EBIKHOLE BIA ABARUME 6
6
Abandu musafu baahulwa okhukhonyelela abarume
1Tsinyanga nitsihwelekhwo, abeechi batsiililila okhumeetekha, ne obusoolo nibubaho hakari wa Abayahudi abalomalomanga olugiriki nende Abayahudi abalomalomanga Oluheburania. Abayahudi abalomalomanga olugiriki beyiniakana mbu, abakhasi abalekhwa abelubeka lwabwe shibahebungwa omukabo kwobukhonyi kwa buli inyanga tawe. 2Kho abarume ekhumi nababili abo nibakhung'asia omukanda kwabasuubili halala nibababoolela bari, “Shibuli obulayi ifwe okhulekha okhuyaala likhuwa lia Nyasaye kho mbu khukabe abandu omukabo kwobukhonyi tawe. 3Khulweshio abaana befwe mwahule abandu musafu mwinywe, abamanyikha obulayi mbu betsulwamwo Roho Omutakatifu, nabachesi khandi nabeifuma indayi. Nefu khulabalaraho okhukhola omulimo kuno. 4Kho nefu khwikhoonyele obwiyangu bwefwe khulwa okhusaaya nende okhuyaala Injiili.”
5Omukanda kwosi kwasangalila kabarume baboola, kho nibaahula Sitefano, omundu owali nobusuubili obunji, khandi niyetsulamwo Roho Omutakatifu, nende Filipo, Porokoro, Nikanori, Timoni Paramena nende Nikolau owokhurula Antiokia, owali niyakalukhana naloondanga idiini ya Abayahudi. 6Omukanda okwo nikubahaana abandu abo khubarume, nabo nibabasaayila nibabarakhwo amakhono.
7Kho likhuwa lia Nyasaye nilimeeta okhutswana. Ne abeechi nibameetekha mu Yerusalemu. Abesaaliisi abanji nibafuchilila obusuubili obwo.
Okhutiilwa khwa Sitefano
8Mana Sitefano niyetsulwemwo obukoosia bwa Nyasaye nende obunyali, yakhola akamakana amanji nende akokhuhuchisia mubandu. 9Nebutswa abandu bandi abomukanda okwa “Isinagogi ya Abalekhuule,” bayingana nende Sitefano. Bali Abayahudi okhurula Kurene nende Alekisanderia, abandi barula Kilikia nende Asia. 10Nebutswa Roho yahelesia Sitefano obuchesi kho mbu, olwa yaboolanga ninabo, shibanyalilungwa okhumufukula tawe. 11Kho bahombelesia abandu bandi mumasilisi okhuboola bari, “Khumuhuliile omwene naboola amanyeko khu Musa nende khu Nyasaye!” 12Munjila yino bayakulula abandu, abakofu nende abechesia bamalako. Mana nibatiila Sitefano nibamuyila imbeli wabakofu beshiina. 13Mana nibareera abandu okhuboola akobubeeyi bari, “Omundu uno buli lwosi afukulanga Ihekalu yefwe indakatifu nende amalako ka Musa. 14Khumuhuliile naboola mbu, Yesu wa Nazareti oyo alilikulula Ihekalu yino khandi alikalukhasia emilukha chiosi echia khwahebwa okhurula khu Musa.” 15Abandu boosi abali nibekhale mushiina barangaala tsimoni tsiabwe khu Sitefano, ne nibalola obwenibwe nibufwana shinga obweni bwomumalaika.
Currently Selected:
EBIKHOLE BIA ABARUME 6: OLUPR
Highlight
Share
Copy
Want to have your highlights saved across all your devices? Sign up or sign in
