EBIKHOLE BIA ABARUME 5
5
Anania nende Safira
1Nebutswa omusaatsa undi yaliho oulangwa mbu Anania, ne omukhasiwe yalangwa mbu Safira. Bakusia emiandu chiabwe, 2mana Anania nafuchilisania nomukhasiwe mbu, abiishekhwo amapesa kandi, ne akandi ayilile abarume. 3Kho Petero namureeba ari, “Anania, mbushiina nofuchilila Setani okhukhwimilila nachila nobeeya Roho Omutakatifu khulwa okhubiikha amapesa kandi akokusiye mumukundakwo? 4Olwa obeele noshili okhukusia omukunda okwo, kubeele okukwo, ne kata lwobeele niwakhakukusia, amapesa kabeele akoko. Kho eshichilile nokhola likhuwa shinga elo nishiina? Shiobeeyile abandu ta, habula obeeyile Nyasaye!” 5#Sus. 1:55Mana olwa Anania yahulila amakhuwa ako, yakwa hasi ne nafwa. Mana abandu boosi abahulilakhwo amakhuwa ako, batiilwa noburi. 6Mana abasiani abaraaka nibetsa, nibamukanyila musanda, nibamuchinga nibatsia nibamuyabila.
7Olunyuma lwatsisaa hambi tsitaru, omukhasiwe yesi niyenjilamwo nalamanyile akali nikekholeeshe tawe. 8Mana Petero namureeba ari, “Mboolelakhwo, kano niko amapesa koosi aka iwe nende omusaatsawo munyoolile khulwa okhukusia omukunda kwenywe?”
Naye nakalusia naboola ari, “Toto mwene kabeele kario.”
9Naye Petero namureeba ari, “Eshichilile iwe nende omusaatsawo nimufuchilisania okhuteema Roho owa Omwami nishiina? Lola, abaraaka abakhayabila omusaatsawo bulano, nibo abali hamuliango abo, nawe wesi balakhuchinga nibakhuyila elwanyi!” 10Habwene nahabwene nakwa mubilenje bia Petero ne nafwa. Abaraaka abo nibetsamwo nibalola mbu afwile, kho nibamuchinga nibamurusia elwanyi, mana nibamuyabila halubeka nomusaatsawe. 11Abelikanisa boosi, nende abandi boosi abahulilakhwo amakhuwa ako batiilwa neindenga ikhongo.
Abarume bakhola akamakana nende akokhuhuchisia
12Abarume bakhola akamakana nende akokhuhuchisia amanji mubandu. Abasuubilibi boosi bakhung'anilanga mushikoro shia Solomoni. 13Ne abandu bandi boosi shibatsalikha okhwitsoka mubo tawe, kata kario abandu abanji babetsoomia. 14Nebutswa abandu abanji bameetekha khung'anda yabasuubili, omukanda okwa abasaatsa nende abakhasi abali nibasuubile mu Omwami. 15Okhulondana nende ebikhole ebia bali nibakholanga, abalwale bachingwa nibayilwa khunjila nibalisibwa khubitali nende khumayambo kho mbu, olwa Petero aba nabiranga aha bali, eshiinikha shibirekhwo butswa khubalala khubo. 16Mana emikanda chiabandu chietsa nichirula mumataala akarondokhane nende Yerusalemu nibareeranga abalwale babwe nende abo abebishieno biali mubo, mana boosi nibahonibwa.
Abarume basandibwa
17Nebutswa Omwisaaliisi Omukhulundu halala nende boosi aba yali ninabo, nibo abasanji bomukanda okwa Abasadukayo, nibatilila abarume imbalikha. 18Kho nibatiila abarume, nibabayila mumbohe yabandu boosi. 19Nebutswa mushilo eshio omumalaika owa Omwami yekula emiliango mumboye eyo, mana nabarusiamwo nababoolela ari, 20“Tsie musinjile muhekalu, muboolele abandu amakhuwa koosi akobulamu obuyia buno.” 21Abarume nabo bahulila nibalonda akababoolelwa, mana nibenjila muhekalu obukwe nibushebanga, ne nibachaaka okhwechesia.
