Mat. 14

Lifwa lia Yoana Omubatiisi

(Mk. 6.14-29; Lk. 9.7-9)

1Mu siise siene esio Herodi omuruki owa Kalilaya aulila efuma eya Yesu. 2Aboolela babemeelesi ba baaba aasi wewe ali, “Yuno ali Yoana Omubatiisi asiukhile khukhwama mu bafu, aka niko kakila nakhola kamayia kano.”

3 # Lk. 3.19-20 Herodi yuno niye owaamba Yoana amura mu siboe sikila Herotia, mukha wandaaye Filipo. 4#Bal. 18.16; 20.21 Sikila Yoana amuboolela ali, “Lilaka se likhufukiilila ewe khukhwila khu Herotia tawe.” 5Herodi enya khukhwira Yoana, ne kakhali aria babaandu, sikila bamanya bali Yoana aaba omung'oosi.

6Nga endaalo eye khukhebulila khusaalwa khwa Herodi ne yoola, omwana owa Herotia omukhaana akhinila sisiikhasio, mala asiimisia Herodi lukali. 7Khwako Herodi amulaka ne khu mwichubila ali alamuelesia siosi siosi nisio enya.

8Nio Herotia aachilisia omwana ali loma oli, “Mbelesie kumurwe kwa Yoana Omubatiisi khu lutelu siise sino!”

9Ne kakhali sikila aaba echubile ebweeni we bakeni bewe, alakiilisia ali bamuelesie. 10Nio arumania munju eye baboe bakhala Yoana kumurwe. 11Mala bareera kumurwe kwewe khu lutelu baelesia omukhaana oyo, naye ayilila maawe. 12Babeeka ba Yoana becha babukula kumubili kwewe mala basiikha mala bacha baboolela Yesu.

Yesu aliisia babaandu chielefu chiraano

(Mk. 6.30-44; Lk. 9.10-17; Yn. 6.1-14)

13Nga Yesu ne aulila kano, engila mu liaaro arura ebweeneyo acha abuundu niio babaandu bakhaba tawe aaba ebweeneyo yeng'ene. Nga babaandu bakali ne baulila, bama mu ngoba chabwe bamuloondakho khu bikele. 14Oli eema khu sikiingi abona babaandu bakali mala abakholela siisa, aonia ba baaba balwaale.

15Oli ekolooba, babeeka bewe bamwichakho baloma bali, “abuundu ano ali mu sichiimi, ne enje bwelabuule. Sibula babaandu bache mu birekere bakule biakhulia balie.” 16Yesu aloma ali, “Bakhenaana khucha tawe, enywe baelesie siakhulia balie!”

17Babeeka bewe bamuboolela bali, “Ano khuli ne kimikaati kiraano kiong'ene ne ching'eeni chibili.”

18Ababoolela ali, “Bireere ano.” 19Nio aboolela babaandu abo khukhwikhala aasi khu bunyaasi mala abukula kimikaati kiraano ekio ne ching'eeni chibili echo alola mu ngaaki apila Wele orio. Akimesula aelesia babeeka, mala babeeka bakaba babaandu. 20Babaandu boosi balia bekura. Nio babeeka babuusia bitonyi bie kimikaati bibiarama mala biechula bikono ekhumi na bibili. 21Ne babakilia baba babaandu chielefu chiraano be siseecha bong'ene nokhabaliilekho bakhasi ne babaana tawe.

Yesu akeenda khu meechi

(Mk. 6.45-52; Yn. 6.15-21)

22Nio aboolela babeeka bengile mu liaaro banyoe bambukhe enyanja bache ebweeni wewe niye omwene nasisibula babaandu khurekukha. 23Enyuma we khusibula babaandu acha mu sikulu yeng'ene khusaba mala bwelabulilayo. 24Ne mu siise sieneesio liliaaro liaba aleeyi khukhwama khu sikiingi, ekhuungu yaba engali yakila bibuli bie kameechi bialitengaasia.

25Mu makhelebeende Yesu echa niio babeeka bali, ne alikho akeenda khu meechi. 26Ne babeeka nga bamubona nakeenda khu meechi buuri bwabaamba. Mala bakukuula bali, “Simakoombe nisio!” 27Nio oli bakhasila tawe, Yesu ababoolela ali, “Niise nyindaalila, mukhaba ne buuri tawe.” 28Nio Petero amukobosia ali, “Omwami, waba ne oli ewe loma sesi ngende khu meechi niche niio oli ao.” 29Yesu aloma ali, “Yiicha.” Nio Petero arura mu liaaro akeenda khu meechi acha niio Yesu ali.

30Ne nga Petero abona ekhuungu, aria, mala arakikha khukhwisiikha. Nio alila ali, “Omwami mbonie!” 31Oli akhasila tawe, Yesu enaa aamutiila mala aloma ali, “Omundu we lisuubila likeekhe! Siina sikila ne okhali ne lisuubila?”

32Nga bengila mu liaaro, ne ekhuungu eyenjeela. 33Babeeka ba baaba mu liaaro basaaya Yesu, ne baloma bali, “Ng'ali khane ewe oli Omwana owa Wele.”

Yesu aonia balwaale mu Kenesareti

(Mk. 6.53-56)

34Nga baba ne bambuukhe enyanja, boola mu sibala sia Kenesareti, 35ne nga babaandu be bweneyo bamanya bali niye, barumania bareere balwaale khukhwama mu ngoongo che eyo choosi khu Yesu. 36Bamwikoonjelela bali balwaale batilekho khwikemo lie ngubo yewe; ne buli owatiilakho aona.

Currently Selected:

Mat. 14: LUBUKUSU

Highlight

Copy