Mat. 25

Lukano lwe bakhaana ekhumi

1 # Lk. 12.35 “Siise esio Bubwami bwe mwikulu bulifwaananisibwa ne bakhaana ekhumi bababukula chitaa chabwe mala bacha khukhwakaanila omusoleeli omwene siselelo. 2Baraano khu nibo baba basilu, ne baraano bakesi. 3Basilu nga babukula chitaa chabwe, se basuta ne kamafura tawe. 4Ne kakhali bakesi basuta kamafura mu chichupa ne chitaa chabwe. 5Nga omusoleeli omwene siselelo akhiinda, liilo liabatiila boosi bakona.

6“Oli siilo akari, bikalakala biakwa bali, ‘Omusoleeli omwene siselelo oolile! Yiicha mumwakaanile!’ 7Bakhaana abo boosi benyokha bang'oona chitaa chabwe. 8Nio basilu baboolela bakesi bali, ‘Khuketelekho kamafura kenywe, sikila chitaa chefwe chilikho chisima.’ 9Ne kakhali bakesi ba bakobosia bali, ‘Se kalimo kakhwola efwe nanywe tawe; cha khu bakusia mukule kakenywe.’ 10Nga baba ne balikho bacha khukula omusoleeli omwene siselelo aulukha, nio baraano baberekekha bengila naye mu naikara eye siselelo; ne kumuliango kwekalwa.

11 # Lk. 13.25 “Ekhumaliilikha bakhaana basilu abo becha, balaanga bali, ‘Omwami, omwami khwikulileo!’ 12Ne omusoleeli omwene siselelo abakobosia ali, ‘Se kanyalikhana tawe, ese se mumanyile enywe tawe.’ ”

13Yesu atabusia ali, “Nono mulole bulayi, sikila se mumanyile endaalo namwe esaa tawe!

Lukano lwe bakholi bataru

(Lk. 19.11-27)

14 # Lk. 19.11-27 “Biise ebio bubwami bwe mwikulu bulifwaananisibwa ne omundu owenya khucha lukeendo. Aalanga bakholi bewe mala abaelesia kimiaandu kiewe bamuliindile. 15Aelesia buli mulala khuloondekhana ne limanya liewe: mulala chirupia chicholaana ne chitalanda chiraano, ne okundi chibili, ne okundi ndala. Mala aarekukha. 16Oyo owanyoola chiraano, aacha ofula anyoola chichiindi chiraano. 17Akhaba owanyoola chibili ofulamo chichiindi chibili. 18Ne kakhali oyo owanyoola etalanda ndala acha aayaba liloo aasiikha etalanda yo omwami wewe.

19“Enyuma we siise sileeyi, omwami we bakholi chana abo aakobola aareeba chitalanda chewe. 20Owanyoola chitalanda chiraano echa, areera chichiindi chiraano bukhala, ne aloma ali, “Omwami, wambelesia chiraano; ano nanyoolilekho bukhala chichiindi chiraano.” 21Omwami wewe amuboolela ali, “Wakholile bulayi, omukholi omulayi lundi omweyikinwa, wabeele omweyikinwa khu bitiiti, ndakhura khu buliindi bwe bikali; yiicha obe mu busangaafu bwo mwami wowo.” 22Ne oyo owanyoola chitalanda chibili yesi eecha aloma ali, “Omwami wamba chitalanda chibili; ano nanyoolilekho bukhala chichiindi chibili.” 23Omwami wewe aamuboolela ali “Wakholile bulayi, omukholi omulayi lundi omweyikinwa; wabeele omweyikinwa khu bitiiti, ndakhura khu buliindi bwe bikali; yiicha obe mu busangaafu bwo mwami wowo.” 24Nio owanyoola etalanda ndala yesi eecha, aaloma ali, “Omwami, namanya ndi ewe oli omundu omulume, okesanga niio okhamiicha tawe, lundi obuusianga niio okhabakala tawe. 25Khwako naria, mala nacha nakisa etalanda yowo mwiloba. Nono etalanda yowo niyeeyi.” 26Omwami wewe amuboolela ali, “Ewe omukholi omumayaanu lundi omukara! Wamanya oli ngesaanga niio khamiicha, lundi mbuusianga niio khabakala tawe? 27Nono andi wabiikha etalanda yase mu bengi nio oli ngobola nyoole etalanda yase ne bukhala bwayo. 28Khwako munuule etalanda niyo ali nayo mala muelesie ooli ne nacho ekhumi. 29#Mat. 13.12; Mk. 4.25; Lk. 8.18 Sikila buli mulala oli nabio alaebwa bibiindi, mala abe ne bikali khukhila; naye otaamba, alanuulwa akhaba sitiiti nisio ali nasio. 30#Mat. 8.12; 22.13; Lk. 13.28 Mwata omukholi okhali ne bukhala oyu enje mu siilima, ebweeneyo babaandu balilila ne khukhwelumakaka.”

