Khaazi 11

Pheeturu oniwooza mamuumini vitthu zaarettikhaniyeeyo

1Maaswihaapa na attwi ooshi a Yudeya khusiila elupiwaka yoori amalapo apwekherela nttakhuzi la Nluku. 2Pheeturu noorutela Yeruzaleemu, apale a khuntti yookhiriya khusala annyakulisa amuuzaka yoori: 3“Weeyo wavira nnyupa wa atthu oohikhiriyi na wajana.”

4Aphano, Pheeturu khwaaza owooza zooshi zanrettikhaniyeeyo woolotteyavo araka: 5“Miiyo kaari sitati ya Yoope, keettaka olompa khuthoonyeziwa. Khoona etthu nkhama nkhumi nwulweene waari wiishukhaaye pinkuuni woofukiwa mashaka mane waatiye mpakha aphale kaariivo. 6Keekesiyeevo nkatthi wa nkhumi opule, keetta woona nyama za moolu mane za vaje, nyama za ntthuttu, nyama zoojipurula vathi na anyannyi ootulu. 7Khusiila theenya huula yaari okuuzaaye yoori: ‘Olankhe Pheeturu! Oshije na orafune.’

8“Miiyo khujipu yoori: ‘Wala, Mbwanaaka, akinaje etthu ya haraamu wala yoohifwayi.’ 9Khusiileya huula ya pinkuuni ya phiiri eraka: ‘Etile Nluku ahalalishiyeeyo ohiharamushe.’ 10Vitthu zaya epo zaarettikhaniye swaafu ttatthu, zooshi khuthuuliwa khuweziwa pinkuuni.

11“Wakathi otthuupule, nyuupa etile kaamakiyeewo khutawo atthu attatthu aperekhiweeyo Sezareeya. 12Rooho Ttakatthiifu khukuuza yoori kiwaalotte woohiina hatha shaakha. Attwi apa sitha theenya khulawa vamote na miiyo. Khuvira nnyupa wa mwinyi aya otule. 13Ye khumuuza nanna nlayikha lampuweleliyeezo owawe limuuza yoori: ‘Orume weetteliwa Simawu aniitthiwaaye Pheeturu. 14Othuuto ontta owuuza mattakhuzi, khwa atthaapo ontta wuusurukha weeyo na atthu ooshi a vaje vawo.’

15“Wakathi kaaziyeevo ottakhula, Rooho Ttakatthiifu yeetta oweeshukhela nkhama etthiipile yaaniishukheliyeeyo omwanzo ene. 16Aphano miiyo khuupuwela etile Mbwana aanuuziyeeyo yoori: ‘Yaahaya awoosani na maati, ila mweeyo mwinttela woosiwa na Rooho Ttakatthiifu.’#11:16 Woosiwa opu ona maana otupweziwa eto enthoonyeza yoori Yinsa onttela onitupweeza nkatthi wa Rooho Ttakatthiifu. 17Nakataalikha Nluku awenkha tthuvo, ethiito aninkhiyeeyo fweeyo paata ya onkhupali Mbwana Yinsa Al-Masiihu, kaari paani miiyo wonkhijilela Nluku?” 18Noosiila mattakhuzi apale, khuhiruteli olupa mattakhuzi makina, khunsifu Nluku araka: “Khweele, mpakha amalapo Nluku awenkha othupwiya yoori apatthe ohaayi.”

Ojama wa Nluku wa Antiyookiya

19Apale aamwazeyiyeeyo mwaasa wa olupatthiwa waazaniyeeyo ofwa wa Shiteevawu, khufiya nti wa Feniisiya, esura ya Shiipere, na sitati ya Antiyookiya, alaleyaka hapari khwa mayaahuuti paasi. 20Akinoko apale aari a Shiipere na sitati ya Sireene, khulawa Antiyookiya khusala awooza akereeku hapari monkoni wa Mbwana Yinsa. 21Nkhono wa Mbwana waari vamote na yo, atthu awaatta khukhupali khusala anlotta Mbwana.

22Hapari epile khufiya va ojama wa Nluku Yeruzaleemu, yo khumperekhawo Baranabe Antiyookiya. 23Noofiya khoona rehema ya Nluku, khwiiya woofurahi na khuwaalipisela yoori eeye ookhomaala mmakhono wa Mbwana na rooho yaya yooshi. 24Baranabe aari ntthu nkemaani wawiitaala Rooho Ttakatthiifu na amini. Atthu awaatta khusala ajikusanya na Mbwana.

25Aphano, khulankha Baranabe khusala alawa sitati ya Taarusu omweettela Sawulu. 26Wakathi ansikaniyeevo khunthuula khusala alawa Antiyookiya. Yo aari wiiya okusanyeya na ojama wa Nluku wa Antiyookiya noowaasomisa atthu awaatta khwa mwaakha ntero. Antiyookiya pu ohali anakhiyoni aziiyeewo wiittheliwa nzina la atthu a Al-Masiihu.

Akaapu onlaleya jala ya waatta

27Siikhu zaya epile manapiyu akinoko aalankhiye Yeruzaleemu eettaka Antiyookiya. 28Mmote wa yo aari wiitthiwaaye Akaapu, khulankha khwa Rooho Ttakatthiifu khulupa yoori enteela opuwelela jala olumwenku wooshi, ethiito yaarettikhaniye wakathi wa Seezari Kalaawutiyu ari mfwalume nwulu. 29Anakhiyoni khujilakelela owaawuni attwiizaya aari wiikhalaaye Yudeya wakhula ntthu khwa khiima aari owahaazo. 30Khuwaaperekheza tthuvo attunkhulu a ojama wa Nluku mmakhono wa Baranabe na Sawulu.

Currently Selected:

Khaazi 11: eko

Highlight

Copy