Mat. 24

Yesu aloma ke lilionakwa lie Lukaangu

(Mk. 13.1-2; Lk. 21.5-6)

1Nga Yesu ne aba ne alikho acha khukhwama mu Lukaangu, babeeka bewe becha bamwekesia kamombakho ke Lukaangu. 2Ne abakobosia ali, “Mwaboone kano koosi namwe tawe? Ng'ali muboolela enywe ndi, se lilirama ano libaale lilala khu ngaaki khwe liliindi, likhalimwaatwa aasi tawe.”

Khu khupisibwa siibi

(Mk. 13.3-13; Lk. 21.7-19)

3Nga Yesu ekhala khu sikulu sia Miseituni, babeeka bamwichakho mu bwikisi ne bamureeba bali, “Khuboolele, kano kaliba liina, lundi siina siliba simanyisio sie liliicha liowo nende sie siieli sie sibala?” 4Mala Yesu abakobosia ali, “Ba meso, omundu yesi yesi akhamusilwaasia tawe. 5Sikila bakali balichila mu lisina liase, ne baloma bali, ‘Ese niise Kristo!’ Mala balisilwasia bakali. 6Lundi muli ulila liie ne kamakhuwa ke liie; mukheembeelela tawe; sikila khukhwola ako kakholekhe, ne kakhali aba sisiakamo sikhoola tawe. 7Sikila sibala silibwaakala sibala sisiindi; bubwami bulibwaakala bubuundi, lundi enjala elibao ne khuterema khwe sibala mu mbeka chingali. 8Kano koosi kali busa nga omukhasi olumwa ne buloonda.

9 # Mat. 10.22 “Nio balimuaamba bamuyile enywe muukuumwe ne khukhwirwa. Chikholo choosi chilimubiila enywe sikila lisina liase. 10Ne bakali balitibia lisuubila liabwe siise esio, balichamana ne khubiilana. 11Lundi bang'oosi be bubeeyi bakali baliicha mala batiimie babaandu bakali. 12Busiime bwe babaandu bakali buliboomba sikila bumayaanu khukucha. 13#Mat. 10.22 Ne kakhali oyo owekhaliilikha khukhwola khu siakamo akhaone. 14Ne Elomo Endayi eye Bubwami yino eliilwachwa mu sibala sioosi, nga buloli khukholo choosi; nio sisiakamo siiche.

Sibiilisio sie Lilionaka

(Mk. 13.14-23; Lk. 21.20-24)

15 # Dan. 9.27; 11.31; 12.11 “Khwako ne mukhabone ‘Sibiilisio sie Lilionaka’ sisialomalomwa no mung'oosi Danieli, ne siimile Abuundu Atakatifu, (Osoma akhoya amanye,) 16nono lekha abo bali e Buyuda belukhile mu bikulu; 17#Lk. 17.31 oyo oli khu nju khu ngaaki akheekha aasi khubukula siili munju mwewe tawe. 18Lundi oyo oli e mukuunda akhakobola engo khubukula engubo yewe tawe. 19Abo baliba sisombo namwe baliba ne banuunia mu ndaalo ng'ene echo balikhola siisa! 20Khemusabe Wele khumula khwenywe khukhecha khwaba mu ndaalo che kumunaane namwe mu ndaalo eya Sabato tawe! 21#Dan. 12.1; Lif. 7.14 Sikila mu siise sienesio butinyu buliba bukali po, bukhabaakho mu sibala lundi se bulibakhoo burio tawe. 22Ne takha Wele ne amala khale khukhwimbiyia chindaalo echo, andi omundu se akhaone akhaba mulala yeng'ene tawe. Ne kakhali sikila barobore bewe, Wele alembiiya chindaalo.

23“Nio, kaaba bali omundu yesi yesi aloma ali, ‘Kristo oyu siina!’ Namwe, ‘niye oyo!’ Mukhasuubila tawe. 24Ne kakhali babelaanga bali nibo Kristo ne bang'oosi be bubeeyi baleecha; ne khukhola kamayia ke khuukia kanyala khutiimia akhaba barobore ba Wele kaaba ne kanyalikhana. 25Rekeeresia! Namubooleele enywe lino siise ne sikhoola tawe. 26#Lk. 17.23-24 Khwako babaandu ne bamuboolela enywe bali, ‘Ali enje mu sichiimi!’ Mukharura mwachayo tawe, namwe ne baloma bali, ‘Oyu siina mu chisiro che nju!’ Mukhasuubila tawe. 27Sikila Omwana wo Mundu alicha nga lueni ne luburukha khukhwama ebukwe khukhwola mumbo.

