Mat. 27

Yesu ayiilwa ebweeni wa Pilato

(Mk. 15.1; Lk. 23.1-2; Yn. 18.28-32)

1Nga ne bwasia, basaayi bakhulu boosi ne babemeelesi be babaandu bakhola etoloondo eye khukhwira Yesu. 2Bamuboa kiminyololo bacha naye, bamura mu makhono ka Pilato omuruki owe bubwami bwe Barumi.

Lifwa lia Yuda

(Bikh. 1.18-19)

3 # Bikh. 1.18-19 Nga Yuda omuchaami ne abona Yesu akhalakiilwe khufwa, eebiiyia mala aakobosia chirupia kamakhumi kataru chana echo khu basaayi bakhulu ne babemeelesi. 4Aaloma ali, “Nakholile bubwoni nga nachaamile omundu omuluungi khukhwirwa.” Bamureeba bali, “Kamene ako kali siina khwifwe? Wamwene koongo!”

5Yuda amwaata chirupia chana aasi mu Lukaangu, aarekukha aacha ekoka.

6Basaayi bakhulu, babukula chirupia chana echo, baloma bali, “Lilaka se likhufukiilila efwe khuchira mwibiikhilo tawe, sikila chili che sifuki.” 7Bafukiilisiana mala bachibukula bakula, lusaambu lwo mubuumbi, khusiikhamo baakwa. 8Khwako lusaambu lwene olwo lulaangwa lwe sifuki khukhwola endaalo yino.

9 # Sak. 11.12-13 Nio niko omung'oosi Yeremia aloma kechusibwe. “Mala babukula chirupia kamakhumi kataru, sikelo nisio babaandu ba Isiraeli bafukiilila khumuruunga, 10barumikhira chirupia echo khukula lusaambu lwo mubuumbi, nga Omwami ne aandaka.”

Pilato areeba Yesu

(Mk. 15.2-5; Lk. 23.3-5; Yn. 18.33-38)

11Yesu eema ebweeni wa Pilato omuruki owe bubwami bwe Baruumi; mala Pilato chana aamureeba ali, “Ewe niwe Omwami we Bayaudi?” Yesu aamukobosia ali, “Ewe walomile orio.” 12Ne kakhali nga basaayi bakhulu ne babemeelesi bamuloma se aabakobosia siindu tawe.

13Khwako Pilato aamureeba ali, “Ewe se olikho oulila bibiindu nibio balikho bakhusataka tawe?”

14Ne kakhali Yesu se aalomakho likhuwa liosi liosi tawe, nabwila omuruki oyo ne auka lukali.

Yesu akhalakilwa khufwa

(Mk. 15.6-15; Lk. 23.13-25; Yn. 18.39—19.16)

15Buli ndaalo eya naikara eye Pasaka omuruki we bubwami bwe Baruumi alekhuulaanga omuboe yesi yesi niye babaandu benyaanga. 16Siise esio omuboe abao owamanyikhana khu mabi owalaangwa Baraba, 17nono nga babuusiana Pilato abareeba ali, “Enywe mwenya mulekhulile naanu, Baraba namwe Yesu olaangwa Kristo?” 18Amanya busa ali Bayaudi bamurereere Yesu sikila likhendekha liabwe.

19Pilato aba ekhaale khu ndebe eye likhalaka, omukhasi wewe amurumira likhuwa ali, “Okhabakho ne sisiindu siosi siosi khu mundu omuluungi oyo tawe, luno naanisibwe lukali mu marooro sikila niye.”

20Basaayi bakhulu ne babemeelesi baachiilisia babaandu basabe Baraba alekhuulwe ne Yesu eerwe.

21Omuruki chana aabareeba lundi ali, “Mwenya mulekhulile mulala siina khu babili bano?” Bakobosia bali, “Baraba!”

22Pilato aabareeba ali, “Nono ese khole ndiena Yesu olaangwa Kristo?” Ne boosi bayokela lukali bali, “Abaambwe.”

