EBIKHOLE BIA ABARUME 4

Petero nende Yohana imbeli wabakhalachi beshiina

1Ne olwa Petero nende Yohana bali nibashiboolanga nabandu, balala khubesaaliisi#4:1 balala khubesaaliisi: Amahandiko kandi kaboolanga mbu, abesaaliisi abakhongo., nende omukhongo ousinjiliile abalindi bomuhekalu nende balala khu Abasadukayo betsa ewa bali. 2Bali nibasinyishe shichila abarume babili abo, bali nibechesinjia abandu mbu, Yesu yalamusibwa okhurula mukhufwa, elimanyinjiia mbu, abafu balilamukha khandi. 3Kho nibabatiila ne nibabara mumbohe okhuula inyanga yalondakhwo shichila bwali nibwilile. 4Nebutswa abanji abahulila oburume bwabwe obwo basuubila; ne abandu abasuubila bemeeta niboola ebikhumila birano (5,000).

5Kho inyanga yalondakhwo, abemilisi ba Abayahudi, abakofu nende abechesia bamalako bakhung'ana mu Yerusalemu. 6Nibabukaana nende Anasi, owali omwisaaliisi omukhulundu nende Kayafa, Yohana, Alekisanda nende abandi abomuluyia lwabesaaliisi abakhulundu. 7Basinjisia abarume abo imbeli wabwe, mana nibabareeba bari, “Mwahoniye murie omulema uno? Ne nobunyali shiina noho ni muliira lia wina elia mwikhoonyelanga okhukhola kano?”

8Mana Petero niyetsuulemwo Roho Omutakatifu, yabakalusia ari, “Inywe abemilisi babandu nende abakofu, 9nikakhaba mbu khuyaasibungwa inyanga yino khubikhole ebilayi ebikholeelwe omundu omulema uno nende shinga olwa yahonibwe, 10kho inywe mwesi nende abandu ba Isiraeli boosi, mukhoyile okhumanya mbu, omundu uno asinjilanga hano, imbeli wenywe nali omulamu khandi omulamba ario, okhubirira mubunyali bweliira lia Yesu Kristo, wa Nazareti, owa mwabamba, ne Nyasaye namulamusia okhurula mukhufwa. 11#Tsits. 118:22Yesu uno niye owa Amahandiko kaboolangakhwo mbu,

‘Lichina elia inywe abombashi mwaloba

limalile okhukalukhana okhukwa

lichina likhulundu okhushila akandi koosi.’

12Obuhonia bunyoolekhanga okhubirira muye yenyene, okhuba mushialo shiosi shialikhwoho oundi yesi owa Nyasaye yahaana ounyala okhukhuhonia ifwe tawe.”

13Abakhalachi beshiina abo bahuka okhulola Petero nende Yohana nibaboola neitswoni, ne nibali butswa abandu nabandu abalasooma tawe. Kho nibamala nibamanyilisia khandi mbu, bali abalondi ba Yesu. 14Nebutswa shishialikhwoho eshindu eshiabakhanyalile okhuboola ta, shichila balola omundu watsana owali nahoniibwe nasinjiileho nende Petero nende Yohana. 15Kho nibababoolela mbu, barule batsie elwanyi. Mana nibachaaka okhuboolelana abeene khubeene. 16Nibareebana bari, “Khukhole khurie abandu bano? Buli mundu mu Yerusalemu amanyile mbu, nibo abakholile eshikhole eshiamakana shino, ne shikhunyala okhushiikaana tawe. 17Nebutswa khulwa okhwikalila amakhuwa kano, kaleshe okhumeeta okhutswana mubandu, chende khuhalabile abandu bano mbu balaboolakhwo kata nahatuutu khumundu yesi muliira lia Yesu khandi tawe.”

