Mk. 11

Khukhwingila mu Yerusalemu ne bikalakala ne lutiri

(Mat. 21.1-11; Lk. 19.28-40; Yn. 12.12-19)

1Nga baba ne becha Yerusalemu embi ne lukoba lwa Betifake ne Betania, boola khu sikulu sia Miseituni. Yesu aruma babeeka bewe babili ebweeni 2ne kamalaka kano, “Cha mu sirekere siili ebweeni esio, nga mwolamo kane munyoole baboyile epunda eng'ana niyo bakhatimilakho tawe, kikangulule mala munderere. 3Omundu yesi yesi aaba ne amureeba sikila ne mukikangulula, muboolele muli Omwami akienya mala alakikobosia khangu.”

4Nio bacha banyoola epunda yino khu ngila bakiboyile a muliango. Nga yaba ne bakikangulula, 5ba baaba ne bemileo bareeba bali, “Siina sikila ne mulikho mukangulula epunda yino?” 6Nio bakobosia busa nga Yesu aba ne ababooleele, mala abo bafukiilila babeeka khucha nayo. 7Bareera epunda niio Yesu ali, bamwaata chingubo chabwe khu mukoongo kwayo, mala Yesu akiikhalakho. 8Babaandu bakali baala chingubo chabwe khu ngila ne babaandi bafuna chisakia che kamasaafu bachisalanisia khu ngila. 9#Chiny. 118.25-26 Babaandu ba baaba ebweeni ne nyuma barakikha khuyokela bali, “Hosana, ali ne chikhabi owicha mwisina lio Mwami. 10Wele aane chikhabi khu Bwami bubwiicha bwa Paapa wefwe omwami Daudi, Hosana khuyo oli angaaki! Omwami afume!”

11Yesu engila mu Yerusalemu, acha mu Lukaangu alola buli siindu sisiabamo. Sikila bwaba bwelabuule, arura acha mu lukoba lwa Betania ne babeeka bewe ekhumi na babili.

Yesu alaama kumutuli

(Mat. 21.18-19)

12Endaalo ekhola khabili Yesu aba ne njala nga baba ne baama e Betania. 13Abona kumutuli sinaao kwechuule kamasaafu, acha alolakho ne kulikho chinduli, ne nga ola siimbi anyoola kamasaafu kong'ene. Sikila se siaba siise sie khukhwaama tawe. 14Yesu aboolela kumutuli okwo ali, “Se aliio yesi yesi olilia enduli khukhwama khwiwe lundi tawe!” Babeeka bewe baulila naloma ario.

Yesu engila mu Lukaangu

(Mat. 21.12-17; Lk. 19.45-48; Yn. 2.13-22)

15Nga boola mu Yerusalemu, Yesu engila mu Lukaangu mala atimania boosi ba baaba ne bakula lundi ne bakusia. Afumalikha chimeesa che baboofuli be chirupia ne chindebe chaabo ba baaba ne bakusia kamauusi, 16mala khwenya omundu yesi yesi asute siosi siosi a luuya we Lukaangu tawe. 17#Isa. 56.7; Yer. 7.11 Nio ekisia babaandu ali, “Se liaandikwa lili, ‘Enju yase elilaangwa enju eye lisaba khu baandu Be Chikholo choosi’ tawe ku? Ne kakhali enywe mwakikholile libina lie banuuli!”

18Basaayi bakhulu ne baandiki nga baulila kano barakikha khuyiima chingila che khukhwira Yesu. Baba ne buuri khu niye sikila babaandu boosi bauka lukali khulwe liliekisia liewe. 19Oli bwelabula Yesu ne babeeka bewe barura mu lukoba.

Liliekisia khukhwama khu mutuli

(Mat. 21.20-22)

20Nga ne babirao kumutikhinyi, babona kumutuli okwo kwomile ne chiisi chosi. 21Petero akhebulila kakekholekhana mala aboolela Yesu ali, “Omwami, lola! Kumutuli nikwo walaamile kwomile.”

22Yesu aabakobosia ali, “Ba ne lisuubila mu Wele. 23#Mat. 17.20; 1 Bakor. 13.2 Musuubisia ndi yesi yesi oboolela sikulu sino khusiuukha siche mu nyanja mala se ali ne liaayaaya mu mwoyo kwewe tawe, ne kakhali asuubile ali nilio alomaloma licha khwekholekha, lilienelio acha khukholelwa. 24Khwako muboolela enywe ndi, ne osaba sisiindu mwisaba, suubila oli wasinyoolile lundi olaebwa nisio osabile. 25#Mat. 6.14-15 Lundi nga nilwo wima ne osaba, beela omundu yesi yesi khu siindu siosi siosi, nio Raraawenywe ooli mwikulu amubeele bubwoni bwenywe. [ 26Ne mwaba ne mukhabeela babaandi tawe, aakhaba Raraawenywe ooli mwikulu yesi se alamubeela bubwoni bwenywe tawe.”] #11.26 Chibibilia chindala se chili ne lunyilili luno tawe.

Lireeba khu bunyali bwa Yesu

(Mat. 21.23-27; Lk. 20.1-8)

27Lundi boola mu Yerusalemu, nga Yesu aba ne akeenda mu Lukaangu, basaayi bakhulu, baandiki ne babemeelesi bamwichakho 28bamureeba bali, “Bunyali siina nibwo oli nabwo khukhola bibiindu bino? Naanu owakhuelesia bunyali buno?”

29Nio Yesu abakobosia ali, “Ndamureeba busa lireeba lilala, ne mwaba ne mungobosia ndamuboolela bunyali siina nibwo ndi nabwo bwe khukhola bibiindu bino. 30Mboolele, Yoana anyoola waena bunyali bwe khubatiisia, bwaama khu Wele namwe khu mundu?”

31Barakikha khuyingana babeene ne babeene bareebana bali, “Khulaloma khuli siina? Ne khuloma khuli, ‘Bwaama khu Wele,’ alaloma ali, ‘Siina sikila ne mukhaamusuubila niye tawe?’ 32Ne kakhali khunyala khwaloma khuli, ‘Khukhwama khu mundu’ ku?” (Baba ne buuri khu baandu, sikila buli mulala aamanya ali Yoana aaba omung'oosi.) 33Khwako likobosia liabwe khu Yesu liaba lili, “Se khumanya tawe.”

Yesu aabakobosia ali, “Aakhaba ese seesi se muboolela ndi na bunyali siina khukhola bibiindu bino tawe!”

Currently Selected:

Mk. 11: LUBUKUSU

Highlight

Copy