23Nio Pilato aareeba ali, “Akholile mabi siina?” Ne kakhali bayokela lukali bali, “Abaambwe!”

24 # Likh. 21.6-9 Khwako Pilato abona ali salikho anyoola siosi siosi tawe, ne kakhali sisiayuumba sinyala siarakikha, abukula kameechi asaaba kamakhono kewe ebweeni we babaandu, naloma ali, “Ese se ndi ne sisiindu khu lifwa lio omundu yuno tawe! Makhuwa kenywe mwabene, ese koongo!”

25Ne babaandu boosi baloma bali, “Sifuki siewe sibe khwifwe ne khu baana befwe!”

26Nio aabalekhuulila Baraba, ne nga amala khu khuupa Yesu biboko, amuaana abaambwe!

Banamae bachekheelela Yesu

(Mk. 15.16-20; Yn. 19.2-3)

27Nio banamae bayila Yesu mwichipi lio muruki Pilato mala bebuusia ebweeni wewe boosi. 28Bamufuula chingubo chewe, bamufwara ekaanjo embesemu, 29baruka ekuutwa eye kamawa bamufwara khu murwe, bamuambia liteeka mukhono kwewe kumuseecha. Basikama ebweeni wewe ne bamuchekheelela ne baloma bali, “Muleembe Omwami owe Bayaudi!” 30Bamufuchakho mala babukula liteeka chana bamupila khumurwe. 31Oli bamala khumuchekheelela, bamufuula ekaanjo embesemu chana eyo, bamufwara chichewe mala bamuyila abaambwe.

Yesu abaambwa khu musalaba

(Mk. 15.21-32; Lk. 23.26-43; Yn. 19.17-27)

32Nga baaba ne balikho bacha, batundubikha omundu khukhwama Kireni niye balaanga lisina bali Simoni, mala banamae bamuyingiilila khusuta kumusalaba kwa Yesu. 33Nga boola abuundu alaangwa bali Kolikota, lisina liboola lili, “abuundu we Siianga.” 34#Chiny. 69.22 Baelesia Yesu endali niio batubasiisie ne endurwe bali anywe; ne nga akichanjamakho aakiloba khukinywa tawe.

35 # Chiny. 22.19 Bamubaamba khu musalaba mala bakabana chingubo chewe mu ngila eye khu khupa ekuura. 36Enyuma wako bekhalao ne bamuloleelela. 37Bara khu ngaaki khwe kumurwe kwewe kamaandiko ke kamasitako kaboola kali, “Yuno niye Yesu, Omwami we Bayaudi.” 38Nio banuuli babili ba baambwa naye, mulala kumukhono kumuseecha ne okundi kumukhasi.

39 # Chiny. 22.8; 109.25 Babaandu ba babirirangao basukusa kimirwe bamukhoma ne bamuchekheelela bali, 40#Mat. 26.61; Yn. 2.19 “Ewe niye owenya khutechula Lukaangu mala olwombakhe lundi mu ndaalo chitaru! Yeonia wamwene waaba ne oli Omwana owa Wele! Yama khu musalaba wikhe aasi khubone.”

41Akhaba basaayi bakhulu ne baandiki be Lilaka ne babemeelesi, bamuchekheelela, ne baloma bali, 42“Aonia babaandu; mala sanyala khukhwionia omwene tawe! Se ali Omwami owa Isiraeli? Khe ame khu musalaba ekhe aasi luno luri khubone, nio khumusuubile! 43#Chiny. 22.9 Eyikina mu Wele, ne khuloma, ali ese Omwana owa Wele. Nono kaba kario, lekha khubone nga Wele amuonia luno!”

44Akhaba banuuli ba babambwa naye boosi bamukhoma mu ngila ng'eneyo.

