Khaazi 16

Timootiyu onimperekha Paawulu na Siila

1Paawulu khuthotola Teerepe khuvikanela Liishitera, ottuukho aari wiikhalaawo nakhiyoni mmote aari wiitthiwaaye Timootiyu. Mamaawe aari yaahuuti namalottela wa Yinsa ila papaawe aari nkereeku. 2Attwiize a Liishitera na Ekooniyu khusala anlawela oshaahiti wooshapweya. 3Paawulu khusala atakha yoori alawane, khunkhiriyisa mwaasa wa mayaahuuti aari wiikhalaaye nti otthuupule, maana ooshi aari onjuwa yoori papaawe nkereeku. 4Wakhula sitati aari oviraaye, aari owoozela attunkhulu a ojama wa Yinsa yoori oruma waawaziweeyo pi maaswihaapa na anamalokozela a ojama wa Nluku a Yeruzaleemu wiiye wooshututeliwa. 5Etthiipile ojama wa Nluku weetta okhomaala nkatthi wa amini, na wakhula siikhu atthu khusala atepa weekezeleya.

Jozi ya Paawulu nti wa Torowaati

6Paawulu na ashirikhaawe khuretta safwari ya nti wa Firijiya na wa Kalaasiya, khukhattaziwa ti Rooho Ttakatthiifu olaleya nttakhuzi nti wa Aaziya. 7Wakathi afiyeevo mmwiinano wa Miisiya, khuvira alawaka nti wa Bitiiniya, ila Rooho ya Yinsa khuwaakhattaza. 8Aphano khuvira Miisiya khwiishukhela Torowaati.

9Osikhu Paawulu khunteela jozi, mwinyi mmote wa Masetooniya aari wa weemela anvekelaka yoori: “Ovire Masetooniya ote onaawuni.” 10Paata ya jozi etile Paawulu khujitthenkeza nasaapiru yoori nilawe nti wa Masetooniya, nimariselaka yoori Nluku eetta onikhuwela olawa owaalaleyela hapari zooshapweya.

Okhupali wa Liitiya sitati ya Filiipu

11Nilankhiyeevo Torowaati, khulokhela nti wa Samotoraasi, mmeesho mwaya khweetta Neyapolishi. 12Khulokha ottuukho khweetta Filiipu nti wa Masetooniya yaari sitati yootafikhana ya nti aya otthuupule waalokozeliweeyo pi arooma sitati khuulu ya nti wa Masetooniya. Ottuukhule khwishawo siikhu vattitthiiru.

13Saapatu neetta olaamo nsitati khulawa mpakha omuttho, ohali naari woonaawo yoori ninpatthawo puuro yoolompavo. Khwiikhala khwaaza opiya mwaasa na aakha aakusanyeyiyeeyo ottuukhule. 14Muukha mmote aari wiitthiwaaye Liitiya aari woonisiileza saana. Aari wuuzanyisaaye kuwo zawooneela wa sitati ya nti wa Tiyatiira. Liitiya aari woomoova Nluku, Mbwana khunfukula rooho yawe yoori apwekherele etile Paawulu aari olupaaye. 15Nawoosiwa na atthu ooshi a vaje vawe, khunivekela saaneene araka: “Nkhama mweeyo mwinikitthantta na mwinihakikhi yoori kinamalottela wa Mbwana wa waamineya, mwite mwiikhale onti.” Khwa ethiito khunishintta.

Paawulu na Siila nkalapooso

16Siikhu moote neettaka olawa ohali onlompiwakaawo, khunsikana njaazi aariina sheethwani, woopiya sako. Khwa ethiito, ambwanazawe khusala ampatthela nzurukhu. 17Mwanankha khusala anlottelela Paawulu na fweeyo eettaka onyakula araka: “Mamwinyi apa akarumeya a Nluku Nwulu wa pinkuuni na anlaleya hapari za tarikhi ya nusura.” 18Ye khusala avira arettaka etthiipile khwa siikhu zawaatta. Paawulu khunshokheza, khuzukuluwa khumuuza sheethwani otule aariina mwanankha otule yoori: “Khwa nzina la Yinsa Al-Masiihu miiyo kinuuruma yoori oleemo mmwiili mwawe!” Nasaapiru sheethwani otule khunlikha.

