Mat. 5

Kamelwacho khu sikulu

1Nga Yesu abona babaandu bakali, aniina khu sikulu, oli ekhaale babeeka bewe beecha niio ali. 2Arakikha khubekisia ali,

Busangaafu bwa ng'ali

(Lk. 6.20-23)

3“Baali ne kumutaambo kwe mu roho bali ne chikhabi,

Sikila bubwami bwe mwikulu buli bubwabwe.

4 # Isa. 61.2 “Baalila bali ne chikhabi,

sikila Wele akhabaoleelesie.

5 # Chiny. 37.11 “Babeboombia bali ne chikhabi,

sikila bakhaebwe sibala nisio Wele aabasuubisia.

6 # Isa. 55.1-2 “Baali ne njala ne bulesia bwe khuuba baluungi bali ne chikhabi,

sikila Wele akhabekusie.

7“Baali ne siisa bali ne chikhabi,

sikila Wele akhabakholele siisa.

8 # Chiny. 24.3-4 “Baali ne kimiooyo kimikwalaafu bali ne chikhabi,

sikila bakhabone Wele.

9“Bareera kumuleembe bali ne chikhabi,

Sikila bakhalaangwe babaana ba Wele.

10 # 1 Pet. 3.14 “Ba bapisibwa siibi khulwe buluungi bali ne chikhabi,

sikila bubwami bwe mwikulu buli bubwabwe.

11 # 1 Pet. 4.14 “Babaandu ne bamukhoma ne khumupia enywe siibi ne khumukiikha enywe mu ngila choosi sikila ese, muli ne chikhabi. 12#2 Ke Ch. 36.16; Bikh. 7.52 Yekhoya mala musangaale lukali sikila kumuruuru kwenywe kuuli mwikulu kuli kumuboofu, sikila baapia bang'oosi be khaale siibi bario.

Kumuunyu kumukhelekha ne buwaanga

(Mk. 9.50; Lk. 14.34-35)

13 # Mk. 9.50; Lk. 14.34-35 “Enywe muli kumuunyu kumukhelekha kwe sibala, ne kakhali kumuunyu kumukhelekha ne kuwamo bululu bwakwo, kunyala kwaba kumuunyu kumukhelekha lundi ku? Se kung'aayila mu siindu siosi siosi tawe, ne kakhali kufumulwa khwibuumbi ne khuswalakililwa ne babaandu.

14 # Yn. 8.12; 9.5 “Enywe muli buwaanga bwe mu sibala. Lukoba lulwombakhwa khu sikulu se lunyala lwakiswa tawe. 15#Mk. 4.21; Lk. 8.16; 11.33 Namwe omundu se aambia etaa mala akifunikhila mu sikono tawe, ne kakhali, akira khu siteetwe ekhoselie baali munju boosi. 16#1 Pet. 2.12 Mu ngila ng'ene eyo lekha buwaanga bwenywe bukhosie ebweeni we babaandu, nio babone bikholwa bienywe bilayi, mala baelesie luyali Raraawenywe oli mwikulu.

Kamekisio khu Lilaka

17“Mukhebaasia muli ese neecha khurusiao Lilaka lia Musa ne kamekisio ke bang'oosi tawe, se nechile khurusiao tawe, ne kakhali nechile kechusibwe. 18#Lk. 16.17 Ng'ali muboolela enywe ndi, nabwila likulu ne liloba biliwao enyukuta namwe khatonyi khakeekhe khe Lilaka se khalirurakho tawe, khukhwola koosi kekholekhe. 19Nono yesi yesi olifuna lilalakho khu malaka kaali kamakeekhe khu kano ne khukhwekisia babaandi khukhola bario, alilaangwa omukeekhe mu bwami bwe mwikulu. Ne kakhali oyo okatiila mala ekisie babaandi khukhola khurio, alilaangwa omukali mu bwami bwe mwikulu. 20Ese muboolela enywe ndi, buluungi bwenywe ne bukhakhila bwe baandiki ne Bafarisayo tawe, se mulingila mu bwami bwe mwikulu tawe.

Kamekisio khu lirima

(Lk. 12.57-59)

21 # Khur. 20.13; Likh. 5.17 “Mwaulila niko babaandu baboolelwa khaale bali, ‘Okhachukha sifuki tawe, ne yesi yesi ochukha sifuki olaana khukhalakilwa.’ 22Ne ese muboolela enywe ndi yesi yesi oba ne lirima khu wandaaye olaana khukhalakilwa, yesi yesi okhoma wandaaye akhayaalwe, ne oboolela wandaaye ali, ‘Musilu ewe’ olaana khucha mu mulilo kwa mindali na mindali. 23Kaaba bali olikho oana siianwa siowo khu alutare mala okhebulile oli wandaayo ali ne bulomani nawe, 24lekha siianwa siowo ebweeni wa alutare mala oche khangu obelanile ne wandaayo, nio wiche orusie siianwa siowo khu Wele.

