Mk. 5

Yesu aonia omundu we bisieeno

(Mat. 8.28-34; Lk. 8.26-39)

1Yesu ne babeeka bewe boola engelekha khu nyanja eya Kalilaya, mu sibala sie Bakerasi. 2Nga Yesu narura mu liaaro, akaanana ne omundu owaba namenyile mu biliindwa, omundu yuno aaba ne sisieeno 3mala aba amenya mu biliindwa. Se abao bele onyala amuboa khu minyololo tawe. 4Kamakhabi kamakali bamuboanga bikele ne kamakhono, ne buli siise akitulanga kiminyololo kie khu makhono ne bikele. Aba ne kamaani kamakali lukali beele se aliio omunyala tawe. 5Siilo ne kumuusi akeendanga mu biliindwa ne mu bikulu, ne apa lulwang'a ne khukhwikhalakaka ne kamabaale.

6Nga ne abona Yesu ne asiili sinaao, atima mala amusaaya, 7mala apa lulwang'a mu mumilo kwe angaaki ali, “Yesu Omwana owa Wele owe Angaaki Lukali! Wenya orie khwise? Khu siisa sia Wele khusaba ndi, okhambukuuma tawe.” 8(Aaloma ario sikila Yesu aba alikho aloma ali “Sisieeno rura mu mundu yuno.”) 9Yesu amureeba ali, “Ewe bali naanu?” Amukobosia ali, “Lisina liase bali ‘Lechoni’ sikila khuli bakali.” 10Abelelela khu saba Yesu ali akharusia bisieeno mu sibala esio tawe. 11Liabao lituuli lie chingurwe liaba a sikulu liaaya. 12Nio bisieeno biasaba Yesu bili, “Khulekhe khuche mungurwe echo.” 13Nio biarura mu mundu oyo, abilekha biacha mungurwe. Lituuli lie chingurwe liaba liola embi chielefu chibili, liatirimukha liaweela mu nyanja mala liafwilamo.

14Babaayi ba baaba ne baaya belukha, basalanisia kamakhuwa mu lukoba ne mu sirekere mwoosi. Babaandu bacha balola kakekholeekhe, 15ne nga bacha niio Yesu ali babona omundu niye bisieeno biabamo ekhaale ao, efwarire chingubo lundi ali ne kamakesi kamalayi, mala buli mundu auka. 16Abo ba babona kakekholeekhe baboolela babaandi ko mundu oyo ne chingurwe. 17Khwako baboolela Yesu arure mu sibala siabwe.

18Nga nilwo Yesu aba ne engila mu liaaro, omundu owaba ne bisieeno amusaaya ali, “Nosiima khuche fwembi!” 19Ne kakhali Yesu se afukiilila ache naye tawe. Amuboolela ali, “Kobola engo wenywe mala oboolele balebe bowo niko Omwami akhukholeele lundi nga ali ne siisa khwiwe.” 20Nio omundu oyo acha mu Tekapoli, aboolela babaandu niko Yesu amukholeele, ne boosi ba baulila bauka.

Omukhaana owa Yairo no mukhasi owatiila khu ngubo eya Yesu

(Mat. 9.18-26; Lk. 8.40-56)

21Yesu akobola engelekha we nyanja mala babaandu bakali becha niio aaba khu sikiingi. 22Yairo mulala khu bemeelesi be sinakooki oola, nga ne abona Yesu, asikama ebweeni wewe. 23Amusaba mu bung'ali ali, “Omwana wase omukhaana ali omulwale po, nosiima yiicha mala omurekho kamakhono, nio aone.” 24Nio Yesu acha ne Yairo, babaandu bakali bamuloondakho.

25Abao omukhasi mulala owaba ne ekibeeno khu miiko ekhumi na kibili. 26Akhaba ne asilikhwa ne basilikhi bakali, ne khurumikhira chirupia chewe choosi, se aona tawe, ne kakhali bulwaale bwachiililila khutasa. 27Aba auliile kamakhuwa ka Yesu, mala echela emukoongo wa Yesu mu lutiri olwo, 28ne ebaasia ali, “Natiila busa khu ngubo yewe, ndaona.”

29Atiila khu ngubo eya Yesu mala abwene ne abwene ekibeeno yakama. Mala eulila ali ng'ali aonile. 30Abwene ne abwene Yesu amanya ali kamaani kamwamilemo, mala ekhebukha areeba ali, “Naanu otiilile khu ngubo yase?” 31Babeeka bewe bamukobosia bali, “Se waboone babaandu nga bakhilile, siina sikila ne oreeba oli naanu okhutililekho?”

32Yesu achiililila khulola eyi ne neyi khukhwenya khubona naanu omutiililekho. 33Omukhasi oyo amanya kamwikholekhekho mala echa naterema mu buri, asikama ebweeni wa Yesu, mala amuboolela bung'ali bwoosi. 34Yesu amuboolela ali, “Mukhaana wase, lisuubila liowo liakhuoniisie, cha mumuleembe, mala oone bulwaale bwowo.”

35Nga Yesu aba ne asilomaloma ario barumwa balala khukhwama munju eya Yairo becha bamuboolela bali, “Omukhaana wowo afwiile onaanisilia siina omwekisia?” 36Yesu se abukulamo lukeendo mu makhuwa kabwe tawe. Ne kakhali aboolela Yairo ali, “Okharia tawe, suubila busa.” 37Se afukiilila omundu okundi khucha naye tawe, ne kakhali Petero, Yakobo ne wandaaye Yoana. 38Boola anju owa Yairo nio Yesu aulila bililo bikali lundi abona likoyaana, 39Engila munju ababoolela ali, “Likoyaana lino lioosi lia siina? Mulalilanga siina? Omukhaana yuno se afwiile tawe ne kakhali alikho akona!” 40Mala babaandu bamuchekha, naye abarusia munju, abukula maawe ne raraawe bo mwana ne babeeka bewe bataru, bacha mu lusiro nimwo omwana chana aba ne akonile. 41Amutiila kumukhono amuboolela ali, “Talita kumi,” liboola lili, “Mukhaanawe yinyokha!” 42Ne mala abwene ne abwene enyokha akeenda (aba kimiiko ekhumi na kibili). Nga kano kekholekha, boosi barangararwa lukali, 43Yesu abatanyilila lukali ali bakhaboolelakho omundu okundi tawe, mala aboola ali, “Muelesiekho siindu alie.”

Currently Selected:

Mk. 5: LUBUKUSU

Highlight

Copy