Mat. 26

Ekwangwaani eye khukhwira Yesu

(Mk. 14.1-2; Lk. 22.1-2; Yn. 11.45-53)

1Nga Yesu aamala khukhwikisia ako koosi, aaboolela babeeka bewe ali, 2#Khur. 12.1-27 “Mumanyile muli naikara eye Epasaka elabao enyuma we chindaalo chibili, ne Omwana wo Mundu alaambwa mala abaambwe khu musalaba!”

3Nio basaayi bakhulu ne babemeelesi ne babaandu, bebuusia munju yo Omusaayi Omukhulu Lukali owalaangwa Kayafa, 4mala bakhola ekwangwaani baambe Yesu mu bwikisi mala bamwire. 5Ne kakhali baloma bali, “Kakhakholekhela mu ndaalo eya naikara tawe, busa babaandu bakhola bario benyosia sisiayuumba.”

Yesu aakhwa kamafura e Betania

(Mk. 14.3-9; Yn. 12.1-8)

6Yesu aaba e Betania munju mwa Simoni owalwaala kamakele. 7#Lk. 7.37-38 Nga Yesu aaba ne alikho alia omukhasi amwichao ne kumwendo kwe kamafura kaunya bulayi ke bukusi bwe angaaki lukali, mala aakachukha khu murwe kwa Yesu. 8Babeeka bewe nga babona bario, babiililwa mala bareebana bali, “Khuno se khuli khusasia? 9Abeele kamafura kano kanyala kakusibwa bukusi bwe angaaki, mala chirupia echo chiche khu bataambi!”

10Ne kakhali Yesu amanya kamebaasio kabwe, aabareeba ali, “Siina sikila ne munaania omukhasi yuno? Akholeele ese sisiindu silayi. 11#Likh. 15.11 Muli ne bataambi buli lwoosi, ne kakhali se mukhabe nase buli lwoosi tawe. 12Ama khuchukha kamafura kano khu mubili kwase, khu khundekekha ese khusiikhwa. 13Ng'ali ese muboolela enywe ndi, niio Elomo Endayi yino yilwachwa osi osi mu sibala, sikholwa siewe sino sikhakhebulilwe.”

Yuda afukiilila khuchaama Yesu

(Mk. 14.10-11; Lk. 22.3-6)

14Nio mulala khu beeka ekhumi na babili owalaangwa Yuda Isikarioti aacha khu basaayi bakhulu, 15#Sak. 11.12 abareeba ali, “Mumba siina kaaba bali ese njaama Yesu mu muambe?” Bamubalila chirupia kamakhumi kataru. 16Khukhwama siise esio Yuda ayiima bubweyaangu bulayi bwe khuchaama Yesu.

Yesu alia naikara eye Pasaka ne babeeka bewe

(Mk. 14.12-21; Lk. 22.7-13,21-23; Yn. 13.21-30)

17Khu ndaalo eye khunyoa eya naikara eye kumukaati kukhalimo limela tawe, babeeka becha khu Yesu, bamureeba bali, “Wenya khu khurekekhele waena olileo Epasaka?”

18Yesu aabakobosia ali, “Cha mu lukoba muboolele omundu mulala muli, ‘Omwekisia aloma ali, Esaa yase yoolile, ese ne babeeka base khulalia e naikara eye Pasaka munju mwowo.’ ”

19Babeeka bakhola nga Yesu abalaka, barekekha siakhulia sie Pasaka.

20Oli bwelabula, Yesu ekhala asialwa ne babeeka ekhumi na babili khulia. 21Oli balikho balia, Yesu aloma ali, “Ng'ali ese muboolela enywe ndi, mulala khwinywe alanjaama.”

22Babeeka babeelela lukali, mala barakikha khumureeba ne baloondekhana bali, “Omwami, ese namwe?”

23 # Chiny. 41.10 Yesu aabakobosia ali, “Olaronganga mu sibuumba nase niye olanjaama. 24Omwana wo Mundu akhafwe nga ne kaandikwa khu niye, ne, silaamo siliba khu mundu omuchaama! Nabulayi omundu oyo andi se asaalwa tawe!” 25Yuda, omuchaami, aareeba ali, “Omwami, ese namwe?” Yesu aamuboolela ali, “Ewe walomile.”

Lilikolooya lio Mwami

(Mk. 14.22-26; Lk. 22.14-20; 1 Bakor. 11.23-25)

26Nga baba ne balikho balia, Yesu abukula kumukaati apila Wele orio akumesulamo mala aelesia babeeka bewe, mala ababoolela ali, “Bukula mulie, kuno kuli kumubili kwase.”