28 # Lk. 17.37 “Chingosia chibuusiananga osi osi niio sifwiile sili.

Liliicha lio Mwana wo Mundu

(Mk. 13.24-27; Lk. 21.25-28)

29 # Isa. 13.10; 34.4; Esek. 32.7; Yoe. 2.10; 3.4; 4.15; Lif. 6.12-13 “Chindaalo che butinyu chiliwa busa chiri ne enyanga emaliia, ne kumwesi kulilekha khukhosia, ching'enieesi chilikwa khukhwama mu ngaaki, ne kamaani ke mu ngaaki kaliesisiikha; 30#Dan. 7.13; Sak. 12.10-14; Lif. 1.7 ne simanyisio sio Omwana wo Mundu silibonekha mu ngaaki, mala babaandu be chikholo che sibala boosi balilila nga balibona Omwana wo Mundu ne echela mu ngaaki mu bunyali ne luyali lukali. 31Ekhoombi emboofu eliipa mala arume bamalaika bewe khubuusia barobore bewe khukhwama chimbeka choosi chine che sibala.

Kamekisio khuloondekhana ne kumutuli

(Mk. 13.28-31; Lk. 21.29-33)

32“Khemweyike khukhwama khu mutuli. Ne mubona lusakia lwakwo ne lukhukhumusia ne khusisina kamasaafu kamatoro, mumanya muli siimiyu sili siimbi. 33Khwako, ne mubona bibiindu bino bioosi ne mumanya muli Omwana wo Mundu ali siimbi. 34Ng'ali ese muboolela enywe ndi, eselukho yino se liwao tawe khukhwola bibiindu bino bikholekhe. 35Likulu ne liloba biliwao, ne kakhali kamakhuwa kase se kaliwao tawe.

Se aliio omanyile endaalo namwe siise tawe

(Mk. 13.32-37; Lk. 17.26-30,34-36)

36“Se aliio, omanyile, endaalo namwe esaa ekhoole liina tawe, akhaba malaika be mwikulu, akhaba Omwana se amanyile tawe, nakhali Paapa yeng'ene omanyile. 37#Lir. 6.5-8 Liliicha lio Omwana wo Mundu liliba nga kakakholekha mu ndaalo cha Noa. 38Mu ndaalo echo kameechi ne kasiili khwichula, babaandu baba bali mu khulia ne khunywa, baseecha ne bakhasi bayilana, khukhwola endaalo niyo Noa engila mu meeli, 39#Lir. 7.6-24 ne se bamanyakho sisiekholekhanga tawe, nabwila kameechi kecha kabasiikha boosi. Omwana wo Mundu nga akheeche, kaliba kario. 40Mu ndaalo echo babaandu babili baliba mu mukuunda; mulala akhabukulwe, okundi alekhwe. 41Bakhasi babili baliba khebasiela khu lususi, mulala akhabukulwe, ne okundi alekhwe. 42Khe mube meeso nono, sikila se mumanyile endaalo niyo Omwami wenywe akheeche tawe. 43#Lk. 12.39-40 Nono khe mumanye kano; muli abanga omwene enju amanya siise sie siilo nisio omwifwi echelemo, andi aba meeso, lundi se alekha enju yewe yaatulwa tawe. 44Khwako enywe mwesi mukhoya mwerekekha, sikila Omwana wo Mundu alikho eecha esaa niyo mukhamanyile tawe.

Omukholi omweyikinwa ne okundi okhali omweyikinwa tawe

(Lk. 12.41-48)

45“Nono, omukholi omweyikinwa lundi omukesi niye naanu? Niye omwami wewe aara khuliinda be nju yewe, khubaelesia siakhulia mu siise sisienyekha? 46Ali ne ekhabi omukholi niye omwami wewe nga alikobola alimunyoola ne akhola ario. 47Ng'ali ese muboolela enywe ndi, alimukhola khuba omuliindi we kimiaandu kiewe kioosi. 48Ne kakhali omukholi omubi owibaasia ali, ‘Omwami wase alabukula siise sileeyi nio akobole,’ 49mala arakikhe khu khuupa bakholi basie, lundi alie ne khunywa ne bameesi. 50Omwami wo mukholi oyo akheeche endaalo niyo omukholi akhamwerekekhele tawe ne esaa niyo akhamanyile tawe. 51Omwami wewe alimuukuuma ne khumura alala ne babacha. Ebweeneyo babaandu balilila ne khukhwelumakaka.

Currently Selected:

Mat. 24: LUBUKUSU

Highlight

Copy