Mk. 10

Yesu ekisia khuloondekhana ne khulekhana

(Mat. 19.1-12; Lk. 16.18)

1Nio Yesu arura ao arekukha acha mu lukoongo lwe Buyuda, mala ambukha luluuchi lwa Yoritani. Babaandu bacha niio aba mala abekisia nga abekisianga buli lwosi.

2Bafarisayo bacha niio aba ne bakhaka khu mukhaka ne bamureeba bali, “Khuboolele, lilaka liefwe lifukiilila omundu khulekhana no mukhasi wewe namwe tawe?”

3Yesu abakobosia ne lireeba ali, “Lilaka siina nilio Musa amuelesia enywe?” 4#Likh. 24.1-4; Mat. 5.31 Bakobosia bali, “Musa afukiilila ali, omundu anyala aandikila omukhasi wewe ebarwa eye khulekhana mala amuoone.”

5Yesu ababoolela ali, “Musa amuandikila lilaka lino ario sikila muli balume emirwe, 6#Lir. 1.27; 5.2 ne kakhali khukhwama mu lirakikha lie libaang'ana, ‘Wele abuumba owe siseecha nende owe siikhasi nga nilwo liiandiko liloma.’ 7#Lir. 2.24 ‘Ne sikila kano omundu alalekha raraawe ne maawe mala aambaane no mukhasi wewe, 8mala boombi babe mulala’ khwako se bali lundi babili tawe, ne kakhali mulala. 9Nisio Wele aambaasiisie omundu yesi yesi akhasiabukhasia tawe.”

10Oli bakobola munju, babeeka bareeba Yesu kamakhuwa kano. 11#Mat. 5.32; 1 Bakor. 7.10-11 Ababoolela ali, “Omundu olekhana no mukhasi wewe mala areere okundi omwenoyo aba akholela omukhasi wewe kamabi mu khukhola bueeyi. 12Mu ngila ng'eneyo, omukhasi olekhana no museecha wewe mala ache khu mundu okundi akhola bueeyi.”

Yesu aelesia babaana bakeekhe chikhabi

(Mat. 19.13-15; Lk. 18.15-17)

13Babaandu balala bareera babaana khu Yesu bali abarekho kamakhono, mala babeeka bewe nabo babarafwira. 14Nga Yesu abona ario aambwa lirima, aboolela babeeka bewe ali, “Lekha babaana beche niio ndi, mukhabakhiingilila tawe, sikila Bubwami bwa Wele buli bwe babaandu nga bano bari. 15#Mat. 18.3 Ng'ali ese muboolela enywe ndi yesi yesi okhakaanila bubwami bwa Wele nga omwana tawe, se alibwingilamo tawe.” 16Nio abukula babaana aara kumukhono khu buli mulala abaelesia chikhabi.

Omuyiinda

(Mat. 19.16-30; Lk. 18.18-30)

17Nga Yesu aaba ne arakikha lukeendo lwewe lundi, omundu atima echa asikama ebweeni wewe, amureeba ali, “Omwekisia omulayi, khola ndiena nio nyoole bulamu bwa mindali?” 18Nio Yesu amureeba ali, “Siina sikila ne unaanga oli omulayi? Mbao omulayi tawe ne akhali Wele yeng'ene. 19#Khur. 20.12-16; Likh. 5.16-20 Wamanya kamalaka: ‘Okheera tawe, okhakhola bueeyi tawe, okheeba tawe, okhakikhila omundu tawe, okhabea tawe, ria raraao ne maao.’ ” 20Omundu oyo aakobosia ali, “Omwekisia, khukhwama bwana naria kamalaka kano koosi.”

21Yesu aamuloleelela mala aamusiima aamuboolela ali, “Wataambile sisiindu silala, cha okusie bibiindu bioosi nibio oli nabio mala oeleesie bataambi chirupia ne olaba ne buiinda mwikulu, nio wiche unondekho.” 22Nga oyo aaulila ario, aabeelela mala aarekukha aacha ne asulunye sikila aaba omuiinda lukali.

23Yesu aaloleelela babeeka bewe mala aaloma ali, “Bukhabe bulume lukali khu baandu baiinda khukhwingila mu bwami bwa Wele!” 24Nio babeeka bewe besiindukhila khu makhuwa kano, ne kakhali Yesu aachiililila khubaboolela ali, “Baana baase, buli bulume lukali khukhwingila mu Bwami bwa Wele! 25Lili liliangu khu ngamia khubirira mu mwanya kwe sindani, khukhila omuiinda khukhwingila mu Bwami bwa Wele.” 26Khu kano babeeka bewe bauka lukali mala bareebana bali, “Nono, aba naanu onyala aaonisibwa?” 27Nio Yesu aabaloleelela mala aabakobosia ali, “Kano se kanyalikhana khu baandu tawe, ne kakhali khu Wele mbao sikhanyalikhana tawe, buli siindu sinyalikhana khu Wele.”

