Khaazi 13

Safwari yamwanzo ya Baranabe na Sawulu yoolawa olaleya hapari zooshapweya

1Ojama wa Nluku wa Antiyookiya aarivo manapiyu na anamanozela, Baranabe, na Simiyooni aari wiittheliwaaye Wooriipa, Luusiyu wa Sireene, Manayimu aaleliweeyo vamote na nsatoro Herooti wa phiiri na Sawulu. 2Eettaka omwaaputu na ofuka, Rooho Ttakatthiifu khuwooza yoori: “Mwimphakule nasaapi Baranabe na Sawulu yoori akhole khaazi yaka kiwaakhuweleliyeeyo.” 3Aphano yo khufuka na khulompa khuwaattheela makhono khuwaaperekha.

Sawulu na Baranabe anlaza oshaahiti esura ya Shiipere

4Aperekhiweevo ti Rooho Ttakatthiifu, khulawa mpakha nti wa Seluusiya ottuukho khulokhela esura ya Shiipere. 5Noofiya nti wa Salamiina, khusala alaleya nttakhuzi la Nluku nsinakooka ya mayaahuuti, aarina Yaahaya anjuwaniwaaye Maaruku aari namwaawuni.

6Alokhiyeevo visura zooshi mpakha Paafu, khunsikana yaahuuti mmote wa majintta, napiyu woojipanka aari wiitthiwaaye Bariyinsa. 7Oto aari onlokozaka mfwalume Seerishiyu Paawulu, aari ntthu wa akhili. Mfwalume otule khunkhuwelisa Baranabe na Sawulu aari otakha osiila nttakhuzi la Nluku. 8Ila Elimaashi namajintta maana a nzina lawe khwa luuka ya ekereeku aari muumani wa maaswihaapa. Ye aari otakha omwaattuwananisa amini mfwalume. 9Sawulu, aniitthiwaaye Paawulu, wa wiitaala Rooho Ttakatthiifu, khunkhontolela maasho, 10khumuuza yoori: “Mwaana wa sheethwani wamwiitaala ottettekha na zootakhala zooshi, atuwi wa shariya! Khunlikha otapwatela tarikhi za wookowa za Mbwana? 11Apho, ojuwe yoori nkhono wa Mbwana ontakha wuumanana weeyo, onttela ofwa maasho, ovirevo wakathi paasi ohoonaka njuwa.” Nasaapiru khunteela tthapo na yiiza, eettaka weettetta etthiipile khusala ajizukulela amweekesa ntthu wonkholela nkhono. 12Mfwalume nawoona etile yaarettikhaniyeeyo khukhupalela na khwiiya wootikinisiwa pi masomi a Mbwana.

Paawulu onlaza oshaahiti Antiyookiya ya Pisitiya

13Paawulu na ashirikhaawe khupakhira nkalawa nti wa Paafu, khusala alawa Peereje ya Panfiiliya. Yaahaya khuwaalikha ottuukhule ye khurutela Yeruzaleemu. 14Alankhaka Peereje khufiya Antiyookiya ya Pisitiya, khusala alawa nsinakooka siikhu ya Saapatu,#13:14 Saapatu yaari siikhu Ttakatthiifu ya ovumula wa mayaahuuti. Saapatu yaya eti jumwa monsi. noofiya khwiikhala. 15Nawiisha osomiwa kithaapu ya thawurethi na kithaapu za manapiyu attunkhulu a nsinakooka khulupa yoori: “Attwiizetthu, nkhama mwinaaye mattakhuzi owaalipisela atthu, mwilupe.”

16Paawulu khulankha khuttha alama na nkhono ya owaanyamaza atthu, khulupa yoori: “Atthu a Ezirayiilu na mweeyo akina mwinimoovaaye Nluku, mwikisiileze. 17Nluku wa meezirayiilu awaathawula apapazetthu eekhalaka nti wa Misuri, khuwaaretta wiiya atthu awaattelana. Ye khuwaalazawo khwa owahi nwulweene. 18Khuwaavilela khwa thwapiya zaya zootakhala nyaakha arupayiini n'yaara mphule aarimo. 19Atapanyiyeevo khapila sapa nti wa Kanaani, khuwaarithisa nti wa atthu aya atthaapo. 20Zooshi epo zaaviriye kiyasi ya nyaakha miiya nne na hamusiini.

“Nawiisha, khwinkhiwa anamaphuka mpakha wakathi wa napiyu Samuweele. 21Aphano atthu khusala anveka mfwalume, Nluku khuwenkha Sawulu mwaana wa Khiishi wa lihimo la Bejami. Aalokozeliyeeyo nyaakha arupayiini. 22Nonlikhisa Sawulu, Nluku khunlansa Daawuuda khumwinkha ofwalume nkhama etthiipo alaweliyeeyo oshaahiti yoori: ‘Kampattha Daawuuda mwaana wa Yeese, nlume wa va rooho vaka anttelaaye oretta matakhelo aka.’

