Mk. 9

1Nio Yesu achiililila khuloma ali, “Ng'ali muboolela enywe ndi, bali ano balala bakhalifwa tawe, khukhwola babone bubwami bwa Wele ne bwiicha ne kamaani.”

Yesu akaluukhana lukoondo

(Mat. 17.1-13; Lk. 9.28-36)

2 # 2 Pet. 1.17-18 Enyuma we chindaalo sita Yesu abukula Petero, Yakobo ne Yoana, mala bacha khu sikulu sileeyi ba baakho bong'ene. Nga baba ne baloleleele, lukoondo lwa Yesu lwakaluukhana, 3mala chingubo chewe chaba chiwaanga chwe, chiwaanga lukali khaba mbao na mulala mu sibala siosi onyala asiinga choola chirio tawe. 4Babeeka bataru bano babona Elicha ne Musa ne balomaloma ne Yesu. 5Nio Petero aboolela Yesu ali, “Omwami, buli bulayi po efwe khuba ano, khayo khung'oone bisali bitaru, silala sisiowo, sisiindi sia Musa ne sisiindi sia Elicha.” 6Petero se amanya niko alomaloma tawe sikila niye ne babaandi baba ne buuri bukali. 7#Mat. 3.17; Mk. 1.11; Lk. 3.22 Abwenao, lifuumbi liecha mala liabafuunikha mala kumumilo kwaama mwifuumbi ne kuloma kuli, “Yuno ali Omwana wase omusiime khemumurekeeresie!” 8Oli balola lundi, khubonakho omundu okundi tawe nakhali Yesu yeng'ene owaba ne asiili nabo.

9Nga baba ne balikho ne bekha aasi we sikulu Yesu abatanyilila ali, “Mukhaboolelakho omundu niko muboone tawe, khukhwola Omwana wo Mundu nga nalilamukha khukhwama mu bafu.” 10Bafukiilila litanyilila liewe khuboolelakho omundu okundi tawe, ne kakhali barakikha khureebana bong'ene busa bali, “Khulamukha khukhwama mu bafu liboola siina?” 11#Mal. 4.5; Mat. 11.14 Mala bareeba Yesu bali, “Siina babekisi be lilaka lia Musa ne baboolanga bali Elicha akheeche nio?” 12Nio ababoolela ali, “Ng'li Elicha alikho echa khurekekha bibiindu nio. Ne siina sikila kamaandiko ne kaboola kali Omwana wo Mundu alanyaasibwa lukali ne babaandu khu muloba? 13Kakhaba kario, muboolela enywe ndi Elicha echa khale ne kakhali babaandu bamubukula mu ngila niyo babeene benyelamo, nga nilwo kamaandiko kaboola khuloondekhana naye.”

Yesu aonia omusoleeli owaba ne sisieeno

(Mat. 17.14-21; Lk. 9.37-43)

14Nga ne becha bakaanana ne babeeka babaandi babona babaandu bakali ba babotookheleele, lundi babekisia be Lilaka baba bayingana nabo. 15Nga babaandu babona Yesu bauka lukali, batima bacha niio ali mala bamukheesia. 16Nio Yesu areeba babeeka bewe ali, “Mulayingananga khu siina?” 17Omundu mulala khukhwama mu baandu aloma ali, “Omwekisia, ndeerire omwana wase khwiwe sikila ali ne sisieeno lundi se anyala khulomaloma tawe. 18Abeechanga oli simutiila, simumwaata aasi, abiita lifuro, aluma kameno mala aangalala busa. Mboleele babeeka bowo ndi basirusie, ne kakhali se banyalile tawe.”

19Yesu ababoolela ali, “Muli babaandu mukhasuubila tawe! Ndaba nanywe khu siise siina? Ndamwikhaliilikha enywe khu siise siina? Reera ano omusoleeli chana.” 20Bamureerera.

Nga sisieeno siabona Yesu, siapa aasi omusoleeli chana, ekalangasia aasi nabiita lifuro. 21Nga Yesu abona ario areeba raraawe ali, “Abeele ari khukhwama khu siise siina?”

Raraawe akobosia ali, “Khukhwama bwana. 22Khu makhabi kamakali sisieeno siakhakile khumwiira mu ngila eye khumumwaata mu mulilo ne mu meechi, aaba ne onyala khukholele siisa mala okhuyeete!” 23Yesu amukobosia ali, “Waaba wamwene ne onyala! Buli siindu sinyalikhana khuyo oli ne lisuubila.” 24Ao ne nao, raraawe owo mwana omulwale eloocha ali, “Nasuubiile, ne kakhali njeete mbe ne lisuubila likali!”

25Yesu abona ali babaandu bakali balikho bamwesendao, mala arafuira sisieeno esio ali, “Ewe sisieeno sie bumiinyi ne sie khuanda lulimi khulakiilisia ndi, rura mu musoleeli yuno mala okhamukobolamo lundi tawe!” 26Sisieeno siapa lulwang'a siapa aasi omwana mala siamururamo. Omusoleeli yuno abonekha nga ofwiile, buli mundu aloma ali, “Yuno afwiile!” 27Yesu amutiila kumukhono amuyeeta khukhwinyokha mala omusoleeli oyo eema.

