Khaazi 23

Paawulu vakatthi wa Mashawuriiya

1Paawulu khuwaakhontolela maasho Mashawuriiya apale, khuri: “Attwiizaku, kineettettana Nluku, mpakha leelo eti rooho yaka khinikinkha hatha paathwili!” 2Ila haakhimu nwulu wa tiini aari wiitthiwaaye Ananiiya khuwaaruma apale amwaattamiyeeyo yoori ampiye Paawulu omilomo wawe. 3Aphano Paawulu khumuuza Ananiiya yoori: “Naafikhi, Nluku onttela wuuhukhumwela etthiipo! Weeyo weekhala apho yoori okiphuke khwa nanna enlupaazo kano. Khi onruma toovi opiiwa miiyo? Kano khilupeeni toowo!” 4Atthu apale amwaattameliyeeyo Paawulu khulupa yoori: “Ontta onttukhana haakhimu nwulu wa tiini ya Nluku?” 5Paawulu khujipu yoori: “Attwiizaku miiyo akaajuwiye yoori ye haakhimu nwulu wa tiini, maana yaatikhiwa yoori ohinttakhulele pure mfwalume wa atthu awo.” 6Aphano Paawulu noojuwa yoori atthu apale akinoko aari masatukhi na mafwarizeewu, khuttakhula woonyakulavo nnyupa mphule wa Mashawuriiya araka: “Attwiizaku, miiyo kinfwarizeewu, mwaana wa mafwarizeewu. Kimphukiwa mwaasa wa nroromelo aka wa osisimuwa wa ananfwa.” 7Alupiyeevo mattakhuzi apale, khupuwa onyakulisana nwulweene mafwarizeewu na masatukhi mpakha atthu apale waawanyeya. 8Maana masatukhi anlupa yoori khawiivo osisimuwa wa ananfwa, wala malayikha wala nafusi, ila mafwarizeewu ankhupalela vitthu zaya epo. 9Attaaphale khupuwa nzuuzu liwululene, anamanozela a kano apale aari mafwarizeewu khulankha khwaaza onyakulisana saaneene alupaka yoori: “Fweeyo khanimoonaneeni hatha etthu yoovonyeya ntthu otu. Paani ajuwiyeeyo nkhama Rooho Ttakatthiifu ama nlayikha leetta onttakhulana?” 10Nzuuzu ntthile khusala litepa mpakha nttunkhulu wa najanka khwaaza woova oonaka yoori Paawulu antta onvulalisa. Aphano khuwaaruma anajanka yoori anlazevo Paawulu vakatthi wa atthu apale anlawane puuro yookhomaaziwa.

11Osikhu wa phiiri Mbwana khumpuwelela Paawulu khumuuza yoori: “Ominyale, nkhama etthiipo waalaweliyeezo oshaahiti monkoni wa miiyo Yeruzaleemu, ona ya olawela theenya Rooma.”

12Mmeesho mwaya mayaahuuti akina khukusanyeya na khulapha yoori khaari oteela oja wala onywa maati ahimuuleeni Paawulu. 13Atthu aasiilaniyeeyo oretta vitthu zaya epo aavikaniye arupayiini. 14Apo khulawa wa mahaakhimu a tiini na attunkhulu a tiini amayaahuuti khuwooza yoori: “Nalaphela yoori khaninja hatha etthu mpakha nimuule Paawulu. 15Nakataalikha nasaapi, mweeyo na Mashawuriiya mwinvekele nttunkhulu wa anajanka yoori antiise Paawulu okhuno. Mwamuuze yoori ontakha wathola tholiwe nlattu awe saaneene. Aphano ye ahinate fweeyo najilikhanisa yoori nimuule.” 16Ila ntuuluwe Paawulu khusiila shawuri zaya epile. Khulawa mpakha puuro yookhomaaziwa khumuuza zooshi. 17Attaaphale Paawulu khunkhuwela namalokozela wa anajanka khumuuza yoori: “Onthuule shaapu otu onlawane wa nttunkhulu wa anajanka. Ye onaaye mattakhuzi onthatelela.” 18Etthiipo ye khunthuula khulawana wa nttunkhulu wa anajanka. Noofiya khuri: “Napherezu Paawulu eetta okikhuwela, khukivekela yoori kintiise shaapu otu onaaye etthu antakhaaye wuuthatelela.” 19Nttunkhulu otule khunkholela nkhono shaapu otule khunlawana othetekele, khumuuzela yoori: “Niini oriinaaye ya okithatelela?” 20Shaapu otule khujipu yoori: “Mayaahuuti awaza shawuri za wuuvekela yoori meesho ontane Paawulu wa Mashawuriiya yoori antholathole saaneene. 21Ohiwaalikhelele wuushintta, maana aziti arupayiini atthu anjitthekezayo yoori anvithaalele Paawulu. Yo alaphela yoori khanja wala khannywa maati ahimuuleeni. Pi oojitthenkeza nasaapi eti anuuweja owenkha ruhusa khwa etile avekiyeeyo.” 22Aphano nttunkhulu wa anajanka khuleezana na shaapu otule khumuuza yoori: “Ohimuuze hatha ntthu mattakhuzi apa okuuziyeeyo.”

23Paata ya wuuziwa mattakhuzi apale ye khuwaakhuwela anamalokozela awe a anajanka awiri khuwaaruma yoori: “Mwiwaatthenkeze anajanka miiya piiri, na saapiini awiiyana khavalo na miiya piiri awiiyana mikokhi alawe Sezareeya wakathi opule wa saattatthu ya osikhu. 24Mwitthenkeze theenya khavalo yoori Paawulu awele mwinthuule woomwinanelavo mwinlawane wa nsatoro Feelishi,.”

25Nttunkhulu wa anajanka khwaatikha warakha araka:

26“Miiyo Kalaawutiyu Liisiya,

kiniwaatikhela nsatoro nwulu Feelishi,

Salamu.

27Mwinyi otu afukisiwa pi mayaahuuti aari osaleela wuuliiwa, wakathi kifiyeevo miiyo, na anajanka aka khumuusuru maana kasopheliye yoori ye nnyunti wa Rooma. 28Kitakhaka ohakikhi niini aari olokoveziwaaye, khunthuula khulawana wa Mashawuriiya. 29Khulawa khujuwa yoori ye aari olupatthiwa mwaasa wa kano zaya, ila khaarina paathuli yaari osuhaaye wuuliiwa ama ofukeliwa. 30Wakathi kuuziweevo yoori zawaziwa shawuri za wuuliiwa, tiito kuuperekheziyeeyo weeyo woohirupazi. Theenya khurumisa yoori apale aninlupatthaaye awuuze etthu akosiyeeyo.”

31Anajanka apale khuretta khwa nanna etthiipile aarumiweezo, osikhu otthuupule khunthuula Paawulu khulawana mpakha Antipatiriite. 32Mmeesho mwaya anajanka khurutela puuro yookhomaaziwa, khuwaalikha anakhavalo yoori avire arettaka safwari na Paawulu. 33Anakhavalo apale afiiyeevo Sezareeya, khunfiisa Paawulu wa nsatoro na khuperekha warakha. 34Ye khusoma warakha etile na khumuuzela sitati yawe, wakathi ajuwiyeevo yoori aari wa Siliisiya khuri: 35“Kinttela osiila nlattu awo amana ata apale anuulupatthaaye.” Khurumisa olawa ofukeliwa Paawulu nnyupa khuulu ya Herooti.

Currently Selected:

Khaazi 23: eko

Highlight

Copy