Khaazi 19

Paawulu nti wa Eefezu

1Wakathi Apoolu aari Korintiyu, Paawulu khuvira miti epile za nkulu za Aaziya, khulawa mpakha Eefezu. Ottuukho khuwaasikana anakhiyoni akina, 2khuwoozela yoori: “Mwapwekherela Rooho Ttakatthiifu wakathi mwikhupaliyeevo?” Khujipu yoori: “Wala na khannasiile yoori ewaapho Rooho Ttakatthiifu.” 3Aphano Paawulu khuwoozela yoori: “Woosani moosaniweeyo?” Khujipu araka: “Woosa wa Yaahaya namoosa.” 4Paawulu khuri: “Yaahaya aretta woosa wa othupwiya, awoozaka atthu yoori ankhupali otule anttelaaye ota nyumani wawe, anlupaka Yinsa.” 5Yo wakathi asiiliyeevo mattakhuzi apale, khulawa woosiwa khwa nzina la Mbwana Yinsa. 6Wakathi Paawulu awaattheliyeevo makhono, khuweeshukhela Rooho Ttakatthiifu khwaaza ottakhula luuka pheeya na ohupiri. 7Ooshi aari atthu khumi na awiri.

8Khwa nyeezi mittatthu, Paawulu aari weettaka nsinakooka, attakhulaka woominyalavo monkoni wa ofwalume wa Nluku. 9Ila akinoko aya khuumisa rooho zaya khukatthala okhupali, khusala attakhula vitthu zootakhala monkoni wa Tarikhi ya Yinsa eettaka olupa vamwanttiwa. Paawulu, khuwaasusa apale aya, khuwaathuula anakhiyoni, khusala awaasomisa siikhu zooshi nlipantta la Tiraanu. 10Khuvira awaasomisaka mpakha nyaakha miwiri, atthu ooshi aari wiikhalaaye Aaziya khusiila nttakhuzi la Mbwana waaza mayaahuuti mpakha akereeku.

11Nluku khwa nkhono wa Paawulu aari oretta minjuza zootikinisa. 12Mpakha atthu akina aari othuulaka khiyempa na kuwo aari okholelaaye khaazi, noowaasapana alwele aya noovona, apale aariina masheethwani mmwiili mwaya noowaasaruwa.

13Mayaahuuti akina aari wiikarakaaye masheethwani aari weezelela okhuwa khwa nzina la Mbwana Yinsa eekaranaka masheethwani araka: “Khwa nzina la Yinsa, ntthi Paawulu anlaleyaaye, miiyo kinuurumani yoori mwisaruwe!” 14Atthu aari orettaaye vitthu zaya epo aari aana sapa a yaahuuti mmote aari wiitthiwaaye Shekewa, haakhimu wa tiini ya mayaahuuti. 15Aphano sheethwani khuwaajipu yoori: “Yinsa miiyo kininjuwa, Paawulu kininjuwa, khi mweeyo mwa paani?” 16Attaaphale otule aariina sheethwani, khuweerukhela khusala awaapiya khuwavulalisa mpakha khuwaashintta ooshi, khutthiramu nnyupa mphule kuwo zaya ziri zoovaruwa.

17Wakathi zijuwiweevo vitthu epile pi mayaahuuti na akereeku aari wiikhalaaye sitati ya Eefezu khuweetaala woova na nzina la Mbwana Yinsa khwiiya loowulisiwa. 18Atthu apale aakhupaliyeeyo khusala ata oteela otukhuru twampi zaya na olupa siiri zaya za khaazi zootakhala aari okholaazo. 19Na atthu enkeene apale aari orettaaye majintta, khukusanya kithaapu zaya khulukuza atthu ooshi eettaka woona. Noorettiwa hisapu kithaapu epile, nzurukhu aya waari ofiya alufu hamusiini nzurukhu wa feeta. 20Khwa nanna etthiipo nttakhuzi la Mbwana khusala limwazeya wookhomaalavo.

21Paata ya vitthu epile, Paawulu khulakela nroho mwawe ovira nti wa Masetooniya na wa Akaaya alawaka Yeruzaleemu. Khulupa yoori: “Nawiisha othotola Yeruzaleemu, enikihithajiya olawa Rooma.” 22Aphano Paawulu khuwaaperekha Masetooniya atthu awiri apale aari omwaawunaaye, Timootiyu na Eraashitu, ila ye khusala nti wa Aaziya wakathi vattitthiiru.

