EBIKHOLE BIA ABARUME 3
3
Petero nende Yohana bahonia omusabisabi omulema
1Inyanga yindi Petero nende Yohana batsia muhekalu tsisaa shienda tsieshiteere ebise biamasaayo. 2Hashilibwa shiehekalu eshilangwa mbu, “Eshilibwa Eshilayi,” yaliho omundu owali omulema okhurula olwa yebulwa. Buli nyanga bamuchinganga nibamureera hashilibwa yaho okhusaba saba amapesa okhurula khwabo abenjilanga muhekalu. 3Ne olwa yalola Petero nende Yohana nibenjilanga muhekalu, yabasaba mbu bamuhelesiekhwo eshindu shiosi shiosi. 4Boosi nibamurangala, mana Petero namuboolela ari, “Khuhenjekhwo!” 5Mana nashiukhana nabahengakhwo, napaara mbu, balamuhelesiakhwo eshindu. 6Petero namuboolela ari, “Shiendikhwo namapesa koosi koosi ta, nebutswa ndalakhuhelesia eshiendi ninashio. Muliira lia Yesu Kristo owa Nazareti, ekhulaka mbu, sinjila ochende!” 7Mana Petero namutiila omukhonokwe musaatsa namukhonyelela okhusinjila. Habwene nahabwene ebilenje biomundu oyo nende tsikhong'ositsie nibinyoola amaani. 8Nasila ikulu, nasinjila, mana nachaaka okhuchenda. Mana niyenjila muhekalu ninabo, nachendanga nende okhuruma niyetsoomia Nyasaye. 9Mana abandu abalimwo nibamulola nachendanga niyetsoomia Nyasaye. 10Olwa bamanyilisia mbu niye omusabi sabi wikhalanga “Hashilibwa eshilangwa mbu Eshilayi,” boosi bahuka khandi nibachenya khu akali nikamwikholeshekhwo ako.
Aka Petero yayaala muhekalu
11Ne lwomundu tsana oyo yali nashihandile khu Petero nende Yohana, abandu boosi nibashing'ang'alile bario, bakhung'ana halala mushikoro eshilangwa mbu, “Eshisika shia Solomoni.” 12Ne olwa Petero yalola abandu abo, yababoolela ari, “Abaisiraeli bashianje, eshichilanga namuhuchusibwa khukano nishiina? Eshichilanga nimukhurangala murio nishiina? Mupaaranga mbu, omundu uno achendile khuwa obunyali bwefwe noho eshilongoole shiefwe noho? 13#Okhur. 3:15Nyasaye wa Aburahamu, Isaka nende Yakobo, ouli Nyasaye owabakuuka befwe, niye ouchingulile oluyali lwomukhalabaniwe Yesu. Nebutswa inywe mwamuhaana khubaruchi, nimumwikana imbeli wa Pilato, kata olwa Pilato yali niyenyanga okhumulekhuula. 14#Mat. 27:15-23; Mrk. 15:6-14; Luka 23:13-23; Yoh. 19:12-15Yali omutakatifu khandi omulunjishi, nebutswa inywe mwamuloba, mushilenjeshie nimureeba Pilato okhumulekhulila omwiri. 15Mana nimwiira oyo ouli eshisina shiobulamu bwatoto, nebutswa Nyasaye yamulamusia okhurula mukhufwa. Ne ifwe khuli abaloli khumakhuwa ako. 16Eliira lia Yesu nende okhusuubilila mulio, nibio ebihelesiye omulema uno amaani, owamulolanga khandi owamwamanya uno. Obusuubili muliira lia Kristo nibwo obumuhoniye khandi nibumukhola okhuba omulamba shinga olwa mulolanga nali ario.
17“Ne bulano, baana befwe, emanyile mbu, aka inywe nende abemilisi benywe mwakholela Yesu, mwakhola mukhukorwa. 18Nyasaye yaranjilila okhuboola khale okhubirira mubalakusibe boosi mbu, okhuula Kristowe anyasibwe, mana nakakhola okhuusibwa munjila eyo. 19Khulweshio, bulano mwikalukhasie nimukalukha khu Nyasaye kho mbu, amuleshele obwonooni bwenywe. Nimwakhakhola murio, 20ebise bitsanga ebia mulanyoola amaani aka Roho omutakatifu okhurula khu Omwami, naye alaruma Yesu ouli Kristo, owa yamala okhumwahulila inywe khale. 21Alamenya mwikulu okhuula olwa eshise shiliula eshia ebindu biosi bilikholwa ebiyia, shinga olwa Nyasaye yaranjilila okhuboola khale okhubirira mubalakusibe abatakatifu abaliho. 22#Okhuk. 18:15,18Okhuba Musa yaboola ari, ‘OMWAMI Nyasaye wenywe, yakhamurumile omulakusi okhurula mubandu benywe beene shinga olwa yaaruma isie. Mulimuhulila shinga olwa mumbulilanga isie. 23#Okhuk. 18:19Omundu yesi yesi oulikhaya okhuhulila amakhuwa akomulakusi oyo, alirusibwa mubandu ba Nyasaye, ne nasasibwa.’ 24Ne abalakusi boosi abali noburume, okhuchaachila khu Samweli nende abo abetsa olunyuma, boosi barumbula khuketsinyanga etsio. 25#Obucha. 22:18Aka Nyasaye yasuubisia okhubirira mubalakusi kali khwinywe, nenywe musanganga mundakano eya Nyasaye yakaasia nende abakuuka benywe. Shinga olwa yaboolela Aburahamu ari, ‘Okhubirira mubolwibulolwo, ndalalaamila abandu bokhushialo boosi tsikhabi.’ 26Kho Nyasaye yalobola omukhalabaniwe, ne naranjilila okhumuruma khwinywe mbu, amulaamile inywe tsikhabi khulwa okhukhola buli mulala khwinywe okhwikalukhasia okhurula mubwonooni.”
Currently Selected:
EBIKHOLE BIA ABARUME 3: OLUPR
Highlight
Share
Copy
Want to have your highlights saved across all your devices? Sign up or sign in
