Khaazi 12
12
Ofukuliwa wa Pheeturu nkalapooso
1Wakathi aya opule, mfwalume Herooti aarumiye okholiwa atthu akina a ojama wa Nluku atakhaka yoori awaahukhumu, 2khumuula Tiyaaku, ttwiiye Yaahaya, na phanka. 3Aphano, ye nawoona yoori vitthu epile mayaahuuti zaari zowaatuvela, khuruma okholiwa Pheeturu. Wakathi laari orettiwaaye njampo la phaawu yoohiina fwaramento. 4Paata ya okholiwa Pheeturu khutthiiwa nkalapooso. Elottelanaka Herooti khuruma yoori asala eekeseliwa ti khuntti nne za anamweekesela, wakhula khuntti anajanka wane. Herooti aalakeliye omphuka Pheeturu vakatthi wa atthu paata ya wiisha njampo ntthile.
5Pheeturu khuvira nalelo ari nkalapooso, ila ojama wa Nluku waari oretta weettaka onvekela Nluku woohilikheleli.
6Osikhu otthuupule Herooti aari weettelaaye omphuka Pheeturu, ye aarettiye eettaka olala vakatthi wa anamweekesela awiri, afukiwe na makwinjili na anamweekesela akina aari vanlako eekesalaka kalapooso. 7Nasaapiru khupuwa nlayikha la Mbwana, nuuru yaya khumwasikhela nkalapooso. Nlayikha ntthile khulawa mpakha phantte etile aariwo Pheeturu, khunsapa ye khusisimuwa. Khumuuza yoori: “Waakuve, olankhe!” Aphano, makwinjili apale afukaniweeyo khuvuleya mmakhono mwawe.
8Nlayikha khumuuza yoori: “Owale kuwo zawo na tamanko zawo.” Pheeturu khulankha khuwala. Khumuuza theenya yoori: “Owale ajapi yawo, okilotte.” 9Pheeturu khusaruwa khusala alotta nlayikha ntthile, ila ahikhupalelaka yoori vitthu epile aari orettaazo nlayikha ntthile zaari khweele; ye aari woona nkhama jozi. 10Khunvirela namweekesela wamwanzo, khunvirela otu wa phiiri, khulawa mpakha khusikana nlako wa yuuma waari osaruwelaaye vaje. Nlako opule khufukuwa ottho, yo khusaruwa. Noosaruwa, eettaka weettetta ntarikhi, nlayikha ntthile khuzimweela. 11Aphano Pheeturu khusala alupa yoori: “Kahakikhi yoori khweele Mbwana aperekha nlayikha lawe khuta okuusuru mmakhono wa Herooti na shawuri zooshi za mayaahuuti aari weekeselaaye.”
12Paata ya omweeleya vitthu epile zooshi, khulankha khusala alawa wa Mariyamu mamaawe Yaahaya, anjuwaniwaaye nzina la Maaruku, ottuukho akusanyeyiyeewo atthu khusala alompa. 13Pheeturu noofiya khuttha khomaala, khuta karumeya mmote aari wiitthiwaaye Rooti oteela omoona. 14Ye noojuwa yoori huula ya Pheeturu, khuhiwahi hatha ofukula milako, khusala aruti eettaka onyakula arina furaha khuluyeene, araka: “Pheeturu ori vanlako!” 15Ashirikhaawe khumuuza yoori: “Weeyo ona wazimu!” Ila ye khusala akhanyarela awoozaka yoori ti Pheeturu. Yo khulupa yoori: “Talili nttho nlayikha lawe.” 16Pheeturu khurutela ottha khomaala, noofukula atthu apale khunsikana khweele ari othuuto, ooshi khwiiya ooshanka. 17Ye khulansa nkhono awe khuwenkha alama yoori eeye oonyamala, khusala awaathatelela nanna Mbwana anlaziyeemo nkalapooso na khuwooza yoori: “Mattakhuzi apa mwinjuwise Tiyaaku na attwiizetthu.” Khulankha khusala alawa phantte kiina.
18Noocha anamweekesela apale a kalapooso khusala ari ootikinisiwa venkivene, mwaasa woohijuwi niini yanrettikhaneliyeeyo Pheeturu. 19Amwekesiyeevo khuhisala ampattha, Herooti khusala awoozela anamweekesela na khuruma wuuliiwa anamweekesela aya apale a kalapooso.
Ofwa wa Herooti
Attaaphale Herooti khulankha khusala alawa Yudeya eettaka Sezareeya, khulawa khwiikhala ottuukho wakathi wa waatta. 20Herooti aari owakatipukhela atthu a Tiiru na atthu a Sitooni; yo khusiilana olawa okutthanana ye yoori anvekele asala asiilana. Paata ya opattha waawuniwa ti Palaashitu nakhaazi nwulu wa mfwalume Herooti, khuveka osiilana, maana etthu yoojiwa aari ojaaye atthu apale yaari olankha nti otthuupule wa mfwalume.
21Siikhu yaasiilaniweeyo okutthana, Herooti awaliye kuwo zawe za ofwalume, khwiikhala va khukulu ya ofwalume, khusala attakhula vamote na atthu apale. 22Yo khwaaza onyakula araka: “Eto huula ya nluku khahiyo ya pinaatamu.” 23Aphano wakathi otthuupule nlayikha la Nluku khunvulalisa Herooti mwaasa woohinttitthimisi Nluku; khujiwa pi nyunku khufwa.
24Aphano nttakhuzi la Nluku khusala liwula na limwazeya.
25Baranabe na Sawulu nawiisha khaazi zaya, arutaka Yeruzaleemu, khunthuula Yaahaya, anjuwaniwaaye nzina la Maaruku.
Currently Selected:
Khaazi 12: eko
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
