EBIKHOLE BIA ABARUME 2

Okhwitsa khwa Roho Omutakatifu khubasuubili

1 # Abal. 23:15-21; Okhuk. 16:9-11 Ne olwa inyanga ya Pendekote yola, abasuubili boosi bakhung'ana habundu halala. 2Mubwangu bahulila oluyoka okhurula mwikulu olwahulilikha shinga okhuhoola khwomuyeka omukhongo, nilwitsula munzu omwa bali nibekhale mwosi. 3Mana nibalola eshiafwana shinga tsinimi tsiomulilo nitsiyeela khubuli shiamulala habwenaho. 4Mana boosi nibetsulwamwo nende Roho Omutakatifu, ne nibachaaka okhuboola mutsinimi tsindi shinga olwa Roho Omutakatifu yabanyalila okhuboola. .

5Baliho Abayahudi bandi abahelesinjia Nyasaye oluyali, abali nibarula mumahanga koosi keshialo, ne nibamenya Yerusalemu munyanga etsio. 6Olwa bahulila oluyoka olwo, omukanda omukhongo kwabandu kwakhung'anaho. Boosi besundukha muno, shichila buli shiamulala khubo yahulila abasuubili abo nibaboola mululimilwe. 7Mana nibang'ang'ala nende okhwisundukha, ne nibareebana bari, “Abandu baboolanga bano shibali Abagalilaya? 8Ne kali karie mbu, buli omundu khwifwe abahulilanga nibaboola mutsinimi tsifwe? 9Ifwe khurulanga Paritsi, Media, Elamu, abandi khurulanga Mesopotamia, Yudea, Kapadokia, Ponto nende Asia, 10abandi khurulanga Firigia, Pamufilia, Misiri, abandi khurulanga mungongo tsia Libia ahambi nende Ekirene. Ne abandi khurula Roma, 11boosi Abayahudi abebule nende abo abekalukhasia okhuba Abayahudi, okhurula Kirete nende Arabia, fwesi pe khuhulilanga nibaboola mutsinimi tsiefwe, khumakhuwa kebikhole ebikhongo ebia Nyasaye yakhola!” 12Boosi bang'ang'aala nibahuka mana nibareebana abeene khubeene bari, “Eshisina shia amakhuwa kano nishiina?”

13Nebutswa abandi babatseshelela nibaboola bari, “Abandu bano bameelile amalwa!”

Aka Petero yayaala khunyanga ya Pendekote

14Mana Petero nasinjiile halala nabarume bashie ekhumi namulala abo, nachinguula omwoyo naboolela omukanda ari, “Inywe Abayahudi bashianje nende mwesi abamenyile Yerusalemu, recheresie emuboolele eshisina shiamakhuwa kano. 15Abandu bano shibameelile amalwa shinga olwa inywe mupaaranga tawe, bulano netsisaa tsitaru tsiomumabwibwi. 16Habula kano niko akomulakusi Yoeli yaboola ari:

17 # Yoe. 2:28-32 Nyasaye aboola ari, ‘Kano niko akandakhakhole munyanga tsiobumalilishi:

Ndakhasuundulile abandu boosi Roho wanje.

Ne abaana benywe abasiani nende abakhaana

bakharumbule amakhuwa kanje,

abaraaka benywe bakhalole amalolelo

nabo abakofu benywe nibaloora amalooro.

18Toto, kata khubakhalabani banje abasaatsa nende abakhasi

ndakhabasuundulile Roho wanje munyanga etsio,

nabo nibarumbula amakhuwa kanje.

19Ndakhakhole akamakana ikulu mwikulu

nende akokhuchenyia hasi khushialo mbu, amatsayi, omulilo,

nende omwosi omukhongo.

20Eliuba liakhakalukhasibwa nilikwa eshiilima,

nakwo omwesi kwakhakalukhane nikwakhanya shinga amatsayi,

inyanga eya Omwami ikhongo khandi eyoluyali niyishili okhuula.

21Mana yesi yesi oulihabila eliira elia Omwami alihonibwa.’

22“Inywe Abaisiraeli bashianje recheresie amakhuwa kano! Yesu wa Nazareti, omundu owa obunyalibwe bweshinyasaye bwalolesibwa khwinywe habulafu okhubirira mubikhole biamakana nende ebiokhuhuchisia biosi ebia Nyasaye yakhola okhubirira muye. Inywe abeene mumanyile kano, shichila kekholekha hano mwinywe. 23#Mat. 27:35; Mrk. 15:24; Luka 23:33; Yoh. 19:18Nyasaye mubuloosiebwe omwene, yali niyarechekha mbu, Yesu yakhahaanwe mumakhono kenywe. Nenyu mwamwira khulwa okhulekha abandu abonooni okhumubamba khumusalaba. 24#Mat. 28:5,6; Mrk. 16:6; Luka 24:5Nebutswa Nyasaye yamulamusia okhurula mukhufwa, namukhola omulekhuule okhurula mubunyali bwokhufwa, shichila shikali akanyalikha mbu, okhufwa khumubohe emakombe tawe. 25#Tsits. 16:8-11Okhuba Daudi yaboola khuye ari,

‘Ndalola Omwami imbeli wanje buli lwosi;

ali khumukhono kwanje omusaatsa, kho shindalahendakhwo tawe.