25“Beelanila khangu nende niye mulomana naye, ne mukhoola mu koti tawe. Okhulomania akhola ario akhura mu makhono ko mukhalaki, ne omukhalaki naye khu muliindi, mala bakhuila mu siboe. 26Ese khuboolela bung'ali, se olirura enje nosiili khuruunga esimiri emaliilisi tawe.

Kamekisio khu bukhobani

27 # Khur. 20.14; Likh. 5.18 “Mwaulila kakaboolwa bali, ‘Okhakhola bueeyi tawe.’ 28Ne kakhali ese muboolela enywe ndi buli mundu yesi yesi olalola owe siikhasi ne moni eye khumwekoomba, aba amalile khukhola bueeyi naye mu mwoyo kwewe. 29#Mat. 18.9; Mk. 9.47 Nono kaba bali emoni eseecha ekila wakhola bubwoni, kitomole mala okimwaate eyo! Buli bulayi ewe khutibia siindu silala khu mubili kwowo khukhila kumubili kwowo kwoosi ne kumwaatwa mu mulilo emakoombe. 30#Mat. 18.8; Mk. 9.43 Lundi kaba bali kumukhono kwowo kumuseecha kukila wakhola bubwoni, kukhale mala okumwaate eyo! Buli bulayi ewe khutibia siindu silala khu mubili kwowo khukhila kumubili kwowo kwoosi ne kumwaatwa mu mulilo emakoombe.

Kamekisio khuloondekhana khulekhana no mukhasi

(Mat. 19.9; Mk. 10.11-12; Lk. 16.18)

31 # Likh. 24.1-4; Mat. 19.7; Mk. 10.4 “Lundi kaboolwa bali, ‘Yesi yesi olekhana no mukhasi wewe, amuelesie ebarwa eye khulekhana.’ 32#Mat. 19.9; Mk. 10.11-12; Lk. 16.18; 1 Bakor. 7.10-11 Ne ese muboolela enywe ndi, buli mundu olekha omukhasi wewe, ne kakhali khu sifuno sie bueeyi, amukhola khuba omueeyi, lundi omundu yesi yesi oyila omukhasi niye balekha akhola bueeyi.

Kamekisio khu liechuba

33 # Bal. 19.12; Khub. 30.2; Likh. 23.21 “Lundi mwaulila kakaboolwa khu baandu khaale bali, ‘Okhechubakho mu bubeeyi tawe, ne kakhali okholeele Omwami niko wechubile.’ 34#Yak. 5.12; Isa. 66.1; Mat. 23.22 Ne ese muboolela enywe ndi, okhechubakho ne atiiti ene tawe, akhaba khuloondekhana ne likulu, sikila nilio lili endebe eya Wele eye bubwami, 35#Isa. 66.1; Chiny. 48.2 namwe khu sibala, sikila nisio sili endebe eye bikele biewe, namwe khu Yerusalemu, sikila nilwo lukoba lwo Mwami omukali. 36Lundi okhasuta kumukhono mu khwechuba tawe, sikila sonyala wakhola kumurwe kwamela chimbuchi namwe lichuune limali tawe. 37Lekha nilio oloma libe ‘Yee’ namwe ‘Tawe’, sisiindu siosi siosi sikhila ao, siaama khu Musiku.

Khuruungisia kamabi khu mabi

(Lk. 6.29-30)

38 # Khur. 21.24; Bal. 24.20; Likh. 19.21 “Mwaulila nga kaboolwa bali, ‘Emoni khu moni, ne liliino khu liino.’ 39Ne ese muboolela enywe ndi: mukharuungisia kamabi khu mabi tawe. Ne kakhali yesi yesi okhuupa luui ewe khu lusaaya luseecha, muyusilie luluundi lwosi. 40Lundi yesi yesi ne akhusitaka ali akhubukule lisiati liowo mulekhele ne likooti liosi. 41Lundi yesi yesi okhuyingiilila khumusutila sisutwa emaili ndala, musutile kamaili kabili. 42Okhusaba muelesie, ne okhemana owenya khukhwekopa tawe.

Busiime khu basiku

(Lk. 6.27-28,32-36)

43 # Bal. 19.18 “Mwaulila ne kaboolwa bali, ‘Siima basaale bowo mala obiile basiku bowo.’ 44Ne kakhali ese muboolela enywe ndi, siima basiku benywe, lundi musabile abo bamupia enywe siibi, 45nio mube babaana ba Raraawenywe oli mwikulu, sikila akhola enyanga yewe ne khoselia bamayaanu ne balayi, lundi areera efula khu baluungi nende khu bakhali baluungi tawe. 46Siina sikila Wele amuelesie enywe kumuruuru khulwe khusiima basaale benywe bong'ene? Akhaba baroosia busuuru bakholanga bario! 47Lundi kaaba bali mukheesiana mwabeene khu beene mweng'ene, aba mukhililakho siina babaandi? Akhaba bakhamanyile Wele tawe, bosi se bakholanga bario? 48#Bal. 19.2; Likh. 18.13 Nono enywe mukhoya mube babechufu mu busiime nga Raraawenywe owe Mwikulu ne ali omwichufu.

Currently Selected:

Mat. 5: LUBUKUSU

Highlight

Copy