27Lundi abukula sikoombe, oli amala khu khupila Wele orio aabaelesia, naloma ali, “Khe munywe, mweesi; 28#Khur. 24.8; Yer. 31.31-34 kano kamafuki kase, ke ndakaano, kachukhwa sikila babaandu bakali khulwe khubabeela bubwoni. 29Ese muboolela enywe, se khanywekho lundi endali eye kumusabibu kuno tawe khukhwola endaalo niyo ndinywa endali embia nanywe mu Bwami bwa Paapa.”

30Nga bamala khukhwimba kumwenya, bacha khu sikulu sia Miseituni.

Yesu ang'oola ali Petero alamwekaana

(Mk. 14.27-31; Lk. 22.31-34; Yn. 13.36-38)

31 # Sak. 13.7 Nio Yesu aababoolela ali, “Siilo sia luno, mweesi mulelukha mundekhe, sikila kaandikwa bali, ‘Wele akheere omwaayi, mala kamakheese kasalaanile.’ 32#Mat. 28.16 Ne kakhali, ne ndamuukhe khache Kalilaya ebweeni wenywe.”

33Petero amuboolela ali, “Boosi bakhakhwilukha ewe, ese se ndakhwilukha tawe!”

34Nio Yesu amuboolela ali, “Ng'ali ese khuboolela ndi, siilo sia luno sisiene, etaaywa ne khakholiokha tawe, olanjekaana khataru!”

35Petero aamuboolela ali, “Akhaba ne kaba bali ese khukhwola fwe nawe, se khwekaana tawe!” Babeeka babaandi boosi baloma bario.

Yesu asabila mu Ketisemani

(Mk. 14.32-42; Lk. 22.39-46)

36Yesu aacha ne babeeka bewe abuundu alaangwa bali Ketisemani, mala ababoolela ali, “Khemwikhale ano, ese ndikho nja eyo khusaba.” 37Aabukula Petero ne basoleeli babili ba Sebetayo, arakikha khubeelela ne khunanisibwa ne kumwoyo. 38Nio ababoolela ali, “Kumwoyo kwase kwabeleele khubira sikelo khukhwola embi khufwa, khemwikhale ano meso nase.”

39Esendakho sinao mala akwa aasi mafumala asaba ali, “Paapa, ne kanyalikhana, lekha sikoombe sie buchuuni sino simbire! Ne kakhali, kakhaba nga ese ne nenya tawe, kabe nga ewe ne wenya.”

40Nio echa niio babeeka bewe bataru baba mala abanyoola bakona, aboolela Petero ali, “Basie, se munyala mwekhala meeso nase aakhaba esaa ndala yong'ene tawe? 41Ba meso mala musabe nio mukhakwa mu makhako tawe. Kumwoyo kwenya ne kakhali kumubili kuli kumutekhele.”

42Elayo lukhola khabili, mala asaba ali, “Paapa, ne kaaba bali sikoombe sie buchuuni sino se simbira tawe nabwila sinywa, aba lilienya liowo likholekhe.” 43Lundi akobola abanyoola ne bakona, sikila yaba chimoni chabwe chasitoe.

44Abwenao, Yesu abalekha lundi acha asaba lukhola khataru, naloma kamakhuwa chana ako busa. 45Nio aakobola niio babeeka baba abareeba ali, “Musikona ne khuola? Lola! Esaa yolile niyo Omwana wo Mundu achamiilwe khurwa mu makhono ke babooni. 46Yinyokha, khuche, lola ounjaama oolile!”

Yesu aambwa

(Mk. 14.43-50; Lk. 22.47-53; Yn. 18.3-12)

47Yesu ne asilomaloma, Yuda owaba mulala khu ba baaba ekhumi na babili oola. Aba ne babaandu bakali ba baaba ne basutile kimibano ne chiruungu. Baaba barumirwe ne basaayi bakhulu ne babemeelesi. 48Abeele omuchaami abaelesie simanyisio ali, “Omundu niye ndekwayila; niye omweneyo, muambe.”

49Yuda eecha niio Yesu ali amukheesia ali, “Muleembe, omwekisia,” mala aamwikwayila.

50Yesu amuboolela ali, “Omusaale, khola khangu nisio wichile khukhola!” Nio becha baamba Yesu. 51Mulala khwaabo ba baaba ne Yesu aachoola embalu yewe, aarema liiru lio omukholi wo Omusaayi Omukhulu Lukali, liakwa. 52Yesu amuboolela ali, “Kobosia embalu yowo mu sibaabi; sikila yesi yesi orumikhira embalu, embalu ekhamwire. 53Se mumanyile muli nyala nasaba Paapa wase, mala aandeerera khangu banamae bikoosi ekhumi na bibili bie ba malaika? 54Ne kakhali aba niko kamaandiko kaboola kali kano khukhwola kakholekhe kalechusibwa kariena?”