18Kho nibabalanga okhukalukhamwo, nibabakaya obutinyu mbu balateemakhwo okhuboola noho okhwechesia munjila yosi yosi muliira lia Yesu tawe. 19Nebutswa Petero nende Yohana babakalusia nibaboola bari, “Inywe abeene khalache, akali habwene nakaleena imbeli wa Nyasaye, okhumuhulila inywe noho okhuhulila Nyasaye? 20Shichila ifwe shikhunyala okhulekha okhuboola aka ifwe abeene khwalutsi nikhuhulila tawe.” 21Kho abalachi beshiina abo, nibabakaania obutinyu, mana nibabalekhuula. Abakhalachi abo bamanya mbu, shibanyala okhubahelesia eshinyasio ta, shichila abandu boosi bali nibetsoominjia Nyasaye khu akali nikekholeeshe. 22Omundu tsana owali nahoniibwe oyo, yali owemiyika amakhumi kane okhutsia imbeli.

Abasuubili basaba Nyasaye okhubahelesia itswoni

23Ne olwa Petero nende Yohana balekhuulwa, batsia lwangu ewa abashiabwe bali, nibababoolela kabesaaliisi abakhulundu nende abakofu bali nibababooleele. 24#Okhur. 20:11; Neh. 9:6; Tsits. 146:6Ne olwa abasuubili abo bahulilakhwo amakhuwa ako, boosi baliimana halala mukhusaaya Nyasaye nibaboola bari, “Omwami, omwene obunyali, owalonga likulu nende eshialo, inyanza nende ebilimwo biosi! 25#Tsits. 2:1,2Iwe, mubunyali bwa Roho Omutakatifu, waboola okhubirira mukuuka wefwe Daudi, omukhalabaniwo mbu,

‘Eshichila amahanga nikatiilwa noburuma nishiina?

Ne, eshichila abandu nibarechekha amakhuwa akabutswa nishiina?

26Abaruchi beshialo nende abakhulundu babwe beshiina

bafuchilisania boosi okhuloba Omwami nende Kristowe.’

27 # Luka 23:7-11; Mat. 27:1,2; Mrk. 15:1; Luka 23:1; Yoh. 18:28,29 “Okhuba toto, Herode nende Pontio Pilato bakhung'ana mwitookho muno nende abamahanga halala nende Abaisiraeli okhufukula Yesu, omukhalabaniwo omutakatifu, owa iwe waahula okhuba Kristo. 28Bakhung'ana okhukhola buli shindu eshia iwe omwene mubunyalibwo nende mukhwenyakhwo wali niwamala okhubisia khale mbu, kalikholekha kario. 29Ne bulano Omwami, lolakhwo okhusioma khwabakhusiomeele ifwe, mana okhufuchilile ifwe abakhalabanibo okhuboola oburumebwo neitswoni yosi. 30Lolesie obunyalibwo bwokhuhonia abandu, khandi ohaane obunyali kho mbu, akamakana nende akokhuhuchisia kakholwe muliira elia Omukhalabaniwo Omutakatifu Yesu.”

31Ne olwa bamala okhusaaya, habundu aha bali nibakhung'aniile yaho, hatechesibwa. Mana boosi nibetsulamwo Roho Omutakatifu, ne nibachaaka okhurumbula oburume bwa Nyasaye neitswoni.

Abasuubili basanjilana khubindu biabwe biosi

32 # Ebikh. 2:44,45 Omukanda kwabasuubili kwali halala mumapaaro nende mumwoyo. Shiyalikhwoho owaboola mbu, shiosi shiosi eshiokhubindubie neshishie omwene ta, nebutswa basanjilana khu ebiabali ninabio biosi. 33Nabo abarume barumbula nobunyali obukhongo akobuloli bwabwe khubulamushi obwa Omwami Yesu, naye Nyasaye nabahelesia boosi tsikhabi tsinyinji. 34Shiyalikhwoho kata mulala khubo owatamba eshindu shiosi tawe. Ne boosi abali nemikunda noho tsinzu, babikusia, ne nibareera amapesa aka bali nibanyoolilemwo, 35nibahelesia abarume. Amapesa ako kakabulilungwa khubuli mulala okhulondana nende obwenyibwe.

36Khulweshio Yosefu, Omulawi owali omwibule wa Kupuro, owa abarume bakulikha mbu, Baranaba (eshisina mbu, “Omundu wokhutinyisia abandu omwoyo”), 37yakusia omukunda okwa yali ninakwo, ne nareera amapesa aka yanyoola khubarume.

Currently Selected:

EBIKHOLE BIA ABARUME 4: OLUPR

Highlight

Copy