28Nga Yesu aba yeng'ene munju, babeeka bewe bamureeba mu bwikisi bali, “Siina sikila efwe ne khukhanyalile khurusia sisieeno esio?” 29Yesu akobosia ali, “Sisieeno lukano luno, sirusibwao ne lisaba liong'ene mbao sisiindi siosi siosi sinyala siasirusia tawe.”

Yesu alomaloma lundi khuloondekhana ne lifwa liewe

(Mat. 17.22-23; Lk. 9.43-45)

30Yesu ne babeeka bewe barura ao babira mu Kalilaya. Se enya omundu amanye niio aaba tawe, 31sikila aba alikho ekisia babeeka bewe ne ababoolela ali, “Omwana wo Mundu aliaanwa mu makhono ke babaandu, mala bamwire. Enyuma we chindaalo chitaru namalile khufwa, alilamukha.” 32Ne kakhali se bamanya niko aloma tawe. Mala baba ne buuri khumureeba.

Naanu omukali khukhila boosi?

(Mat. 18.1-5; Lk. 9.46-48)

33Boola Kaperinaumu, oli bacha munju Yesu areeba babeeka bewe ali, “Muyinganenge siina khu ngila?” 34#Lk. 22.24 Se bamukobosia tawe, sikila khu ngila bayingananga bali naanu ooli omukali mu nibo babeene. 35#Mat. 20.26-27; 23.11; Mk. 10.43-44; Lk. 22.26 Yesu ekhala aasi mala alaanga babeeka bewe ekhumi na babili ababoolela ali, “Owenya khuba omurangisi khukhwola abe omumaliilisi khu boosi lundi omukholi owa boosi.” 36Mala abukula omwana abwenao amwimisia ebweeni wabwe, amutiila mumaa mala ababoolela ali, 37#Mat. 10.40; Lk. 10.16; Yn. 13.20 “Yesi yesi owakaanila omwana nga yuno ari mu lisina liase, aba anjakaanile ese. Ne oyo ounjakaanila ese se anjakaanila ese tawe ne kakhali oyo akaanila owanduma.”

Oyo okhakhwenyela efwe kamabi tawe aba ali owefwe

(Lk. 9.49-50)

38Yoana aboolela Yesu ali, “Omwekisia khwaboone omundu arusia bisieeno mu khurumikhira lisina liowo mala khwamukaania, sikila se abechanga nafwe tawe.” 39Ne kakhali Yesu abakobosia ali, “Mukhamukaania tawe, se aliio onyala akhola kamayia mu lisina liase mala mu siise sitiiti akeleo alomaloma kamamayaanu khwise tawe. 40#Mat. 12.30; Lk. 11.23 Khwako okhakhwenyela efwe kamabi tawe aba ali owefwe. 41#Mat. 10.42 Yesi yesi omuelesia kameechi mu sikoombe munywe sikila muli babaase, ng'ali salatibia kumuruuru kwewe tawe.

Kamakhako

(Mat. 18.6-9; Lk. 17.1-2)

42“Yesi yesi okila mulala khu batiiti bano atibie lisuubila liewe mwise, bwakhabeele bulayi omwene oyo bamuboe lususi luboofu mwikosi mala bamumwaate mu nyanja. 43#Mat. 5.30 Khwako kumukhono kwowo kwaaba ne kukhukhola otibie lisuubila liowo, kureme kururekho. Buli bulayi khucha mu bulamu ne kumukhono mulala khukhila khuba nakio kiombi mala oche mu mulilo kukhasima tawe. [ 44Ebweeneyo chinyeende chibalia se chifwichanga tawe, lundi kumulilo kuboosia se kusimaanga tawe.]#9.44 Chibibilia chindala se chili ne lunyilili luno tawe. 45Ne sikele siowo siaba ne sikhukhola okwe mu bwoni sireme. Buli bulayi khucha mu bulamu ne sikele silala khukhila khucha mu mulilo ne bikele bioombi. [ 46Ebweeneyo chinyeende chibalia se chifwichanga tawe lundi kumulilo kuboosia se kusimaanga tawe.]#9.46 Chibibilia chindala se chili ne lunyilili luno tawe. 47#Mat. 5.29 Ne emoni yowo yaaba ne khuyila mu bwoni kitomolemo, buli bulayi khucha mu Bwami bwa Wele ne moni ndala khukhila khuba nacho chombi mala oche mu mulilo. 48#Isa. 66.24 Ebweeneyo chinyeende chibalia se chifwichanga tawe, lundi kumulilo kuboosia se kusimaanga tawe!

49“Buli sia mulala alikwalaasibwa ne kumulilo nga chinyama che embosio chikwalaasibwa ne kmuunyu kumukhelekha.

50 # Mat. 5.13; Lk. 14.34-35 “Kumuunyu kumukhelekha kumulayi ne yaaba ne kuwelemo bululu, okhola oriena nio kwaba kumululu lundi? Ba ne kumuunyu kumukhelekha kwe busaale khu mwabeene ne mwabeene, lundi menya mu muleembe na buli sia mulala.”

Currently Selected:

Mk. 9: LUBUKUSU

Highlight

Copy