Nzuuzu nti wa Eefezu

23Wakathi aya otthuupo laapuwiye nzuuzu liwululene monkoni wa Tarikhi. 24Namafula pirinku mmote aari wiitthiwaaye Temeetiriyu, aari waattalaaye miphiko za feeta za nyuupa ya nluku Tiyaana, zaari owenkha fwayita mafunti apale aari waattalelaaye. 25Khuwaalaleya mafunti apale akina khukusanyeya na vamote khuwooza yoori: “Mamwinyi, mwinjuwa yoori khaazi yeetthu enninkha fwayita khuluyeene? 26Ila mwinoona na mwinsiila khahiyo Eefezu eti paasi, ila Aaziya yooshi Paawulu otu onlaza mattakhuzi oovonyeya awaashittanaka atthu yoori awaathowelelise awoozaka yoori miluku zawaattaliwa pi makhono a enaatamu khina fwayita. 27Khahiyo hasara ya khaazi yeetthu paasi ohiina fwayita, ila theenya zaawiya ya nluku eetthu Tiyaana, enttela wiiya yootarawiwa, atthu ooshi a Aaziya na olumwenku wooshi aari omwaaputwaaye anteela wiiya ootapanyeya na siifwa yawe enttela ovukuwa!”

28Atthu noosiila mattakhuzi apale khwiiya ookatipukha khukhuwa araka: “Nwulu ti Tiyaana wa a eefezu!” 29Nsitati mphule wooshimo khupuwamu nzuuzu, atthu apale khunkhola Kaayu na Arishitaruku aari wa Masetooniya, ashirikha awiri a Paawulu khuwaapurula mpakha puuro ankusanyeyaavo atthu. 30Paawulu aari otakha yoori ajithoonyeze vakatthi wa atthu ooshi ila anakhiyoni khuhintakhisi. 31Afwalume a nti otthuupule, apale aari ashirikha a Paawulu khuleezela nhupi, yoori ooziwe Paawulu ahilawe puuro etile.

32Wakathi aya opule atthu aari oozinkireya: Akina aari okhuwa alupaka etthu kiina na akina etthu kiina hatha atthu enkeene kaari ojuwa niini aateeliyeevo. 33Aphano mayaahuuti khunsukhumela Alishantere wiilokozi, atthu apale akina aari vakatthi wa khuntti etile khunnozela etthu yoolupa. Ye khuttha alama na nkhono awe atakhaka ojaakisa vakatthi wa atthu. 34Ila wakathi anjuwiyeevo yoori yaahuuti, ooshi khunyakula khwa huula moote wakathi miwiri alupaka yoori: “Nwulu ti Tiyaana wa a eefezu!” 35Namwaatikha wa nsitati nttumphule khuwaanyamaza atthu apale araka: “A eefezu, paani ahinjuwaaye yoori sitati ya Eefezu ti eneekeselaaye zaawiya ya Tiyaana, nluku nwulu, liwe likwiiyeeyo pinkuuni? 36Khina antakhaaye okheeti vitthu zaya epo, enuuhithajiyani wiiya oonyamala mwihirette vitthu na varanka. 37Mweeyo mwawaatiisa mamwinyi apa apha, ila apo aya kharetteeni etthu yootakhala yoovirikanisa mwentto wa zaawiya ya nluku etthu, wala khanveyiseeni nluku eetthu oto Tiyaana. 38Ila nkhama Temeetiriyu na ashirikha awe anaaye etthu yoolupa ooniyeeyo ya paathuli, nyuupa yoophukiwawo milattu ti yoofukuliwa awaakho atthu oophuka mwiwaalikhe alupe. 39Nkhama mwinaaye etthu kiina mwintakhaaye olupa epo enttela ophukiwa vakatthi wa atthu enkeene. 40Mwaasa wa vitthu ziviriyeeyo, entta onipattha hasara yoolokoveziwa wiiya atthu oovirikanisa. Maana khayiivo shariya yookhupalela nzuuzu nttho.” 41Paata ya olupa mattakhuzi apale, Ye khwiishisha nthukumano opule.

Currently Selected:

Khaazi 19: eko

Highlight

Copy