Mat. 13

Lukano lwo mumiichi

(Mk. 4.1-9; Lk. 8.4-8)

1Endaalo eyo ne eng'ene Yesu arura munju ekhala anyanja khukhwekisia. 2#Lk. 5.1-3 Mala babaandu bakali bamwibusiao, bakila engila mu liaaro ekhalamo ne babaandu abo nabo bema khu sikiingi. 3Yesu ababoolela bibiindu bikali mu ngano ne aloma ali:

“Omumiichi arura khucha khumiicha. 4Nga aba namiicha bumiicho bulala bwakwa khu ngila, mala chinyuni checha chabuboocha. 5Bubuundi bwakwa khu lwanda lukhalikho liloba likali tawe khwako bwarubura khangu. 6Ne nga enyanga yarura kumuumu kwabwosia bwaniaala mala bwoma sikila bwaba bukhekhisia chiisi aasi tawe. 7Bumiicho bubuundi bwakwa mu mawa, mala eng'eneeni eye kamawa yakila bwafwa. 8Bumiicho bubuundi bwakwa mwiloba lilayi, bwaama bibiaamo, bulala khukhwola emia, bubuundi kamakhumi sita, bubuundi kamakhumi kataru.” 9Yesu amaliilisia ali, “Ooli ne kamaru, aulile!”

Sifuno sie chingano

(Mk. 4.10-12; Lk. 8.9-10)

10Nio babeeka beecha bamureeba bali, “Siina sikila ne orumikhira chingano khulomaloma khu baandu?”

11Abakobosia ali, “Enywe mwaelesebwa bubweyaangu bwe khumanya ke bubwami bwe mwikulu kakakiswa ne nibo tawe. 12#Mat. 25.29; Mk. 4.25; Lk. 8.18; 19.26 Oli nabio alaebwa bibiindi bikali, ne okhali nabio tawe, alanuulwa akhaba sitiiti nisio ali nasio. 13Kano niko kakila ne ndoma nabo mu ngano, sikila khulola balola ne se babona tawe, lundi barekeeresia ne se baulila tawe, namwe se bamanya tawe. 14#Isa. 6.9-10 Khu nibo kaba kario nio kechusibwe niko omung'oosi Isaya aaloma ali,

‘Mukharekeeresie ne se mukhaulile tawe,

mukhalole ne se mukhabone tawe.

15Sikila kimiooyo kiabwe kimilume,

ne kamaru kabwe kaminyaalile,

ne chimoni chabwe chabofuule.

Busa andi baboone,

lundi andi bauliile,

ne khumanyilisia mu miooyo kiabwe,

mala bangobolela ese mbaonie.’

16 # Lk. 10.23-24 “Ne kakhali enywe muli ne khabi! Sikila chimoni chenywe chibona ne kamaru kenywe kaulila. 17Ese muboolela enywe bung'ali, bang'oosi ne babaandu baluungi be khaale bakali bekoombanga khubona niko mubona kano, lundi khuulila niko muulila kano mala se bakaulila tawe.

Yesu enoosia lukano lwo omumiichi

(Mk. 4.13-20; Lk. 8.11-15)

18“Rekeeresia mala mumanye sifuno sie lukano lwo mumiichi. 19Yesi yesi oulila Elomo eye Bubwami bwe nwikulu ne se akimanya tawe, ali nga bumiicho bubwakwa khu ngila. Omumayaanu echaanga mala abukula kabialiilwe mu niye. 20Ne bubwamiichwa mwiloba lie khu mabaale, buli nga oyo oulila Elomo akifukiilila bwangu ne liliekhoya. 21Ne kakhali se akitiila tawe, elumilisiakho khulwe siise sitiiti, oli siibi ne butinyu bibao sikila Elomo eyo, ne bwangu akilekhuula. 22Ne bubwamiichwa mu mawa buli nga abo baulila Elomo, ne kakhali bibiindu bie sibala ne khusiima buiinda biira Elomo eyo, mala se saala kamatuunda tawe. 23Ne bubwamiichwa mu maloba kamalayi buli abo baulila Elomo bakimanya, basaala kamatuunda, balala emia ndala, babaandi kamakhumi sita ne babaandi kamakhumi kataru.”

Lukano lwe libaye mu ngaanu

24Yesu ababoolela lukano luluundi ali, “Bubwami bwe mwikulu bunyala khufwaananisibwa khu mundu owamiicha bumiicho bulayi mu mukuunda kwewe. 25Ne kakhali babaandu baba oli bakona, omusiku wewe echa amiicha libaye mu ngaanu, mala arekukha. 26Khwako engaanu nga yamela oli eraakho, libaye chana liamanyikhana. 27Bakholi bewe becha bamuboolela bali, ‘Omwami, ewe se wamiicha bumiicho bulayi mu mukuunda kwowo? Nono libaye nalio liamile waena?’ 28Abakobosia ali, ‘Omusiku niye okholile kano.’ Bakholi bamureeba bali, ‘Nono wenya khuche khulikhuule?’ 29Naye abakobosia ali, ‘Tawe, mukhola murio oli mulikhuula mwakhuulilamo engaanu. 30Lekha bioombi bichoele alala khukhwola mwikesa, ndilaka bakesa ndi, nyoa mukhuule libaye muliboe mu bikala muliosie mala mukese engaanu mala mu kibuunge mu sirara siase.’ ”

Lukano lwe khamiicho khe kumupeeli

(Mk. 4.30-32; Lk. 13.18-19)

31Yesu ababoolela lukano luluundi ali, “Bubwami bwe mwikulu buli nga khamiicho khe kumupeeli nikho omundu abukula amiicha mu mukuunda kwewe. 32Khali khakeekhe khukhila bumiicho bubuundi bwoosi, ne kakhali ne khakhulile khaba kumurongooro kumuboofu mu kioosi nikwo chinyuni chiicha ne chombakha biswi khu sakia chakwo.”