Lifwa lia Yesu

(Mk. 15.33-41; Lk. 23.44-49; Yn. 19.28-30)

45Sisiilima siaba khu sibala sioosi khukhwama chisa sita che kumuusi khukhwola chisa tisa. 46#Chiny. 22.2 Oli yola esaa eya tisa Yesu aayulukha ne kumumilo kumukali ali, “Eloi, Eloi, lama sabaki tani?” Liboola lili, “Wele wase, Wele wase, siina sikila ne undekhile?”

47Balala khu nibo babamwimao nga baulila bario baloma bali, “Omundu yuno alikho alaanga Elicha!” 48#Chiny. 69.22 Mulala khu nibo atima khangu aabukula sisiaangu, aasiinikha mu ndali enduruuchi asira khu liteeka mala akhaka khumuelesia bali anywe.

49Ne kakhali babaandi baloma bali, “Liinda nio, khubone nga Elicha echa khumuonia.”

50Yesu aayulukha lundi ne kumumilo kumukali mala akwiisia kumwoyo.

51 # Khur. 26.31-33 Nio engubo eye mu Lukaangu yatabukhamo, khukhwama khu ngaaki khukhwola aasi. Sibala siaterema chinyaanda chabukhakamo, 52biliindwa bioosi biekukha, mala batakatifu ba Wele bakali babafwa balamukha. 53Barura mu biliindwa, enyuma we khulamukha khwa Yesu bacha mu lukoba luboofu lutakatifu ne khubonekhela babaandu bakali. 54Nga omunamae omukhulu ne banamae babaandi ba baaba alala naye, ne baloleelela Yesu, babona khuterema khwe sibala nende kakekholekha, buuri bwabaamba, baloma bali, “Ng'ali yuno abeele Omwana owa Wele!”

55 # Lk. 8.2-3 Lundi bakhasi bakali babayo, ne baloleelela khukhwama sinao, abo nibo babaloonda khu Yesu khukhwama Kalilaya, ne bamuyeeta. 56Balala khu nibo baba Maria Makatalena, ne Maria maawe owa Yakobo ne Yosefu, ne maawe we basoleeli ba Sebetayo.

Lisiikhwa lia Yesu

(Mk. 15.42-47; Lk. 23.50-56; Yn. 19.38-42)

57Oli ekolooba, omuinda echa khukhwama Arimatea, owalaangwa bali Yosefu, yesi aba omweeka owa Yesu. 58Acha khu Pilato asaba kumulaambo kwa Yesu. Nio Pilato alaka ali aebwe. 59Nio Yosefu aabukula kumulaambo kwa Yesu, aakuboela mungubo eye khusiikhilamo eya katani emiliiu, 60akura mu ng'ani yewe embia, niyo abeecha mu libaale. Apiringisia libaale libalaayi alikhiikha emuliango we siliindwa, mala arekukha. 61Maria Makatalena ne Maria okundi oyo babao, bekhaale baloleelele esiliindwa.

Buliindi e siliindwa

62Endaalo eyaloondakho, nio busie Sabato, basaayi bakhulu ne Bafarisayo babusiana ebweeni wa Pilato 63#Mat. 16.21; 17.23; 20.19; Mk. 8.31; 9.31; 10.33-34; Lk. 9.22; 18.31-33 ne baboola bali, “Omwami, efwe khukhebulila nga omubeeyi oyo aloma, nasiili omulamu ali, ‘Ndilamukha enyuma we chindaalo chitaru.’ 64Khwako laka oli siliindwa sibeo baliindi khukhwola endaalo eya khataru, babeeka bewe bakhola bario bacha bamwiba, mala baboolela babaandu bali, ‘Alamukhe khukhwama mu bafu’, mala aba bubeeyi bumaliilisi bulakhilakho butaayi.”

65Pilato ababoolela ali, “Enywe muli ne baliindi, khe muche, mubareo nga mwenya.”

66Khwako bacha, bamaalilila kumuuri khwibaale e muliango we siliindwa ne khurao baliindi basiliinde.

Currently Selected:

Mat. 27: LUBUKUSU

Highlight

Copy