26Khulweshio, esangaala muno, khandi ndikhoya muno.

Ndalamenya nendi nobunaayi,

27okhuba shiolindekha emakombe ta,

khandi shiolifuchilila isie omukhalabaniwo omusuubilwa okhubolela mung'ani tawe.

28Waakholile isie okhumanya tsinjila tsitsia mubulamu,

ne okhubahokhwo khulikhola isie okhuba nomwikhoyo omukhongo.’

29“Abaana befwe, okhuula emboole ninenywe habulafu khumakhuwa aka kuuka wefwe, omuruchi Daudi. Yafwa ne nayabilwa, ne ing'aniye yishiliho ninefwe okhuula olwa leelo. 30#Tsits. 132:11; 2 Sam. 7:12,13Daudi yali omulakusi, ne yamanya aka Nyasaye yali niyamusuubisia; okhuba Nyasaye yetsuba nasuubisia mbu, alikhola mulala khubolwibulo lwa Daudi okhuba omuruchi shinga Daudi. 31Kho Daudi yaranjilila khale okhulola aka Nyasaye yali natsia okhukhola mana naboola khukokhulamukha khwa Kristo ari,

‘Shiyalekhwa emakombe ta,

khandi omubilikwe shikwabolakhwo tawe.’

32Nyasaye yalamusia Yesu watsana uno okhurula mukhufwa, nefwe fwesi khuli abaloli khukobwatoto buno. 33Yamulamusia, ne namwikhasia khumukhonokwe omusaatsa. Ne Papawe yamuhelesia Roho Omutakatifu shinga olwa yali niyasuubisia. Akamulolanga nende okhuhulila bulano kano, neshihaanwa eshia Yesu akhuhelesiye. 34#Tsits. 110:1Okhuba shiyali Daudi owatikulukha natsia mwikulu ta; habula omwene yaboola ari,

‘OMWAMI Nyasaye yaboolela Omwami wanje mbu,

yikhala hano khumukhono kwanje omusaatsa

35okhuula olwa ndakhare abasukubo boosi hasi webilenjebio.’

36“Kho abandu ba Isiraeli boosi, mumanye toto mbu, Yesu owa mwabamba uno, niye owa Nyasaye akholile okhuba Omwami khandi Kristo!”

37Ne olwa abandu bahulila amakhuwa ako, banyakhana mumioyo chiabwe mana nibareeba Petero nende abarume bashie bari, “Kho abaana befwe, khukhole shiina bulano?”

38Petero nababoolela ari, “Buli shiamulala khwinywe okhuula yekalukhasie okhurula mubwonoonibwe, abatiisibwe muliira lia Yesu Kristo, kho mbu obwonooni bwenywe buleshelwa, mana mulanyoola Roho Omutakatifu ouli eshihaanwa shia Nyasaye. 39Okhuba obusuubisie bwa Nyasaye buno bwasuubisibwa inywe nende abaana benywe nende kata abandu abali ehale, boosi aba OMWAMI Nyasaye wefwe alanga mbu betse khuye.”

40Petero yekhoonyela amakhuwa kandi amanji nabachetsiyia nende okhubatsuuba nababoolela ari, “Mwihonie abeene okhurula khushinyasio eshitsanga khulwibulo olushiamu luno!” 41Kho abo abahulila amakhuwa ka Petero mana nibakasuubila babatiisibwa. Abameetekha khumukanda kwabasuubili khunyanga eyo bali ahambi abandu ebikhumila bitaru (3,000). 42Abandu abo batsiililila okhweka okhurula khubarume, nibamenya halala mubusanjilani khandi nibasanjilana mukhusonyola omukaate nende mumasaayo.

Obulamu bwa buli nyanfa bwabasuubili abo

43Akamakana amanji nende akokhuhuchisia kakholwa nende abarume abo mana buli mundu natiilwa noburi. 44#Ebikh. 4:32-35Abasuubili boosi batsiililila okhuba halala nibali nobusanjilani bwahalala. Khandi bakabananga emiandu chiabwe mulala nowashie. 45Bakusia emiandu chiabwe nende ebindu biabwe, ne nibakabana amapesa okhulondana nende shinga obuha obwa buli shiamulala yali ninabwo. 46Buli nyanga bakhung'anilanga muhekalu, nibalia ebiokhulia biabwe halala mungo tsiabwe. Balitsanga ebiokhulia biabwe ebio mubusangaafu nende mukhwikhoya mumioyo. 47Betsoominjia Nyasaye, nabo abandu boosi nibabetsoomia. Ne buli nyanga, Omwami yameetanga khung'anda yabwe abo abahonibungwa.

Currently Selected:

EBIKHOLE BIA ABARUME 2: OLUPR

Highlight

Copy