Khaazi 24

Ophukiwa wa Paawulu vakatthi wa Feelishi

1Eviriyeevo siikhu thaanu haakhimu nwulu wa tiini aniitthiwaaye Ananiiya khwiishukhela Sezareeya vamote na attunkhulu a tiini na namwaakisa aari wiitthiwaaye Terituulu. Yo khulawa khujithoonyeza wa nsatoro yoori anlokoveze vitthu Paawulu. 2Wakathi akhuweliweevo Paawulu, Terituulu khwaaza nlattu awe, araka: “Woohishimwiwa waziri khwa rehema yawo na nanna olanseliyeeyo na akhili zawo vakatthi wa atthu apa nimpuhela heeri khaamili. 3Khwa wakhula phantte ninkhupalela na ninshukhurwela zooshi orettiyeeyo woohishimwiwa Feelishi. 4Aphano akintakha wuurupazisa; tiito kinuuvekelaaye yoori onisiileze wakathi vattitthiiru na emaani yawo. 5Mwinyi otu, fweeyo ninimoona nkhama namakarewela antanaaye nzuuzu vakatthi wa mayaahuuti na mmuti wooshimo. Ye ti eeyiye namalokozela wa zoovonyeya za anazare. 6Othuuto aalakeliyeeyo okufurwela Nyuupa Yoosifwiwamo. Fweeyo nankhola yoori nimphuke khwa mwentto wa kano zeetthu. 7Ila khuta nttunkhulu wa anajanka aniitthiwaaye Liisiya, khunthuula mmakhono mweetthu na kuvu zawe zooshi. 8Khuruma yoori ate apale aari onluphatthaaye apha oriivo. Amana weeyo omuuzela ontta woona haakhi monkoni wa vitthu epo aninlokovezaaye.”

9Mayaahuuti ankhupalela olokova waya opo, alupaka yoori mattakhuzi aya apo aari a khweele.

Paawulu onthoonyeza ojaakisa wawe

10Nsatoro Feelishi khumwinkha alama Paawulu yoori attakhule, ye khutukhuru araka: “Miiyo kinjuwa yoori khaazi eti yoophuka waaza raku, tiito kinfurahela saaneene ojaakisa vakatthi vawo. 11Mwinlawa mwahakikhi yoori wala kifiyeeni siikhu khumi na piiri thanku kilawe Yeruzaleemu omwaaputu Nluku; 12wala apo anikilokovezaaye khakisikaneeni Nnyupa Woosifwiwamo keettaka onyakulisana na ntthu, wala owaalazela nzuuzu atthu nsinakooka wala nsitati; 13wala yo khanlawa opattha hakiikha ya vitthu zaya epo anikilupezaayo. 14Nakataalikha kintukhuru kiwuuzaka yoori nkatthi wa Tarikhi eti eniitthiwaaye yoovonyeya, kininrumeyela Nluku wa amarehemu apapazetthu, kikhupalelaka vitthu zooshi za kano na zawaatikhiwa pi manapiyu. 15Na kinaaye nroromelo khwa Nluku otthuupo arinaaye apa yoori owaapho osisimuwa wa anahaakhi na apale ohiina haakhi. 16Khwa attaapho theenya kinjilipisa yoori kiiyane rooho swaafi omaasho wa Nluku na wa anaatamu. 17Paata ya olaawo Yeruzaleemu khwa nyaakha vattitthiiru, kaaruteliyewo olawa othuula zimola yoori kawenkhe atthu a mmuti mwaka na kilawaka oretta twaha. 18Wakathi kaari orettaavo epo zaya, paata ya miiyo wiisha njampo la otwahareshiwa, mayaahuuti akina khukisikana phantte ya Nnyupa Woosifwiwamo, khaarivo atthu awaatta wala nzuuzu. 19Ila mayaahuuti akina a Aaziya aarina ya wiiya attaapha oriivo weeyo, asala alupa nkhama anaaye etthu ya okilupeza. 20Ama apa ariiye apha alupe husuti akisikananiyeeyo wakathi kaathuuliweevo kilawaniwa wa Mashawuriiya, 21woohiiyi mattakhuzi apa kilupiyeeyo wakathi kaari vakatthi vaya kiraka: ‘Leelo kintta ophukiwa ti mweeyo monkoni wa osisimuwa wa ananfwa.’ ”

22Aphano Feelishi aari ojuwa saaneene Tarikhi yaya etile, khukayirisa nlattu opule khuri: “Amana ata nttunkhulu Liisiya, phi kinttelaaye ottakhula nlattu enu mweeyo.” 23Na khunruma namalokozela wa anajanka yoori amweekesele Paawulu mphule aafukeliweemo, amwinkhe ruhusa ya owahi waawuniwa pi ashirikhaawe.

24Ziviriyeevo siikhu vattitthiiru, Feelishi khuta na Turusiila, muukha awe, aari yaahuuti. Khurumisa okhuweliwa Paawulu khunsiila attakhulaka amini khwa Yinsa Al-Masiihu. 25Ila wakathi Paawulu aaziyeevo ottakhula monkoni wa ohaayi wa shariya, ojishintta omwenyeweru na siikhu ya ophukiwa, Feelishi khwiiya wawoova na khuri: “Paasi! Saruwa, amana kuutakha kintta wuukhuwela theenya.” 26Feelishi aari onkhuwelaka Paawulu khusala apiyana mwaasa oonaka yoori onteela omwinkha nzurukhu. 27Noovira nyaakha miwiri, Feelishi khurentteriwa ti Poorisiyu Feeshitu. Feelishi aari otakha owaatuvelisa mayaahuuti, tiito khunlikha Paawulu ari nkalapooso.

Currently Selected:

Khaazi 24: eko

Highlight

Copy