Khaazi 18

Paawulu ori nti wa Korintiyu

1Paata ya toole, Paawulu khulankha Ateena khusala alawa Korintiyu. 2Ottuukho khunsikana yaahuuti mmote aniitthiwaaye Akiila, wa nti wa Pontu, eettaka otaru olankha Etaaliya na muukhaawe Pirisiila, maana mfwalume Seezari Kalaawutiyu eettiye oruma yoori mayaahuuti ooshi aleewo Rooma, Paawulu eetteliye owaathotola. 3Ye khusala eekhala vamote na yo, maana khaazi yaya yaari moote waattala heema. 4Wakhula saapatu aari weettaka nsinakooka khusala awaashintta mayaahuuti na makereeku.

5Wakathi Siila na Timootiyu eeshukheliyeevo Masetooniya, Paawulu khujinkha khwa olaza nttakhuzi, alawelaka oshaahiti khwa mayaahuuti yoori Yinsa ti Al-Masiihu. 6Ila mwaasa wa yo wiiphiiriwa ti Paawulu na okufuru, ye khulankha khutatha ajapi yawe khulupa yoori: “Ekwele veeshwa venu, taamu yenu! Miiyo Paawulu akina hatha paathuli. Mpakha apha, kineetta wa amalapo.” 7Attaaphale khuwaalikha atthu aya apale khulawa khweetta wa mwinyi mmote aari wiitthiwaaye Tiisiyu Nashariya aari omoovaaye Nluku. Nyuupa yawe yaattameliye sinakooka. 8Kirishipu, namalokozela wa sinakooka khunkhupali Mbwana, na ajamaaze ooshi na akorintiyu enkeene asiiliyeevo khukhupali khulawa khoosiwa.

9Osikhu mmote Mbwana khumuuza Paawulu nkatthi wa jozi yoori: “Ohoove; orutele otafusiri na wala ohinyamale. 10Maana miiyo kiri vamote na weeyo, khina etthu moote enttelaaye wuupuwelela yootakhala, maana miiyo kinaaye atthu awaatta sitati ethiiti.” 11Paawulu khwiikhala ottuukhule mwaakha na nyeezi sitha eettaka owaasomisa nttakhuzi la Nluku.

12Wakathi Kaaliyu enkhiweeyo onsataro wa nti wa Akaaya, mayaahuuti khukusanyana khusiilana, khukholiwa Paawulu khunlawana onyuupa woophukiwamo milattu. 13Khusala alupa yoori: “Otu ontakha owaathowelelisa atthu omwaaputu Nluku woohiiyi khwa nanna enlupaazo kano.”

14Wakathi Paawulu aari otakhaavo waaza ottakhula, Kaaliyu khuwooza mayaahuuti yoori: “Mayaahuuti! Eriwaka mwaari olupa vitthu zootakhala arettiyeezo ama husuti, yaari wiiya yooshapweya miiyo wuusilezani. 15Ila nkhama nlattu wa mattakhuzi, na mazina na kano zenu, mwiphuke mweenyewe. Miiyo akeepu wiiya namaphuka wa vitthu nkhama epo!” 16Khuwaasarulamo nnyupa mphule woophukiwamo milattu. 17Ooshi khunrikaanyela, Sositeene nttunkhulu wa nsinakooka, khusala ampiya omaasho wa nyuupa woophukiwawo milattu, ila Kaaliyu khuhinjali vitthu zaya epile.

Pirisiila, Akiila na Apoolu

18Paawulu khwiikhala Korintiyu ottuukhule siikhu zawaatta. Nawiisha khuwaaleza attwiize khulokhela nti wa Siiriya, aaperekhiwe ti Pirisiila na Akiila. Ahinattikhe khunyoola eeshwa yawe Senkereeya, athoonyezaka alama ya oretta etthu amwahitiyeeyo Nluku. 19Paata ya ofiyaza Eefezu, Paawulu khunlikha Pirisiila na Akiila. Ye khuvira nsinakooka khwaaza opiya mwaasa na mayaahuuti. 20Mayaahuuti apale khuvekela yoori eekhale siikhu zawaatta vamote na yo, ye khukatthala. 21Ila khuwaaleza araka: “Kinlawa karuti amana Nluku atakha.” Khupakhira nkalawa khulaawo nti wa Eefezu. 22Afiiyeevo Sezareeya, khulawa mpakha va ojama wa Nluku olawa ochelisa. Khuvikana khusala alawa Antiyookiya.

Safwari ya ttaatthu ya Paawulu

23Paata yoovirisa wakathi vattitthiiru Antiyookiya, Paawulu khuvira nti wooshi wa Kalaasiya na wa Firijiya, awaalipiselaka anakhiyoni ooshi.

24Wakathi aya otthuupule, Eefezu khutawo yaahuuti mmote wa nti wa Alishanteriya aari wiitthiwaaye Apoolu, mwinyi oto aari ntthu wa akhili na aarina ojuwa nwulweene wa mattakhuzi a nkithaapu. 25Anozeliwe tarikhi ya Mbwana aari ottakhula na osomisa wookhomaalavo monkoni wa Yinsa, ila aari ojuwa woosa wa Yaahaya Namoosa paasi. 26Khwaaza ottakhula woominyalavo nsinakooka wakathi Pirisiila na Akiila asiiliyeevo, khunthuula khulawa omweeleza saaneene monkoni wa tarikhi ya Nluku.

27Apoolu khusala atakha olawa nti wa Akaaya, attwiize khunlipisela na khuwaatikhela warakha anakhiyoni yoori ampwekherele. Noofiya khuwaawuni apale aakhupaliyeeyo khwa rehema, 28maana khwa owahi nwulweene, aari owaashintta mayaahuuti nhali waawaattiwamo ahakikhaka khwa zawaatikhiwa yoori Yinsa ti Al-Masiihu.

Currently Selected:

Khaazi 18: eko

Highlight

Copy