19Ooniyeevo ambwanazawe yoori fwayita etile aari opatthelakaaye mwanankha otule yeesha, khunkhola Paawulu na Siila khuwapurulela vahali ankusanyeyakaavo atthu omaasho wa afwalume. 20Khuwaathoonyeza afwalume alupaka yoori: “Mamwinyi apa mayaahuuti antta otapanya sitati yeetthu, 21alaleyaka thwapiya ziiyiye haraamu opokherela ama oretta maana fweeyo na arooma.”

22Atthu khukusanyeya khukukutteliwa Paawulu na Siila, afwalume khuruma yoori avuliwe kuwo zaya na ajaphiwe. 23Paata yoojaphiwa channu, khulawa khweeseleliwa nkalapooso. Namweekesela wa kalapooso khurumiwa yoori asala aweekesela saaneene. 24Ooziweevo mattakhuzi apale, khuwaathuula khuwaattha nkalapooso yoolipaneya, khuwaafukelela moolu aya va viika.

25Osikhu layili, Paawulu na Siila eetta olompa na omwiipela maliipo asiifwa Nluku, anamafukeliwa akina eettaka owaasiila. 26Nasaapiru khupuwa esikinyaatthi khuluyeene yaakurumuliyeeyo muuri wa kalapooso. Nasaapiru milako khufukuwa, na makwinjili afukaniweeyo ooshi khuttumula. 27Namweekesela otule khulankha aphale aari olalaavo khoona milako za kalapooso ziri zoofukuwa, khuthuula phanka yawe yoori ajuule aari woona yoori anamafukeliwa apale atthiramo. 28Paawulu khukhuwa alupaka yoori: “Ohijirette hatha etthu yootakhala, fooshi niri nttumphu!”

29Namweekesela otule khuveka emwasikhelo, khuvira nkalapooso mphule eettaka otthira ari woozinkuwa khulawa khukokhora omaasho wa Paawulu na Siila eettaka othukumela. 30Aphano khuwaasarulela vaje khuwoozela yoori: “Mamwinyi, kirette ni yoori kuusurukhe?”

31Yo khujipu yoori: “Omwaamini Mbwana Yinsa ontta wuusurukha weeyo na ajamaazo.” 32Yo khuntafusirela nttakhuzi la Nluku na atthu ooshi a vaje vawe. 33Wakathi otthuupule woosikhu, namweekesela otule khoosa makhwatta aya, na ye khulawa khoosiwa na ajamaaze ooshi. 34Khuwaathuula khuwaalawana owawe khuwenkha etthu yoojiwa na atthu ooshi a vaje vawe khwiiya ofurahi mwaasa wonkhupali Nluku.

35Noocha anamaphuka khuwaaruma anajanka wa namweekesela wa kalapooso olawa olupa yoori: “Owaafukulele mamwinyi apo!” 36Namweekesela khumuuza Paawulu yoori: “Afwalume alupa yoori weeyo na Siila mwifukuleliwe. Apho mwileemo mwilawe na heeri.”

37Ila Paawulu khuwooza mawaziri apale yoori: “Fweeyo na arooma, yo anijapha nhali wa waattiwamo nihipukhiweene khwa hatha etthu khunittha nkalapooso, apho, yo antakha onilikha sirini? Khaneepu! Mwawooze atthaapo ate anifukulele.” 38Mawaziri apale khulawa khuwooza afwalume, noosiila yoori atthu apale aari arooma khoova. 39Khuta oteela owaavekela nswammaha, khuwaasarulamo nkalapooso mphule, khuwooza yoori aleemo nsitati mphule. 40Wakathi aliiyeemo nkalapooso, Paawulu na Siila khulawa owawe Liitiya, ottuukho awaasikaniyeewo attwiizaya na khuwaalipisela khuvira alawaka.

Currently Selected:

Khaazi 16: eko

Highlight

Copy