Khaazi 17

Paawulu na Siila sitati ya Tizaloonika

1Aviriyeevo Anfiipoli na Apolooniya, khufiya Tizaloonika, ohali yaariiwo sinakooka ya mayaahuuti. 2Nkhama etthiipo aazowereliyeezo, Paawulu aaviriye nsinakooka Saapatu ttatthu, khusala amanyamanya Zawaatikhiwa Ttakatthiifu, 3aweelezaka na awaathoonyezaka yoori Al-Masiihu aarina yoofwa na asisimuwe muufwa. Khulupa yoori: “Yinsa othuutu miiyo kinuufiselanini Al-Masiihu ti othuuto.” 4Mayaahuuti akina aya khukhupali mattakhuzi apale khukusanyeya na Paawulu na Siila, na akereeku awaatta a rooho ya omoova Nluku, na aakha ooshitahiwa.

5Ila mayaahuuti khuwaata nrima liwululene. Khuwaakusanya atthu otakhala rooho na ohiina raayi na khuntti ya atthu akina, khusala alaza nzuuzu nsitati. Khulawa khupwecha nyuupa ya Yasooni omweettela Paawulu na Siila, yoori awaakhole awaatise vakatthi wa atthu. 6Khuhiwaasikaniwo, tiito khunkhola Yasooni na attwiize akinoko, khuwaatana vakatthi wa attunkhulu a sitati ethiitile, anyakhulazaka araka: “Apa pi antothaaye wuumani olumwenku wooshi, apha afiya mmuti mphu, 7amaka owawe Yasooni otu. Apa aya ooshi ankheeti epile Seezari arumiyeezo, anlupa yoori apuwa mfwalume nkina enriwaaye Yinsa.” 8Asiiliyeevo mattakhuzi apale, atthu na afwalume a nsitati khwiiya ootapanyeya. 9Ila paata yooripha hisapu ethiito oziweeyo, afwalume, khunlikha Yasooni na apale aariinaaye.

Paawulu na Siila sitati ya Bereeya

10Nooripa attwi khumperekha Paawulu na Siila weetta sitati ya Bereeya. Noofiya Bereeya yo khweetta nsinakooka ya mayaahuuti. 11Atthu a Bereeya khaarina shawuri zoofukeya zayita atthu a Tizaloonika; yo aapokhereliye nttakhuzi la Nluku na niiya khuluyeene, khusala apheleleza siikhu zooshi Zawaatikhiwa Ttakatthiifu yoori oone nkhama zooshi zaari etthiipi. 12Khwa etthiipo mayaahuuti awaatta khukhupalela, theenya amalapo, aakha ooshitahiwa na alume awaatta.

13Wakathi mayaahuuti a Tizaloonika ajuwiyeevo yoori Paawulu aari ovira alaleyaka nttakhuzi la Nluku sitati ya Bereeya, khusala eetta ottuukho olawa olaza nzuuzu na owaatapanya atthu. 14Nasaapiru attwi khumperekha Paawulu yoori alawe nti wa waattamela pahari, ila Siila na Timootiyu khusala Bereeya ottuukhule. 15Apale aari omperekhaaye Paawulu, anlawaniye mpakha sitati ya Ateena, yo khurutela Bereeya, Paawulu khuwaalezela nhupi yoori amuuze Siila na Timootiyu alawe ottuukhule aariiwo, woohirupazi.