23“Khwa ojama ya othuuto, nkhama etthiipo ahiitiyeezo Nluku, antiisa Yinsa yoori eeye Namuusuru wa Ezirayiilu. 24Ahinate Yinsa, Yaahaya atafusiri njampo la woosa woothupwiya khwa atthu ooshi a Ezirayiilu. 25Wakathi aari weettelaaye wiishisa khaazi zawe Yaahaya aalupiye yoori: ‘Mweeyo mwinikoona nkhama paani? Aki otu mwinimupuwelaaye, ila onttela ota onyoko waka otule kihinsuhaaye ofukula mikhoyi za jampali zawe.’

26“Attwiizaku aana Eburahiima na mweeyo akina aya mwinimoovaaye Nluku, fweeyo naperekheziwa hapari epi za nusura. 27Atthu a Yeruzaleemu na afwalume aya khanjuwiye paani Yinsa, ila anhukhumwelaka ofwa aari weettettisela mattakhuzi alupiweeyo ti manapiyu, aari osomiwaaye wakhula saapatu. 28Hatha ahimoonaneeni etthu ya paathuli yawuuleliwa, anvekeliye Pilaatu yoori ooliiwe. 29Paata ya oretta zooshi zaatikhiweezo monkoni wa ye, khulaziwavo vansalapa aphale khutthiiwa nlikurakuza. 30Ila Nluku khunsisimula muufwa. 31Siikhu zawaatta ooniwe pi apale aalawaniyeeyo Kalileya eettaka Yeruzaleemu. Apo aya pi eeyiye mashaahiti awe vakatthi wa atthu.

32“Fweeyo na waatafusirela hapari zooshapweya, epile Nluku awaahitiyeeyo amarehemu apapazetthu, 33ye anirettela fweeyo naana awe, khunsisimula Yinsa nkhama etthiipo zaatikhiweezo Nzaapuura#13:33 Woone kithaapu ya Zaapuura 2:7. yoori:

“ ‘Weeyo o mwanaka;

leelo na miiyo karetteya wiiya papaawo.’

34Nluku ansisimula Yinsa yoori ahivutte khulupa yoori:

“ ‘Kinteela owinkhani mweeyo parakha za amini na zoottakatthifu ahitiweeyo Daawuuda.’

35Tiito theenya ye alupiyeeyo phantte kiina ya Zaapuura yoori:

“ ‘Khunteela onkhupalela Nttakatthifu awo ovutta mwiili awe.’

36Paata ya Daawuuda onrumeyela Nluku khwa nanna aari otakhaazo, eetta ofwa khulawa, khwiiya vamote na amarehemu apapaze na khuvutta. 37Ila otule Nluku ansisimuliyeeyo khavutteeni.

38“Nakataalikha attwiizaku, kintakha mwijuwe yoori mooziwa monkoni wa nswammaha wa twampi. 39Khwa ye, wakhula otule ankhupalaaye ontta ohakikhiwa khwa vitthu zooshi zahaari onhakhikhisaazo kano za Munsa. 40Mwijinanele yoori zihuurettikhaneleni epi alupiyeezo manapiyu:

41“ ‘Moone, mweeyo mwininveyisaaye Nluku,

mwishanke na mwitapanyeye,

maana siikhu zenu etthiipi kinlawa karette etthu,

awuuziyeni ntthu khamwaari oteela waamini.’ ”

42Wakathi Paawulu na Baranabe aari osaruwaavo nnyupa woolompiwamo, atthu khusala akhanyarela onvekela yoori ate alupe theenya monkoni wa mattakhuzi apale saapatu kiina. 43Paata ya wiisha nkutthaano, mayaahuuti awaatta na atthu akina asilimweliye oyaahuuti khusala anlotta Paawulu na Baranabe. Yo khusala awaalipisela awoozaka yoori ajilipesena rehema ya Nluku.

44Saapatu kiina, atthu a sitati yaya etile khukusanyeya yoori asiile nttakhuzi la Mbwana. 45Mayaahuuti noowoona atthu apale, khuwaata nrima na khusala anttukhana Paawulu na okheeti mattakhuzi apale aari olupaaye.

46Aphano Paawulu na Baranabe khuwaajipu woojilipisavo yoori: “Yaari ohithajiya waaza wuutafusirelani nttakhuzi la Nluku. Mwaasa wookatthala khinuusuhini opwekherela ohaayi wa mileele, apha nintta olawa nawaalaleyele amalapo. 47Etthiipo Mbwana aniruma yoori:

“ ‘Miiyo kuuretteni mweeyo onuuru ya amalapo,

yoori mwithuule nusura mwilawane mpakha okhu wiisheliyeewo olumwenku.’ ”

48Asiiliyeevo atthu, amalapo khwiiya ofurahi khuttottopela nttakhuzi la Mbwana, ooshi aathawuleliweeyo ohaayi wa mileele khukhupalela.

49Nttakhuzi la Mbwana khumwazeyela nti wooshi. 50Ila mayaahuuti khusala awaatumerela aakha ooshitahiwa na anamalokozela a nsitati khuwaakhitiri. Khwaaza onlupattha Paawulu na Baranabe khusala aweekara mmuti mwaya mphule. 51Attaaphale khutatha lifufu laari mmoolu mwaya, khusala alawa nti wa Ekooniyu. 52Anakhiyoni aari ovira eetaalaka furaha na Rooho Ttakatthiifu.

Currently Selected:

Khaazi 13: eko

Highlight

Copy