Popular Bible Verses from Mat. 5

Share

Namwe omundu se aambia etaa mala akifunikhila mu sikono tawe, ne kakhali, akira khu siteetwe ekhoselie baali munju boosi. Mu ngila ng'ene eyo lekha buwaanga bwenywe bukhosie ebweeni we babaandu, nio babone bikholwa bienywe bilayi, mala baelesie luyali Raraawenywe oli mwikulu.

“Enywe muli buwaanga bwe mu sibala. Lukoba lulwombakhwa khu sikulu se lunyala lwakiswa tawe.

“Baali ne kimiooyo kimikwalaafu bali ne chikhabi, sikila bakhabone Wele.

“Baali ne njala ne bulesia bwe khuuba baluungi bali ne chikhabi, sikila Wele akhabekusie.

Ne kakhali ese muboolela enywe ndi, siima basiku benywe, lundi musabile abo bamupia enywe siibi

“Baali ne kumutaambo kwe mu roho bali ne chikhabi, Sikila bubwami bwe mwikulu buli bubwabwe.

“Bareera kumuleembe bali ne chikhabi, Sikila bakhalaangwe babaana ba Wele.

“Baalila bali ne chikhabi, sikila Wele akhabaoleelesie.

“Ba bapisibwa siibi khulwe buluungi bali ne chikhabi, sikila bubwami bwe mwikulu buli bubwabwe.

“Baali ne siisa bali ne chikhabi, sikila Wele akhabakholele siisa.

“Babaandu ne bamukhoma ne khumupia enywe siibi ne khumukiikha enywe mu ngila choosi sikila ese, muli ne chikhabi. Yekhoya mala musangaale lukali sikila kumuruuru kwenywe kuuli mwikulu kuli kumuboofu, sikila baapia bang'oosi be khaale siibi bario.

“Babeboombia bali ne chikhabi, sikila bakhaebwe sibala nisio Wele aabasuubisia.

“Enywe muli kumuunyu kumukhelekha kwe sibala, ne kakhali kumuunyu kumukhelekha ne kuwamo bululu bwakwo, kunyala kwaba kumuunyu kumukhelekha lundi ku? Se kung'aayila mu siindu siosi siosi tawe, ne kakhali kufumulwa khwibuumbi ne khuswalakililwa ne babaandu.

Nono enywe mukhoya mube babechufu mu busiime nga Raraawenywe owe Mwikulu ne ali omwichufu.

Lekha nilio oloma libe ‘Yee’ namwe ‘Tawe’, sisiindu siosi siosi sikhila ao, siaama khu Musiku.

“Mwaulila nga kaboolwa bali, ‘Emoni khu moni, ne liliino khu liino.’ Ne ese muboolela enywe ndi: mukharuungisia kamabi khu mabi tawe. Ne kakhali yesi yesi okhuupa luui ewe khu lusaaya luseecha, muyusilie luluundi lwosi.

Nono kaba bali emoni eseecha ekila wakhola bubwoni, kitomole mala okimwaate eyo! Buli bulayi ewe khutibia siindu silala khu mubili kwowo khukhila kumubili kwowo kwoosi ne kumwaatwa mu mulilo emakoombe. Lundi kaba bali kumukhono kwowo kumuseecha kukila wakhola bubwoni, kukhale mala okumwaate eyo! Buli bulayi ewe khutibia siindu silala khu mubili kwowo khukhila kumubili kwowo kwoosi ne kumwaatwa mu mulilo emakoombe.