Mat. 12

Lireeba khuloondekhana ne ndaalo eya Sabato

(Mk. 2.23-28; Lk. 6.1-5)

1 # Likh. 23.25 Siise esio Yesu abirira mu mikuunda kie ngano khu ndaalo eye Sabato, babeeka bewe baba bali njala, mala barakikha khusasula bikala bie ngano ne bafuunga mala ne balia. 2Ne nga Bafarisayo babona bario, baboolela Yesu bali, “Lola, babeeka bowo balikho bakhola sikhali sie lilaka khukhola khu ndaalo eye Sabato tawe.”

3 # 1 Sam. 21.1-7 Yesu aabakobosia ali, “Se mwasoma niko Daudi ne babaandu bewe bakhola, ne bali ne njala tawe ku? 4#Bal. 24.9 Niye ne babaandu bewe bengila munju eya Wele ne khulia kimikaati kikiaanwa khu Wele, akhaba lilaka ne likhabafukiilila nibo khukilia tawe. Basaayi bong'ene nibo ba bafukiililwa khulia? 5#Khub. 28.9-10 Namwe mukhasomakho Mwilaka lia Musa nga buli ndaalo eya sabato basaayi mu Lukaangu bafunanga lilaka mala se babukulwa nga bafunile Lilaka tawe ku? 6Ese muboolela enywe, sisiindu sili ano siboofu sikhila Lukaangu. 7#Mat. 9.13; Hos. 6.6 Lundi abanga enywe mwamanya niko kano kaboola, kali, ‘Nenya siisa se nenya chimbosio tawe,’ andi se mwakhalakila abo bakhafunile Lilaka tawe. 8Sikila Omwana wo Mundu ali Omwami we Sabato.”

Omundu owafwokoya kumukhono

(Mk. 3.1-6; Lk. 6.6-11)

9Yesu ama ebweeneyo acha mu sinakooki mwabwe, 10nibwo omundu owafwokoya kumukhono aaba. Babaandu balala bareeba Yesu bali, “Lilaka liefwe lifukiilila khuonia omundu khu ndaalo eye Sabato ku?” Bareeba bario nio banyoole sifuno sie khuloma bali afunile Lilaka.

11 # Lk. 14.5 Yesu abakobosia ali, “Mundu siina khwinywe aaba ne ali ne likheese liewe lilala mala liakwa mwiloo khu ndaalo eye Sabato, se alirusiamo tawe ku? 12Omundu akhila likheese! Khwako lilaka liefwe likhufukiilila khuyeeta omundu khu ndaalo eye Sabato.” 13Nio aboolela omundu owafwokoya kumukhono chana oyo ali, “Kololosia kumukhono kwowo!” Omundu oyo aakukololosia mala kwaona kwaba nga kukuundi. 14Nio Bafarisayo barekukha bacha, mala bakhola ekwangwaani eye khukhwira Yesu.

Omukholi owaroborwa ne Wele

15Nga Yesu aulila ke kwangwaani eyo, arura ebweeneyo mala babaandu bakali bamuloondakho. Aonia balwaale boosi, 16ne khubaboolela ali mukhaboolelakho omundu yesi yesi khuloondekhana ne nase tawe. 17Aakhola ario nio niko Wele alomela mu mung'oosi Isaya kechusibwe.

18 # Isa. 42.1-3 “Yuno ali, omukholi wase omurobore niye nasiima,

lundi ousiimisia lukali.

Ndamurakho Roho wase,

ne aliboolela Be Chikholo likhalaka liase.

19Se aliyingana namwe ayokele tawe,

namwe alomalome lukali khu ngila tawe.

20Aliba omuolu khwaabo baali batekhele,

lundi owe siisa khwaabo bakhanyoola buyeeti tawe.

Aliba ne sinani nabwila alikhola bung'ali bube ne bukhili,

21ne chikholo choosi chiliba ne lilieyikina mu niye.”

Yesu ne Beelisebuli

(Mk. 3.20-30; Lk. 11.14-23)

22Nio bareerera Yesu omubofu lundi owaanda lulimi sikila aba ne sisieeno, Yesu amuonia. Omundu oyo alomaloma, lundi abona. 23Babaandu boosi bauka niko Yesu aaba nakholile ne bareebana bali, “Ng'ali yuno Omwana owa Daudi ku?”

24 # Mat. 9.34; 10.25 Nga Bafarisayo ne baulila bakobosia bali “Arusia bisieeno sikila omwami wabio Beelisebuli amuelesia bunyali bwe khukhola ario.”

25Yesu amanya kamebaasio kabwe, nio ababoolela ali, “Bubwami bwosi bwosi bukabukhana mala bwapana bubwene khu bubwene se bubaao siise sileeyi tawe, lundi mbao lukoba luboofu namwe enju ekabukhana yapana eng'ene khu ng'ene enyala yaiindila tawe. 26Ne liaba bali Sietani arusia Sietani aba akabukhanemo omwene, aba bubwami bwewe buleema buriena?” 27Lundi liaba bali ese ndusia bisieeno mu maani ka Beelisebuli, aba babaana benywe babirusia enje mu maani ka naanu? Khwako nibo baliba bakhalaki benywe. 28Ne kakhali ese naaba ne ndusia bisieeno mu maani ka Roho owa Wele, aba bubwami bwa Wele bwamwoleele enywe.