Omwisaaliisi Omukhulundu nende aba yali ninabo betsa nibakhung'asia abakofu abeshiina eshia Abayahudi boosi; kho nibarumasia amakhuwa mumbohe mbu, abarume barelwe imbeli wabwe. 22Nebutswa olwa abakhongo abo batsia mumbohe eyo shibanyoolamwo abarume tawe, kho nibakalukha khubeshiina nibababoolela bari, 23“Olwa khuulile mumbohe, khunyoolile niyikalwe habwene obutinyu, nabo abalindi bayo boosi nibasinjiile hamiliango nibali meeso; nebutswa olwa khwikuule emiliango echio, shikhunyoolilemwo omundu kata mulala tawe!” 24Olwa abesaaliisi abakhulundu nende omukhongo wabalindi aba Ihekalu bahulilakhwo kano, bahuchisibwa khu akali nikekholeshe khubarume abo. 25Mana omusaatsa undi niyetsamwo nababoolela ari, “Rechelesie! Abandu bamwareele mumbohe bali muhekalu bechesinjia abandu!” 26Kho omukhongo wabalindi oyo natsia nabalindi mana nibareera abarume imbeli weshiina. Yabareera ahalali amahababa koosi ta, shichila baria mbu haundi abandu bakhabalasa namachina.
27Benjisia abarume mukari, mana nibabasinjisia imbeli weshiina, kho Omwisaaliisi Omukhongo nabareeba ari, 28#Mat. 27:25“Ifwe khwamulachilisia obutinyu mbu, mulechesiakhwo muliira eliomundu uno khandi ta, nebutswa lolekhwo aka mukholile! Mutswaniye amechesio kenywe kano mu Yerusalemu mwosi, mana khandi mwenyanga okhukhurakhwo eshikha shiokhufwakhwe!”
29Nebutswa Petero nende abarume bashie babakalusia bari, “Khukhoyile okhuhulila aka Nyasaye okhushila akabandu. 30Nyasaye owa abakuuka befwe, yalamusia Yesu okhurula mukhufwa, olunyuma lwa inywe okhumubamba khumusalaba. 31Nyasaye yamuchinguula namura khumukhonokwe omusaatsa okhuba omwimilisi khandi omuhonia, okhuhelesia abandu aba Abaisiraeli obwiyangu obwokhwikalukhasia baleshelwe obwonooni bwabwe. 32Ne ifwe nende Roho Omutakatifu ouli eshihaanwa shia Nyasaye khwabo aba muhulilanga khuli abaloli abamakhuwa kano.”
33Ne olwa abeshiina bahulila bario, basinyikha po, ne nibakhalaka mbu abarume abo berwe. 34Nebutswa mulala khubeshiina Omufarisayo owalangwa mbu Gamalieli, owali omwechesia wamalako, khandi niyahebwa oluyali nabandu boosi, yasinjila mushina. Yalachilisia mbu abarume abo barusibwe elwanyi. 35Mana naboolela abeshiina ari, “Abaisiraeli bashianje, henjelesie obulayi akamwenyanga okhukholela abandu bano. 36Mwitsulila mbu munyanga etsiabirilekhwo omundu mbu Tseuda yabukha niyeyitsialanga mbu nomundu omukhongo, mana abandu abanji abahela ahambi ebikhumi bine (400), nibamuloondakhwo. Nebutswa yamala yeerwe, nabo abalondibe boosi nibasalasibwa, mana omukandakwe nikukhamulukha. 37Olunyuma lwomwene uno Yuda Omugalilaya yabukha munyanga tsiabandu okhubasibwa nakhung'asia omukanda omukhongo nikumuloondakhwo, nebutswa yesi khandi yamala yeerwa, nabo abalondibe boosi nibasalasibwa. 38Khulweshio khumakhuwa kabandu bano emuboolela mbu, mulabakhalachilekhwo likhuwa liosi tawe; baleshe butswa babe bario. Ne nikaba mbu akabakasiye nende akabakholanga nakabandu nabandu kalakhamuukha kario, 39#2 Mak. 7:19nebutswa nikaba mbu, karulanga khu Nyasaye shimwakhanyala okhukasasia tawe. Mwakhanyoolekha nimulwananga nende Nyasaye!”
Abeshiina bamala nibalonda amebaalo aka Gamalieli. 40Bamala nibalanga abarume abo mukari nibabanywekha nende okhubakania obutinyu mbu, balaboolakhwo likhuwa liosi muliira lia Yesu khandi tawe, mana nibabalekhuula. 41Mana abarume abo nibarula mushina nibekhoyanga po, shichila Nyasaye yali nababasiye mbu nabakhoyeele okhufwolwa khulwa eliira lia Yesu. 42Kho buli inyanga batsiililila okhwechesia muhekalu nende mutsingo tsiabandu Amakhuwa Amalayi aka Yesu mbu, niye Kristo.
Currently Selected:
EBIKHOLE BIA ABARUME 5: OLUPR
Highlight
Share
Copy
Want to have your highlights saved across all your devices? Sign up or sign in