Paawulu sitati ya Ateena

16Paawulu aari Ateena ottuukhule nalelo anwejaka Siila na Timootiyu, rooho yawe khwiiya yoonyonyeya mwaasa wawoona sitati etile yooshi yitaaliye sanamu. 17Tiito, amana eetta nsinakooka ye aari okheetisanana mayaahuuti na akereeku apale omoova Nluku. Wakhula siikhu aari olawaka valipuwa aari othukumanaavo atthu olawa okheetisanana na wakhula otule aari onsikanaavo. 18Asomi akina ashikola yaari wiitthiwaaye Epikure na kiina yaari wiitthiwaaye Eshitoyiku khusala akheetisanana na Paawulu. Akina khusala alupa yoori: “Otu woothaala nkhanyo onri niini apha?” Akina khusala alupa yoori: “Talili oniwaalupa a miluku oohijuweyi,” maana Paawulu aari otafusiri hapari zooshapweya monkoni wa Yinsa na monkoni wa osisimuwa. 19Yo khunthuula Paawulu khunlawana onthukumano waari wiitthiwaaye Areyopaku, ottuukhule yo khusala amuuzela araka: “Nintakha nijuwe masomi ni apa mapheya onitiseliye fweeyo? 20Weeyo ontta onuuza shawuri zoohijuweeyi, nintakha nijuwe maana aya.” 21Waaza atthu Ateena mpakha amalaponi aari wiikhalaaye ottuukhule, khaari ojali hatha etthu woohiiyi ottakhula ama osiila mattakhuzi awiishela.

22Aphano Paawulu khulankha vakatthi wa nthukumano wa Areyopaku, khulupa yoori: “Mamwinyi a nti opu wa Ateena! Menttezi enu ooshi kinoona yoori mweeyo mwa annya tiini ooziti. 23Kazukulela sitati eti yooshi, wakhula vahali khusala kisikana vitthu mwinaaputwaazo hatha kansikana alitaari#17:23 Alitaari puuro ya waaputiwavo ama yoorettiwavo twaha. aatikhiweeyo yoori: nluku woohijuwiwi. Othuuto, mwinimwaaputwaaye mwihinjuwaka, ti othuuto kininlupaaye miiyo kiwuuzakani.

24“Nluku othuuto ompiye olumwenku na vitthu zooshi ziriimo othuuto ti eeyiye Mbwana wa pinkuuni na vathi apha, ye khaniikhala nnyupa yawaattaliwa pi makhono enaatamu. 25Ye khanrumeyeliwa pi makhono enaatamu nkhama anthowiwaaye ti etthu, maana ye ti awenkhiyeeyo ohaayi atthu ooshi, khuwenkha phuumu na vitthu kiina. 26Atthu a khapila zooshi awompa khwa ntthu mmote paasi, yoori eekhale muulumwenku, ye khutthoma wakathi na khuwenkha puuro yawiikhala khapila zaya epo. 27Nluku aretta vitthu zaya epo yoori atthu ooshi amweekese ampapaselaka talili awahi onsikana, maana ye khari woolepawo na fweeyo. 28‘Khwa Ye niniikhala, nineettetta na ninaaye ohaayi,’ nkhama etthiipo anamwiipa akina anlupaaye yoori ‘fweeyo na aanaawe ye.’

29“Nkhama, khweele, na aana a Nluku, ti yootakhala ofikhirela yoori ye alattanana mphiko wa weero, ama feeta wala liwe, lawaakanyereliwa ti pinaatamu khwaattaliwa. 30Raku, Nluku khazaari onjali vitthu zaya epo, ila aphano alupa yoori atthu a phantte zooshi athupwiye. 31Ye atthoma siikhu anttelaaye ophuka olumwenku na shariya, khwa ntthu mmote anthawuliyeeyo na athoonyeza vakatthi wa atthu khwa onsisimula muufwa.”

32Atthu apale nonsiila Paawulu alupaka monkoni wa osisimuwa wa ananfwa, akina khwaaza onveyisa, akina khusala alupa yoori: “Fweeyo mwaasa aya apo onlupaaye, khunitosheeni nintakha osiila wakathi nkina teenya.” 33Attaaphale Paawulu khulaavo vakatthi vaya. 34Atthu akina khukhupali khukusanyeya na ye, apo aya ari Diyoniisiyu wa Areyopaku, na muukha mmote aari wiitthiwaaye Damarishi na atthu akina aya.

Currently Selected:

Khaazi 17: eko

Highlight

Copy