Mat. 11

Barumwa khukhwama khu Yoana Omubatiisi

(Lk. 7.18-35)

1Nga Yesu ne aamala khukhwekisia babeeka bewe ekhumi na babili, arura abuundu ao mala aachiililila khukhwekisia ne khukhwilwacha burume mu ngoba chabwe. 2Nga Yoana Omubatiisi ne aulila naali mu siboe niko Kristo aaba ne akhola, aruma babeeka bewe balalakho khu niye. 3Bamureeba bali, “Ewe niye oyo owenyibwa khukhwiicha, namwe khulindiilile okundi?” 4Ne Yesu abakobosia ali, “Cha muboolele Yoana niko muulile nende niko muboone. 5#Isa. 35.5-6; 61.1 Babofu babona, baleme bakeenda, be kamakele baona, bamiinyi baulila, bafu balamukha, ne babanani belwachilwa Elomo Endayi. 6Wele akhabiite chikhabi yesi yesi okhandoba ese sikila niko ekhola tawe.” 7Oli baarekukha Yesu arakikha khureeba babaandu khuloondekhana ne Yoana ali, “Mwachiile mu sichiimi nimwo Yoana abechanga khubona siina? Lubembe nilwo ekhuungu euucha? 8Nono siina sisiakila mwachayo? Khubona omundu owefwarire chingubo chindayi ku? Abo babefwara chingubo che bukusi bukali bali mu machipi ke babaami! 9Nono siina sisiakila mwachayo? Khubona omung'oosi? Yee ng'ali, ne kakhali mwabona okhila omung'oosi. 10#Mal. 3.1 Yuno niye kaandikwakho ne kaboola kali,

‘Ndaruma omurumwa wase ebweeni wowo,

mala akharekekhe engila ebweeni wowo.’

11Ng'ali ese muboolela enywe ndi, Yoana omubatiisi akhila babaandu boosi ba baamenya khu sibala khuno, ne kakhali oyo ooli omukeekhe lukali mu Bwami bwe mwikulu akhila Yoana. 12#Lk. 16.16 Khukhwama siise nisio Yoana elwacha burume bwewe khukhwola luno, bubwami bwe mwikulu bunyoolekhana mu maani ne be kamaani babunyoola 13Khukhwola khu siise sia Yoana bang'oosi boosi ne Lilaka lia Musa bang'oola khu Bwami bwe mwikulu, 14#Mal. 4.5; Mat. 17.10-13; Mk. 9.11-13 nono, mwaba ne mwenya khusuubila burume bwabwe, Yoana niye Elicha, niye bang'oola bali akheeche. 15Oyo oli ne kamaru aulile!

16“Nono ndekhaasia eselukho yino khu siindu siina? Eselukho yino eli nga babaana babekhaale khu soko ne balaanga nibo benyaanga nabo bali, 17‘Khwamupila kimilele ne se mwakhina tawe! Khwemba kimienya kie kamasika ne se mwalila tawe!’ 18Nga Yoana ne echa, eyimana khulia ne se anywakho endali tawe, baloma bali, ‘Ali ne sisieeno!’ 19Omwana wo Mundu echa, aalia ne khunywa, baloma bali, ‘Lola omundu yuno! Ali owe lulie ne kimeesi, omusaale we baroosia busuuru ne babooni!’ Kakhaba kario, limanya lia Wele limanyikhana khuba liang'ali khubirira mu matuunda kayo.

Chingoba chikhasuubila tawe

(Lk. 10.13-15)

20“Mala Yesu arakikha khukhwikiicha chingoba nicho akholamo kamayia kewe, sikila babaandu se bekanila tawe. 21#Isa. 23.1-18; Esek. 26.1—28.26; Yoe. 3.4-8; Amo. 1.9-10; Sak. 9.2-4 Be Lukoba lwa Korasini muli ne silaamo, be lukoba lwa Betesaita muli ne silaamo, sikila abanga kamayia kakakholwa mwinywe niko kakakhola mu baandu bamwo Tiro ne Sidoni andi befwara khale kamakunia, ne khukhweakha likokhe khukhwekesia liliekanila liabwe. 22Ne kakhali muboolela enywe, khu Ndaalo eye Likhalaka Wele alikholela siisa sikali khu baandu ba Tiro ne Sidoni khukhila enywe! 23#Isa. 14.13-15; Lir. 19.24-28 Ne ewe, Kaperinaumu! Wenyile weniinie wole khwikulu ku? Kane wikhisibwe wole emakoombe, sikila abanga kamayia kakekholekha mwinywe ako, niko kakekholekha mu lukoba lwa Sodomu, andi lusiiliio khukhwola endaalo yino! 24#Mat. 10.15; Lk. 10.12 Mumanye muli khu ndaalo eye likhalaka Wele alikholela Sodomu siisa sikali khukhila enywe!”

Yiicha khwise mala munyoole siiuluukho

(Lk. 10.21-22)

25Siise esio Yesu aloma ali, “Paapa, Omwami owe mwikulu ne sibala ese khupila orio sikila ewe wakisa bakesi nende be limanya bibiindu bino, mala wabibuula khu bakhaasoma tawe. 26Yee, Paapa, wasiima oli kakholekhe kario.

27 # Yn. 3.35; 1.18; 10.15 “Paapa ambeelesie ese bibiindu bioosi, se aliio yesi yesi omanyile Omwana tawe, nakhali Paapa, namwe se aliio omanyile Paapa tawe, nakhali omwana, ne oyo yesi yesi niye Omwana arobora khu mu buulila.

28“Yiicha khwise, enywe mweesi muluile sikila khusuta bisiro, mala ese ndamuulusia enywe. 29#Yer. 6.16 Khe mwireekho lichooki liase, mala mweyike khukhwama khwise, sikila ese ndi omuolu, lundi omukoosi mumwoyo, nanywe mulanyoola siiuluukho. 30Sikila lichooki liase se lili litinyu khusuta tawe? Ne busiro bwase buli bubwangu.”

Currently Selected:

Mat. 11: LUBUKUSU

Highlight

Copy