28Petero aakobosia ne aloma ali, “Lola efwe khwalekha buli siindu mala khwakhuloonda.” 29Nio Yesu aabakobosia ali, “Yee kali ng'ali, muboolela ndi yesi yesi oolekha mungo mwewe namwe bawandaaye, namwe maawe, namwe raraawe, namwe babaana, namwe kumukuunda sikila ese ne Lomo Endayi, 30acha khunyoola bikali mu bulamu buno. Alanyoola khukhwola emia, chinju, bawandaaye, bamaawe, babaana, kimikuunda ne khu khupisibwa siibi khwosi, ne chindaalo chichiichayo alinyoola bulamu bwa mindali. 31#Mat. 20.16; Lk. 13.30 Bakali baaliba be khunyoa, baliba bamaliilisi, ne baliba bamaliilisi baliba, be khunyoa.”

Yesu alomaloma lukhola khataru khu lifwa liewe

(Mat. 20.17-19; Lk. 18.31-34)

32Yesu ne babeeka bewe baba bali khu ngila bacha Yerusalemu. Yesu aba arangiire ne babeeka bewe ba baaba ne liliesiindukha baba bamuloondilekho, ne babaandu babaandi ba baloondakho baba ne buuri. Abwenao lundi Yesu alaanga babeeka bewe alubeka ababoolela bibiindu bilikho biicha khumwekholekhakho. 33Ababoolela ali, “Rekeeresia, khulikho khucha e Yerusalemu niio Omwana wo Mundu acha khuanwa khu basaayi bakhulu ne baandiki. Balamukhalakila lifwa mala bamuaane khu Be Chikholo, 34bacha khu muchekheelela, bamufuchekho kamare, bamunyweekhe kimikhomwa mala bamwire, ne enyuma we chindaalo chitaru akhalamukhe.”

Lisaba lia Yakobo ne Yoana

(Mat. 20.20-28)

35Yakobo ne Yoana babaana ba Sebetayo becha khu Yesu bamuboolela bali, “Omwekisia, khuli nende nilio khwenya okhuyeete.” 36Yesu abareeba ali, “Siina nisio?” 37Bamukobosia bali, “Endaalo niyo oliikhalila khu ndebe yowo eye bubwami eye luyali, khwenya fwesi khwikhale ne nawe, mulala ekhale kumukhono kwowo kumuseecha ne okundi kumukhasi.” 38#Lk. 12.50 Ne kakhali Yesu ababoolela ali, “Se mwamanyile nisio mulikho musaba tawe, munyala mwanywela mu sikoombe sie sinyaasio nisio khukhwola nywelemo ku? Munyala mwabatiisibwa mu ngila niyo ese nja khubatiisibilwamo ku?”

39Bamukobosia bali, “Yee khunyala.” Nio Yesu ababoolela ali, “Ng'ali mukhanywele mu sikoombe nisio nja khunywelamo ne khubatiisibwa mu ngila niyo nja khubatiisibwamo. 40Ne kakhali se ndi ne bunyali bwe khurobora naanu ocha khukhwikhala kumukhono kumuseecha namwe kumukhasi tawe. Ali Wele niye ocha khuaana bubweyaangu buno khwaabo nibo aarekekhera.”

41Nga babeeka babaandi ekhumi baulila, baambila Yakobo ne Yoana lirima. 42#Lk. 22.25-26 Nio Yesu abalaanga boosi alala ababoolela ali, “Mumanyile muli abo balaangwa babaami be babaandu Be Chikholo, bali ne bunyali khu baandu, lundi babemeelesi bali ne bunyali bwoosi. 43#Mat. 23.11; Mk. 9.35; Lk. 22.26 Ne kakhali kano se kali niko kaali mwinywe tawe, mulala khwinywe aaba ne enya abe omukali, khukhwola abe omukholi owa boosi, 44mulala khwinywe aaba ne enya abe owe khunyoa khukhwola abe nasioobi owa boosi. 45Sikila akhaba Omwana wo Mundu se echa nio bamukholele tawe, ne kakhali echa khukholela babaandu mala aane bulamu bwewe bube embosio khulwe babaandu bakali.”

Yesu aonia omubofu Batimayo

(Mat. 20.29-34; Lk. 18.35-43)

46Boola Yeriko, mala nga nilwo Yesu aaba ne arekukha ne babeeka bewe alala ne babaandu bakali, omubofu owasabanga buyeeti niye balaanga bali Batimayo omwana owa Timayo aba ekhaale khu ndulo khwe ngila. 47Nga ne aulila ali Yesu owe Nasareti niye olikho obira, arakikha khulaanga lukali ali, “Yesu Mwana owa Daudi, kholele siisa.”

48Babaandu bakali bamurafuira ne bamuboolela khusila, naye achiililila khulaanga lukali po ali, “Mwana owa Daudi, kholele siisa.”

49Yesu eema aloma ali, “Muboolele eche” Nio, baboolela omubofu chana bali, “Sangaala, alikho akhulaanga!” 50Nio amwaata eyo engubo yewe, asuna angaaki echa niio Yesu ali.

51Yesu amureeba ali, “Wenya khukholele siina?” Omubofu aloma ali, “Omwekisia, nenya mbone lundi.”

52Yesu amuboolela ali, “Khoche, lisuubila liowo liakhuoniisie.” Ao ne nao, abona mala aloonda khu Yesu khu ngila okhwo.

Currently Selected:

Mk. 10: LUBUKUSU

Highlight

Copy