Khaazi 25

Ophukiwa wa Paawulu ti Feeshitu

1Ziviriyeevo siikhu ttatthu paata ya Feeshitu ofiya nti aya opule, aavikaniye Sezareeya khuwelela Yeruzaleemu. 2Ottuukho mahaakhimu a tiini na mayaahuuti apale ooshitahiwa khuta aphale aariivo, khusala anlokoveza Paawulu. 3Khuveka ansafatalaka Feeshitu yoori Paawulu alawaniwe Yeruzaleemu, maana yo aasilaniye omuula ntarikhi. 4Feeshitu khuwaajipu yoori: “Paawulu afukeliwa Sezareeya, miiyo kintta ottuukhu woohirupazi. 5Ate attunkhulu enu nilawe mpakha ottuukhu alupe olokoveziwa waya opo, nkhama khweele aretta etthu yoovonyeya.” 6Ziviriyeevo siikhu naane ama siikhu khumi khusala alawa Sezareeya, mmeesho mwaya khwiikhala va khukulu ya ophuka na khurumisa yoori Paawulu atiisiwe attaaphale aariivo yo. 7Wakathi Paawulu atiiyeevo, mayaahuuti alankhiyeeyo Yeruzaleemu khukusanyeya attaaphale, khusala anlokoveza mattakhuzi awoopisa na ootakhala ila khuhimoonani hatha paathwili. 8Aphano Paawulu khusala ajaakisa alupaka yoori: “Akiretteeni hatha etthu yoovonyeya khwa kano za mayaahuuti wala Nyuupa Yoosifwiwamo ama Seezari.” 9Feeshitu, atakhaka owaatuvelisa mayaahuuti, khumuuzela Paawulu yoori: “Weeyo ontakha olawa Yeruzaleemu ophukiwa ti miiyo, monkoni wa mattakhuzi apa onlokoveziwaaye?”

10Paawulu khunjipu araka: “Miiyo kiri nnyupa yoophukiwa ya Seezari kiina yoophukiwa nttumpho. Akiwaaretteleeni hatha etthu yootakhala mayaahuuti nkhama etthiipo onjuwaazo. 11Nkhama khweele, kiina paathuli yooretta etthu enikisuhaaye ofwa, wala akinkatthala. Ila nkhama epi kinlokoveziwaaye pi mayaahuuti apa khahiyo za haakhi, khina ariina ruhusa okinkhelela mmakhono mwaya. Kininhirimiza Seezari!”

12Paata ya Feeshitu ottakhula na mashawuriiya awe, khunjipu yoori: “Wiiya wanhirimiza Seezari onttaniwa wa Seezari ottuukho.”

Feeshitu onimuuza Akiriipa nlattu wa Paawulu

13Ziviriyeevo siikhu vattitthiiru mfwalume Akiriipa na Bereniisi khulawa Sezareeya yoori anchelise Feeshitu. 14Eeshiyeevo siikhu zawaatta ari ottuukhule, Feeshitu khumuuza milattu epile za Paawulu mfwalume yoori: “Owaamo mwinyi mmote mphu Feelishi anfukeliyeeyo. 15Wakathi kilawiyeevo Yeruzaleemu, mahaakhimu a tiini na attunkhulu a tiini amayaahuuti khusala anlokoveza mattakhuzi, avekaka yoori enkhiwe paathuli. 16Miiyo khuwooza yoori khahiyo thwapiya za arooma omwinkha paathuli ntthu ahaazeeni owaakutthanisa na apale anlokoveziyeeyo, otule anlokoveziwaaye oniiyana ruhusa ya ojaakisa khwa epile anlokoveziwaazo. 17Weekhweele, afiiyeevo yo apha, woohirupazi mmeesho mwaya, khwiikhala va khukulu ya ophuka khurumisa otiisiwa mwinyi otule. 18Wakathi atiiyeevo apale aari onlokovezaaye yoori attakhule, khuhinlokovezi hatha husuti khwa nanna kaari wuupuwelaazo. 19Olikha epo, aari onlupeza monkoni wa tiini yaya na ntthu woofwa aari wiitthiwaaye Yinsa, othuuto Paawulu aari olupaaye yoori ori haayi. 20Miiyo khwiiya woohijuwi nanna ya wuuzela nlattu opu, tiito kaamuzeliyeeyo nkhama ye aari otakha olawa Yeruzaleemu aphukiwe ottuukho monkoni wa olokoveziwa. 21Ila Paawulu khuhirimiza yoori apwehiwe mpakha ate aphukiwe ti Seezari. Aphano miiyo khuruma yoori otu ona ya wiiya nkalapooso mpakha miiyo kimperekhe wa Seezari.”

22Aphano Akiriipa khumuuza Feeshitu yoori: “Miiyo kaari otakha onsiila mwinyi aya oto.” Feeshitu khunjipu araka: “Meesho ontta onsiila.”

23Attaaphale mmeesho mwaya, Akiriipa na Bereniisi khuta awaliye kuwo zootafikhana khuvira vansana wa mfwalume vamote na awaziri awulu na atthu ooshitahiwa a nsitati, khutiisiwa Paawulu khwa oruma wa Feeshitu. 24Aphano Feeshitu khuri: “Mfwalume Akiriipa na mooshi mweeyo mwiriiye apha, mwimoone mwinyi otu, mwaasa wa niini atthu ooshi a mayaahuuti anikiteelaaye miiyo waaza Yeruzaleemu mpakha okhuno, anyakulaka araka khayaari ofwayi mwinyi otu wiiya haayi. 25Ila miiyo kinoona yoori kharetteeni hatha etthu ansuhaaye wuuleeliwa. Mwaasa wa ye onhirimiza Seezari mfwalume wa Rooma, tiito kilakeliyeeyo omperekha wa mfwalume ottuukho. 26Khwa etthiipo, monkoni wa mwinyi otu akina hatha etthu yoomwatikhela mfwalume, tiito kintisiyeeyo vakatthi venu, haaswahaaswa vakatthi wa mfwalume Akiriipa yoori mwimuuzele kipatthevo etthu ya waatikha. 27Maana akinoona wiiya shariya omperekha napherezu olawa ophukiwa ehilupiweeni etthu anlokoveziwaaye.”

Currently Selected:

Khaazi 25: eko

Highlight

Copy