Khaazi 26

Ojaakisa wa Paawulu vakatthi wa mfwalume Akiriipa

1Aphano mfwalume Akiriipa khumuuza Paawulu yoori: “Weeyo onaaye ruhusa ya ojaakisa.”

Elottelanaka, Paawulu khuttha alama na nkhono awe khwaaza ojaakisa araka: 2“Mfwalume Akiriipa, kiina furaha khuluyeene mwaasa wa leelo wiiya omaasho wawo weeyo yoori kijaakise khwa zooshi kinlokoveziwaazo pi mayaahuuti, 3haaswahaaswa mwaasa wa ojuwa thwapiya na shawuri za mayaahuuti zooshi. Tiito kinuuvekela yoori okisiileze mooremoore.

4“Mayaahuuti ooshi anjuwa nanna kikhaliyeeyo osimaana aka, waaza khapila kivokoliweeyo mpakha Yeruzaleemu. 5Yo anikijuwa thanku raku anwahi olawela oshaahiti amana atakha, yoori miiyo keekhala nkhama mfwarizeewu kaari wa khuntti ethiiti ya tiini yeetthu. 6Apha kintta ophukiwa mwaasa wa nroromelo aka khwa etile Nluku awaahitiyeeyo amarehemu apapazetthu. 7Ethiito mahimo apale khumi na mawiri, aari owejelaaye ansifwaka Nluku na rooho yaya yooshi osikhu na nthana. Oo mfwalume, mwaasa wa nroromelo otthuupo, ti kinlokovezeliwaaye vitthu, pi mayaahuuti. 8Mweeyo mamwinyi, mwaasa aya niini, mwinoonaaye yoori Nluku khanwahi owaasisimula ananfwa?

9“Weekhweele na miiyo kaari woojishintta yoori kiina yooretta wakhula etthu ya wuumanana nzina la Yinsa wa Nazareeti. 10Zaari vitthu etthiipo kaarettiyeeyo Yeruzaleemu, khwa ruhusa ya mahaakhimu a tiini khuwaattha nkalapooso attakatthiifu awaatta, amana atakheliwaka wuuliiwa miiyo khaari otakhaka etthiipo. 11Wakathi mwinkeene kaari weettaka mmasinakooka olawa owaahukhumu attakatthiifu na owaakhanyarela okufuru, katapu kaariina khwa atthu apale yaakifiyelelisiye olawa sitati kiina kiwaalupatthaka.

Paawulu onlupa nanna anjuwiyeezo Yinsa

12“Khwa safwari epo kiina keettiye Tamaashiku, khwa ofwalume na ruhusa ya mahaakhimu a tiini. 13Payina ya saasiitha, kiri ntarikhi, oo mfwalume Akiriipa keetta woona nuuru yoolankha otulu yawaara zayita njuwa, yaarelaka aphale kaariivo na apale kaariina. 14Fooshi khukwela vathi. Aphano keetta osiila huula yaari okuuzaaye khwa luuka ya aramaayiku yoori: ‘Sawulu, Sawulu, onikilupatthela ni? Weeyo amana weekesa ohijali puutta ontta ojoonisa olwaaza omweenyewe.’ 15Aphano miiyo khumuuzela yoori: ‘O paani weeyo aya Mbwana?’ Khujipu Mbwana araka: ‘Ki Yinsa, otule weeyo oninlupatthaaye. 16Olankhe weemele, miiyo koopuwelela weeyo yoori kuuthawule wiiye karumeya na shaahiti aka, yoori owaathatelele akinoko epile wooniyeeyo leelo na epile kinttelaazo wuuthoonyeza. 17Kinttela owuusuru weeyo vakatthi wa mayaahuuti na amalapo, maana kinuuperekha vakatthi wa atthaapo. 18Yoori owaafunule maasho na owaalazemo n'yiiza owaatane nnuuru na owaalaze muuwahi wa epiliisi owaatane mmakhono wa Nluku, yoori apwekherele nswammaha wa twampi zaya, arithi na apale attakatthisiweeyo ti amini khwa miiyo.’

19“Khwa etthiipo mfwalume Akiriipa, miiyo akikhijileleeni othoonyeziwa wa pinkuuni. 20Khuwaatafusirela omwanzo apale aari wiikhalaaye Tamaashiku, paata ya okhule khuwaatafusirela apale aari Yeruzaleemu na Yudeya yooshi mpakha amalapo, kiwoozaka yoori mwithupwiye mwirutele wa Nluku, mwirettaka vitthu enthoonyezaaye othupwiya weenu. 21Mwaasa wa etthiipo, mayaahuuti akina aya khukikhola miiyo kiri Nnyupa Woosifwiwamo khusala atakha okuula. 22Ila kinaaye awuni ya Nluku mpakha siikhu eti ya leelo, na kiri apha mwaasa wa etthiipo kilazaka oshaahiti vakatthi wa atthu pure na apale ooshitahiwa. Akinlupa hatha etthu yohiiyi etile aalupiyeeyo manapiyu na Munsa yoori enteela orettikhana. 23Yo aalupiye yoori Al-Masiihu aari oteela ohoowa na eeye wamwanzo woosisimuwa muufwa yoori athoonyeze nuuru khwa mayaahuuti mpakha amalapo.”

24Wakathi otthuupule Paawulu eettaka ojaakisa, Feeshitu khuntapwatela khunyakula araka: “Weeyo onlolo, mwaasa wa osoma channu zintta owaashikha akhili!”

25Paawulu khujipu yoori: “Mfwalume Feeshitu, Miiyo akinlolo, vitthu kinlupaazo pi za haakhi na zooshapweya. 26Mattakhuzi aya apa ooshi mfwalume onjuwa, kinwahi omuuza saaneene maana khina moote erettikhaniyeeyo vahali woojiviteyavo. 27Mfwalume Akiriipa, oniwaakhupali manapiyu? Miiyo kinjuwa yoori oniwaakhupali.”

28Aphano Akiriipa khumuuza Paawulu yoori: “Apho weeyo onoona yoori khwa wakathi vattitthiiru onikishintta okirette wiiya namalottela wa Yinsa?”

29Paawulu khujipu araka: “Wakathi wa waatta ama vattitthiiru, kininvekela Nluku khahiyo khwa weeyo paasi, ila apale ooshi anikisiilaaye aretteye wiiya nkhama miiyo, woohiina makwinjili apa kiriina.”

30Mfwalume khulankha vamote na nsatoro na Bereniisi na apale eekhaliyeeyo attaaphale. 31Asaruwaka mphule khusala attakhula atthaaporu araka: “Mwinyi otu kharetteeni hatha etthu eninsuhaaye wuuliiwa ama ofukeliwa.” 32Akiriipa khumuuza Feeshitu yoori: “Ye aarina yootaphuliwa eriwaka khahirimiziye ophukiwa ti Seezari.”

Currently Selected:

Khaazi 26: eko

Highlight

Copy