Lukano lwe limela

(Lk. 13.20-21)

33Yesu aabakanila lukano luluundi: “Bubwami bwe mwikulu buli nga limela nilio omukhasi abukula ne apaakhila mu bipanga bitaru bie bufu nabwila bwoosi buyiimba.”

Burumikhi bwa Yesu bwe chingano

(Mk. 4.33-34)

34Yesu aaboolela babaandu kano koosi mu ngano, se ababoolelakho sisiindu siosi siosi nekhali khubirira mu ngano tawe. 35#Chiny. 78.2 Aakhola ario nio niko omung'oosi aaloma kechusibwe.

“Ndilomaloma nabo mu ngano.

Ndiboola kakakiswa khukhwama nga sibala ne siabaang'anwa.”

Yesu enoosia lukano lwe libaye

36Nga Yesu arura mu baandu engila munju, babeeka bewe bacha niio ali bamuboolela bali, “Khwinooselie lukano lwe libaye mu mukuunda nga luboola.”

37Yesu akobosia ali, “Omiicha bumiicho bulayi ali Omwana wo Mundu; 38sibala nisio kumukuunda, ne bumiicho bulayi nibwo babaandu be Bubwami; libaye lili babaandu bo Mumayaanu, 39ne omusiku owabumiicha ali Sietani. Likesa lili Siieli sie sibala, ne bakesa bali malaika. 40Nga libaye libuusibwa ne khukhwosebwa mu mulilo, kaliba kario mu siieli sie sibala. 41Omwana wo Mundu aliruma malaika bewe mala babuusie khukhwama mu Bwami bwewe abo boosi batiimia babaandu khukhola bubwoni ne babaandi boosi bakhola bumayaanu, 42mala bakhabamwaate mu sioso sie kumulilo, mu bwene omwo babaandu balilila ne khukhwelumakaka. 43Nio baluungi balikhosia nga enyanga mu Bwami bwa Raarawabwe. Oli ne kamaru, aulile!

Lukano lwe libiikhilo liliakisibwa

44“Bubwami bwe mwikulu buli nga libiikhilo liliakisibwa mu mukuunda, nilio omundu anyoola elilisia mala mu khoyo yewe acha akusia bioosi nibio ali nabio, aakula kumukuunda mwene okwo.

Lukano lwe siimbi

45“Lundi Bubwami bwe Mwikulu buli nga omwofuli, oenja chisiimbi chindayi. 46Oli anyoola esiimbi ndala eye bukusi bukali, ne acha akusia bioosi nibio ali nabio mala akikule.

Lukano lwe lutiimba

47“Lundi Bubwami bwe Mwikulu buli nga lutiimba lulwamwaatwa mu nyanja mala lwabuusia ching'eeni buli lukano lwoosi. 48Nga lwechula, babaandu balukhwesa balura khu sikiingi, bekhala aasi, mala bangalamo chindayi bachira mu bikono mala bamwaata chimbi. 49Kaliba kario mu siieli sie sibala, malaika baliicha baukhasie babooni khukhwama mu baluungi, 50mala bamwaate babooni mu sioso sie kumulilo, mu bwene omwo balilila ne khukhwelumakaka.”

Bung'ali buyia ne bukhale

51Yesu abareeba ali, “Mwamanyile kano koosi ku?” Bamukobosia bali, “Yee.” 52Nio ababoolela ali, “Khwako omuandiki we Lilaka yesi yesi owekisiibwe khulwe Bubwami bwe mwikulu ali nga, omwene mungo obukula khukhwama mwibiikhilo liewe, bibiindu biyia ne bikhale.”

Yesu alobwa e Nasareti

(Mk. 6.1-6; Lk. 4.16-30)

53Yesu nga ne amala chingano chino, arura ebweeneyo 54akobola mu lukoba lwe wabwe. Ekisia mu sinakooki mwabwe mala babamurekeeresia bauka, baloma bali, “Omundu yuno amia waena bukesi ne kamayia kano? 55Yuno se ali omwana owo omundu ong'oonanga bibiindu bie chimbao? Maawe se ali Maria? Lundi bawandaaye se bali Yakobo, Yosefu, Simoni ne Yuda? 56Ne bakooko bewe boosi se bamenyile ano? Nono niye amia waena kano koosi?” 57#Yn. 4.44 Bamubonela niye bubi. Ne Yesu ababoolela ali, “Omung'oosi se ali ne fuma mu sibala siewe ne munju yewe omwene tawe.” 58Mala se akhola kamayia kamakali ebweeneyo tawe, sikila khutaamba lisuubila khwabwe.

Currently Selected:

Mat. 13: LUBUKUSU

Highlight

Copy