Likhalaka limaliilisi

31 # Mat. 16.27; 19.28 Nga Omwana wo Mundu aliicha ne luyali lwewe, alala ne ba malaika bewe, aliikhala khu ndebe eye luyali lwewe. 32Chikholo choosi chikhakhung'ane alala ebweeni wewe mala aabukhasie ndala khukhwama khu kiindi nga omwaayi aabukhasia kamakheese ne chimbusi, 33akhare kamakheese kumukhono kwewe kumuseecha ne chimbusi kumukhasi. 34Nio omwami aliboolela be kumukhono kwewe kumuseecha ali, “Yiicha enywe nibo Paapa aabiita chikhabi, nyoola Bubwami nibwo mwang'oonelwa: khukhwama nga sibala ne siabaang'anwa. 35Sikila naba ne njala mwambelesia siakhulia, naba ne bulesia mwambelesia sie khunywa, naba omukeni mwanjakaanila, 36naba sichula mwafwara, naba omulwale mwecha mwambona, naba mu siboe mwecha mwambona.” 37Abwenao baluungi balimureeba bali, “Omwami, khwakhubona ndaalo siina ne oli ne njala mala khwakhuelesia siakhulia, namwe ne oli ne bulesia mala khwakhuelesia kameechi wanywa? 38Khwakhubona ndaalo siina ne oli omukeni mala khwakhwakaanila mu nju chefwe, namwe ne oli sichula khwakhufwara? 39Lundi khwakhubona ndaalo siina ne olwaala namwe ne oli mu siboe khwecha khwakhubona?” 40Omwami alibaboolela ali, “Ng'ali muboolela enywe ndi, koosi niko mwakholela mulala khu bawandaayase batiiti mu boosi bano, mwakholela ese!”

41Aliboolela baali kumukhono kwewe kumukhasi ali, “Khemundureo, enywe muli ne silaamo, cha mu mulilo kwa mindali kukwang'oonelwa Sietani ne malaika bewe. 42Sikila naba ne enjala mala se mwambelesia siakhulia tawe, naba ne bulesia ne kakhali se mwambelesia sie khunywa tawe, 43naba omukeni ne kakhali se mwanjakaanila munju chenywe tawe, naba sichula ne kakhali se mwafwara tawe, naba omulwale lundi naba mu siboe ne kakhali se mwecha mwambona tawe.” 44Nabo bosi balireeba bali, “Omwami, khwakhubona ndaalo siina ne oli ne njala namwe ne oli ne bulesia namwe ne oli omukeni namwe ne oli sichula namwe ne oli omulwale namwe ne oli mu siboe mala efwe khukhuyeeta tawe?” 45Naye alibaboolela ali, “Ng'ali muboolela enywe ndi, nga nilwo mwaloba khukholela khu batiiti bano, aba se mwakholela ese tawe! 46#Dan. 12.2 Khwako bano balinyoola siiukuumo sia mindali, ne baluungi bulamu bukhawa tawe.”

Currently Selected:

Mat. 25: LUBUKUSU

Highlight

Copy