55 # Lk. 19.47; 21.37 Siise esio Yesu aareeba babaandu abo ali, “Enywe mwechile oli muenja Omunuuli, mwasutile kimibano ne chiruungu, khu khumbaamba ese? Chindaalo choosi, ese nikhalanga mu Lukaangu ne nikisia ne se mumbaamba tawe. 56Ne koosi kakholekhe, nio kamaandiko ke bang'oosi kolaane khukhwichusibwa.”

Mala babeeka bewe boosi belukha bamulekha.

Yesu ebweeni we kumuse

(Mk. 14.53-65; Lk. 22.54-55,63-71; Yn. 18.13-14,19-24)

57Nio abo ba baaba ne baambile Yesu bamuyila wa Kayafa Omusaayi Omukhulu Lukali, niio baandiki be Lilaka ne babemeelesi baba bebuusiisie. 58Petero amuloondakho enyuma kalaa, nabwila ola khu luuya lwo Omusaayi Omukhulu Lukali. Ekhala ne baliindi khubona sikane siekholekhe. 59Basaayi bakhulu nende be kumuse kwoosi bayiima buloli bwe bubeeyi khu Yesu nio bamwire; 60ne kakhali se banyoolakho siosi siosi tawe, akhaba babaandu bakali ne becha baloma ke bubeeyi khu niye. Ekhumaliilikha babaandu babili berusia beecha, 61#Yn. 2.19 baloma bali, “Omundu yuno aaloma ali, ‘Ese nyala natechula Lukaangu lwa Wele, mala nalwombakhila mu ndaalo chitaru.’ ”

62Omusaayi Omukhulu Lukali eenyokha eema aareeba Yesu ali, “Se oli nende nilio oloma khu niko bakhusitakiilekho kano tawe?” 63Ne kakhali Yesu asila busa. Lundi Omusaayi Omukhulu Lukali aloma ali, “Mwisina lia Wele omenyile mindali luno ese khwichubia ewe, khuboolele ne oli Kristo, Omwana owa Wele.”

64 # Dan. 7.13 Yesu amukobosia ali, “Ewe walomile orio. Ne kakhali ese muboolela enywe, lwanyuma mukhabone Omwana wo Mundu eekhaale kumukhono kumuseecha kwa Wele we bunyali, ne echela khu mafuumbi ke mwikulu!”

65 # Bal. 24.16 Nio Omusaayi Omukhulu Lukali atabula chingubo chewe ne aloma ali, “Embelekeu khu Wele! Se khwenya baloli babaandi tawe! Mwama khuulila embelekeu yewe! 66Enywe mubona murie?”

Bamuboolela bali, “Kumusaango kwamukhilile akhoyeele afwe.”

67 # Isa. 50.6 Mala bamufucha mu moni ne khumupa chimbi, 68ne baloma bali, “Kristo ng'oola! Naanu owama khu khupa ewe!”

Petero ekaana Yesu

(Mk. 14.66-72; Lk. 22.56-62; Yn. 18.15-18,25-27)

69Petero aba eekhaale khu luuya enje, omukholi owe siikhasi wo Omusaayi Omukhulu Lukali aamwichao, aaloma ali,

“Akhaba wesi wabeele ne Yesu Omukalilaya.”

70Ne kakhali Petero ekaana ebweeni wabwe boosi ali, “Se manya niko olikho oloma tawe,” 71mala Petero chana arura acha mumatooche. Omukholi owe siikhasi okundi amubona, mala aboolela babemile ali, “Omundu yuno abeele ne Yesu owa Nasareti.”

72Lundi Petero ekaana ne khukhwechuba ali,

“Ese se manyile omundu oyo tawe!” 73Enyuma we siise sitiiti babemile bacha baboolela Petero bali, “Ng'ali akhaba ewe oli mulala khu nibo, sikila lilomaloma liowo likhubuula.”

74Mala Petero echuba, aaloma ali, “Ndikho mboola bung'ali! Ese se manyile omundu oyo tawe! Naaba ne mbea lekha Wele ambukuume.”

Oli asiloma ario etaaywa yakholiokha. 75Nio Petero aakhebulila kamakhuwa niko Yesu aamuboolela ali, “Etaaywa ne khakholiokha tawe, olinjekaana khukhwola khataru, oli se umanyile tawe.” Petero arura enje aalila burafu.

Currently Selected:

Mat. 26: LUBUKUSU

Highlight

Copy