29“Namwe omundu engila ariena munju yo mundu owe kamaani mala amunuula bibiindu biewe, nakhanyoile aboa omundu owe kamaani oyo nio? Amunuula bibiindu ne amalile khumuboa.

30 # Mk. 9.40 “Okhali nase se ali lubeka lwase tawe, okhanjeeta khubuusia tawe asalanisianga. 31Khwako ese muboolela enywe ndi, babaandu banyala babeelwa buli bwoni ne embelekeu yabwe, ne kakhali okholela Roho Omutakatifu embelekeu se alibeelwa tawe. 32#Lk. 12.10 Omundu yesi yesi oolomaloma likhuwa liibi khu Mwana wo Mundu anyala abeelwa, ne yesi yesi oolomaloma likhuwa liibi khu Roho Omutakatifu se alibeelwa siise sino namwe sisiicha tawe.

Kumurongooro ne kamatuunda kakwo

(Lk. 6.43-45)

33 # Mat. 7.20; Lk. 6.44 “Kumurongooro ne kuli kumulayi kwaama kamatuunda kamalayi, ne kuli kumubi kamatuunda kakwo kamabi. Kumurongooro kumanyikhana khu matuunda kakwo. 34#Mat. 3.7; 23.33; 15.18; Lk. 3.7; 6.45 Enywe baana ba nafwo, munyala muriena mwaloma kamalayi ne muli bamayaanu? Sikila kumunwa kulomanga kamakali kaali mu mwoyo. 35Omundu omulayi amia kamalayi mu mwoyo kwewe kumulayi, ne omundu omumayaanu amia kamamayaanu mu mwoyo kwewe kumumayaanu

36“Ese muboolela enywe, khu ndaalo eye likhalaka buli mundu aliyaalwa sikila buli elomo niyo aloma. 37Mulikhalaka olibalwa khuba omuluungi namwe omwoni sikila chilomo chowo.”

Khukhwenya khubona kamayia

(Mk. 8.11-12; Lk. 11.29-32)

38 # Mat. 16.1; Mk. 8.11; Lk. 11.16 Nio balala khu baandiki ne Bafarisayo baboolela Yesu bali, “Omwekisia khwenya khubone ne okhola kamayia.”

39 # Mat. 16.4; Mk. 8.12 Naye abakobosia ali, “Eselukho embi lundi eye bukhobani eenja kamayia, ne mbao kamayia niko eliebwa ne kakhali kamayia ko omung'oosi Yona. 40#Yn. 1.17 Sikila nga Yona aba munda mwe ng'eeni emboofu chindaalo chitaru siilo ne kumuusi, akhaba Omwana wo Mundu yesi aliba mwiloba chindaalo chitaru siilo ne kumuusi. 41#Yon. 3.5 Khu ndaalo eye likhalaka babaandu ba Ninefe baliicha basitake eselukho yino, sikila nga Yona ne elwacha nibo bakaluukhana, ne sisiindu sikhilakho Yona sili ano! 42#1 Bab. 10.1-10; 2 Ke Ch. 9.1-12 Khu ndaalo eye likhalaka Kwini owa Sheba Siafubo aliicha asitake eselukho yino, ne khukikhalakila, sikila echa khukhwama khu siakamo sie sibala sino khuulila liliekisia lie limanya lio mwami Solomoni, ne sisiindu sikhilakho omwami Solomoni sili ano!

Khukobola khwe sisieeno

(Lk. 11.24-26)

43“Sisieeno ne sirurire mu mundu, sibirira a siangalaamwe, ne siyiima niio siiolela. Oli se sinyoola tawe, 44ne siloma sili, ‘Ndakobola munju yase nimwo naama!’ Oli sikobola sinyoola eli busa, mala enjeye, lundi yang'oonile. 45Nio sicha sireera bibiindi saba biili biibi khusikhilakho nisio, mala bingisia mu bweene omwo bimenyamo. Ne liiba lio omundu oyo liba libi khukhilakho mataayi. Kaliba kario khu selukho eya luno emayaanu.”

Maawe owa Yesu ne bawandaaye ba Yesu

(Mk. 3.31-35; Lk. 8.19-21)

46Siise esio Yesu nasilomaloma ne babaandu, maawe ne bawandaaye ba Yesu becha bema enje ne benya khulomaloma naye. 47Omundu mulala aboolela Yesu ali, “Maao ne bawandaayo bemile enje, balikho benya khulomaloma nawe.”#12.47 Chibibilia ndala se chili ne lunyilili luno tawe.

48Yesu akobosia omundu owamuboolela oyo ali, “Maayi niye naanu, ne bawandaayase nibo naanu?” 49Nio ekesia babeeka bewe aloma ali, “Lola! Maayi ne bawandaayase nibo bano! 50Yesi yesi okhola niko Paapa oli mwikulu enya, niye wandaayase omusoleeli, wandayaase omukhaana lundi maayi wase.”

Currently Selected:

Mat. 12: LUBUKUSU

Highlight

Copy