yali namumanyiyie. 45#Yos. 3:14-17Olunyumakhwo, abakuuka befwe ababukula liheema elo okhurula khubasabwe, balichinga okhuula mutsinyanga tsia Yoshwa nibabukula eshialo eshia amahanga aka Nyasaye yalondanga nikarula imbeli wabwe. Ne liamenyayo okhuula mutsinyanga tsia omuruchi Daudi. 46#2 Sam. 7:1-16; 1 Akak. 17:1-14Daudi yachamisia Nyasaye, kho Daudi nareeba Nyasaye wa Isiraeli mbu, afuchilile ye amumbashile habundu hokhumenya. 47#1 Abar. 6:1-38; 2 Akak. 3:1-17Nebutswa Solomoni niye owamala namumbashila inzu eyo.

48“Nebutswa Nyasaye Omukhongo Muno shiamenyanga munzu etsiombakhwa nabandu ta, shinga lwomulakusi yaboola mbu,

49 # Isa. 66:1,2 Omwami aboola ari, ‘mwikulu neshifumbi shianje shioburuchi,

nashio eshialo nishifumbumbi shianje eshialambisinjiakhwo ebilenje bianje.

Kho mwakhanyumbashila inzu eyambia shiina?

Nihabundu shiina aha ndakhamenya?

50Shindi nisie omwene owakaasia ebindu bino biosi?’

51 # Isa. 63:10 “Inywe abemirwe emitinyu, aba emioyo chienywe chibulamwo obusuubili, khandi aba amarwi kenywe kalahulilanga oburume bwa Nyasaye ta! Muli butswa shinga abakuuka benywe, shichila mwesi khandi mwikalilanga Roho Omutakatifu buli lwosi! 52Alikhwoho omulakusi owa abakuuka benywe balasandikha ta? Beera abarumwa ba Nyasaye abalakula khale akokhwitsa okhwa omurumwawe omulunjishi. Ne bulano inywe mwamukhoba nende okhumwiira. 53Inywe ninywe abanyoola amalako Nyasaye, akahaanwa nabamalaika, ne shimwakahulila tawe!”

Sitefano alaaswa namachina

54Olwa abeshiina bahulila amakhuwa aka Sitefano ako, basinyikha nibamulumasilia ameeno muburuma. 55Nebutswa Sitefano niyetsulwemwo Roho Omutakatifu, yahenga mwikulu nalola oluyali lwa Nyasaye, naye Yesu nasinjiile khumukhono omusaatsa kwa Nyasaye. 56Mana naboola ari, “Lole! Endolanga likulu nilikushe, ne Omwana womundu nasinjiile khumukhono omusaatsa kwa Nyasaye!”

57Abeshina bayiiba nomwoyo omukhongo, nibasiba amarwi kabwe namakhono. Mana boosi nibasita bwangu nibamukwakhwo, 58nibamurusia mwitookho, mana nibamulasa namachina. Abaloli balekha ebifwalo biabwe mubulindi bwomuraaka owalangwa mbu Saulo. 59Batsiililila okhulasa Sitefano namachina, naye nasaaya nomwoyo omukhongo naboola ari, “Omwami Yesu, bukula omwoyo kwanje!” 60Nasikama hasi mana nilila obutinyu naboola ari, “Omwami! Shiolababasiliakhwo obwonooni buno tawe!” Ne olwa yamala okhuboola ario, yakwisia omwoyo nafwa. .

Currently Selected:

EBIKHOLE BIA ABARUME 7: OLUPR

Highlight

Copy