Khaazi 14

Paawulu na Baranabe sitati ya Ekooniyu

1Paawulu na Baranabe sitati ya Ekooniyu eettiye nsinakooka ya mayaahuuti. Nttumpho khusala attakhula mpakha khufiyelela atthu enkeene onkhupali Yinsa waaza mayaahuuti mpakha amalapo. 2Ila mayaahuuti apale ahaakhupaliyeeyo khusala awaatakhela viittha amalapo yoori oomanane mamuumini. 3Mwaasa wa ethiito Paawulu na Baranabe eeshiye siikhu zawaatta ari Ekooniyu ottuukhule, attakhulaka monkoni wa Mbwana woohiina hatha hoofu. Mbwana aari olipisela nttakhuzi la rehema arettaka alama na minjuza khwa khaazi etile aari okholaaye yo. 4Atthu a mmuti mphule khwaawanyeya, akina khwiiya phantte ya mayaahuuti akina khwiiya phantte ya maaswihaapa. 5Aphano mayaahuuti na amalapo, vamote na attunkhulu aya khujilakelela yoori awaapweche maaswihaapa na owaahukhumu. 6Yo noosiila shawuri epile, khutthirela sitati ya Liishitera na Teerepe nkatthi wa nti wa Likayooniya na miti za waattamanana. 7Noofiya khurutela olaleya hapari zooshapweya.

Ovonisiwa wa ntthu woorakala Liishitera

8Liishitera aariwo mwinyi woorakala moolu khaazi yawe yaari wiikhala, olwele aya opo eettiye ovokoleliwa. 9Mwinyi otule khunsiila Paawulu eettaka ottakhula. Wakathi Paawulu amwekesiyeevo khumoona yoori aarina amini ya otakha ovonisiwa, 10khumuuza woonyakulavo araka: “Olankhe! Weemele!” Khulankha khwiirukha khwaaza weettetta.

11Wakathi atthu apale ooniyeevo etile aarettiyeeyo Paawulu, khwaaza onyakula khwa luuka ya Likayooniya araka: “Miluku zaniishukhela zumpuwaka nkhama atthu!” 12Baranabe khutthajiwa nzina la nluku Zeewu, Paawulu khutthajiwa nzina la nluku Heerimeshi, maana aari ye aari ottakhulaaye. 13Namalokozela wa nluku Zeewu, nyuupa aari osifwiwamo yaari othetekele wa sitati, khutiisa mompe na jarata ya maluwa vanlako wa sitati ethiitile, maana atthu aya ari otakha yoori awenkhe twaha.

14Aphano maaswihaapa apale, Paawulu na Baranabe noojuwa vitthu epile, yo khuvarula kuwo zaya khutthirela enakatthi nakatthi ya khuntti ya atthu, eettaka onyakula 15araka: “Mweeyo, niini epi zaya mwinrettaazo? Fweeyo na anaatamu nkhama mweeyo. Ila nootiseliyeni hapari zooshapweya, zinlupaaye yoori mwilikhe oretta vitthu zoohiina maana mwirutela olottela mwentto wa Nluku wa ohaayi, otule ompiyeeyo pinku na vathi, pahari na vitthu zooshi ziriiye va olumwenku. 16Khwa siikhu ziviriyeezo nyumani, Nluku aalikhiye khapila zooshi olotta tarikhi zaari otakhaazo. 17Ye khuhilikhi olaza oshaahiti, athoonyezaka okemaani awe, atiisaka vuula pinkuuni na wuuruliwa peewu wakathi khwaamili, awenkhaka etthu yoojiwa yoowaafiyela na rooho za wiitaala furaha.” 18Olikha toowo, Paawulu na Baranabe arina tafwawuthi khuluyeene yoowaalikhisa atthu apale owaarettela twaha.

19Aphano khuta mayaahuuti akina oolankha sitati ya Antiyookiya na Ekooniyu, khushintta khuntti etile ya atthu apale, khusala anvonya Paawulu na mawe, khumweeselela othetekele wa sitati, oonaka yoori eetta ofwa. 20Ila wakathi atiiyeevo anamalottela a Yinsa khunzukulela eetta olankha khurutela nsitati. Siikhu ya phiiri ye na Baranabe khusala alawa sitati ya Teerepe.

Paawulu na Baranabe anrutela Antiyookiya ya Siiriya

21Paawulu na Baranabe khulaleya hapari zooshapweya sitati etile na khuwaaretta anakhiyoni awaatta. Nawiisha khurutela Ekooniyu, Liishitera na Antiyookiya. 22Awaakhomaazaka na owaatumerela anakhiyoni yoori ajilipisane amini na awoozaka theenya yoori: “Ennihithajiya ovirela tafwawuthi zawaatta yoori neette muufwalume wa Nluku.” 23Paawulu na Baranabe khusala awaathawula attunkhulu a ojama wa Nluku na owaattha wakhula ojama wa Nluku. Noowaalompela noofuka anvekelaka Mbwana othuutule yo ankhupaliyeeyo. 24Paawulu na Baranabe khulawa mpakha nti oniitthiwaaye Pisitiya khuvikana khweetta Panfiiliya. 25Paata ya otafusiri nttakhuzi la Nluku nti wa Peereje, khwiishukhela nti wa Ataaliya.

26Noolankha Ataaliya khulokha arutelaka Antiyookiya, ottuukho enkheleliweewo rehema ya Nluku khwa khaazi etile eettaaye wiishisharu. 27Noofiya Antiyookiya okhule, khuwaakusanya atthu apale a ojama wa Nluku khusala owooza zooshi epile Nluku aarettiyeeyo khwa yo na nanna aafukuliiyezo milako za amini khwa amalapo. 28Yo eekhaliye siikhu zawaatta vamote na anakhiyoni a Yinsa a Antiyookiya.

Currently Selected:

Khaazi 14: eko

Highlight

Copy