Khaazi 10

Namalokozela Koroneele

1Sitati ya Sezareeya aariwo mwinyi mmote aari wiitthiwaaye Koroneele, aari namalokozela wa khuntti yaanajanka yaari wiitthiwaaye Etaliyaanu. 2Ye na ajamaaze ooshi aari emaani na oomoova Nluku; aari owaatthantta venkivene anamathowiwa na aari omwaaputu Nluku wakhula wakathi. 3Siikhu moote njuwa looveva wakathi opule wa saakhentta, nkatthi wa jozi, khoona saaneene nlayikha la Nluku limwaattamiye leettaka onkhuwela liraka: “Koroneele!”

4Ye khusuthuwa, khusala eekesa nlayikha ntthile eettaka othukumela, khuuzela yoori: “Niini, mwinyi?”

Nlayikha khujipu liraka: “Lompa zawo na zimola zawo zafiya mmakhono wa Nluku nkhama tthuvo yoohisahawiwi. 5Apho, owaarume atthu alawe nti wa Yoope, amweettele Simawu ariiye ottuukho anjuwaniwaaye nzina la Pheeturu, 6amaka owawe Simawu, namawala ovuzi wa nyama, aniikhalaaye nshini wa pahari, ye onttela owuuza etthu yooretta.”

7Nlayikha nawiisha omuuza mattakhuzi apale Koroneele, khulankha khusala lilawa. Aphano, Koroneele khuwaakhuwela a karumeya awe awiri na najanka mmote wa atthaapale aari owaalokozelaaye na aari omoovaaye Nluku, 8khuwooza vitthu zooshi zaarettikhaniyeezo, nawiisha khuwaaruma olawa nti wa Yoope.

Othoonyeziwa wa Pheeturu

9Mmeesho mwaya, etthirelaka payina ya saasiitha yo khusala alawa Yoope, asaleelaka ofiya nsitati, Pheeturu khuwela vatulu wa nyuupa yoori alompe. 10Ila khunkhola jala, khusala atakha yoori apatthe etthu aje; etthu yoojiwa yaari oretta yeettaka wiipikhiwa, ye khuthoonyeziwa. 11Khusala oona pinku eri yoofukuliwa na etthu nkhama nkhumi nwulweene elankhaka otulu etaka vathi efukiwe mashaka mane. 12Erivo wakhula jaati ya nyama za moolu mane, na epile zinjipurulaaye zeettettaka vathi mpakha anyannyi ootulu. 13Khupuwa huula yaari omuuzaaye yoori: “Pheeturu, olankhe; oshije nyama epo orafune.”

14Ila ye khujipu araka: “Akinwahi miiyo, Mbwanaaka! Thanku kumpiwe akinaje vitthu za haraamu wala zoohifwayi!”

15Swaafu ya phiiri huula etile khunjipu yoori: “Ohiharamushe etile Nluku ahalalishiyeeyo.”

16Swaafu ttatthu huula etile elupaka etthu moote, elottelanaka nkhumi opule khuputaputeliwa khurutiseliwa pinkuuni.

17Pheeturu eettaka opheleleza maana a jozi yaya etile, atthu apale arumiweeyo ti Koroneele khujuwawo owawe Simawu mwaasa wa wuuzelela khulawa mpakha vanlako. 18Khukhuwa khuuzela yoori Simawu anjuwaniwaaye nzina la Pheeturu amaka attaapha? 19Pheeturu aari oretta nalelo eettaka opheleleza maana a jozi etile, Rooho Ttakatthiifu khumuuza yoori: “Weeyo, Simawu, nna alume attatthu aniweekesaaye. 20Apho, olankhe na wiishukhevo. Ohiiyane shaakha owaalotta apo aya, maana ti miiyo kiwaarumiyeeyo.”

21Pheeturu khwiishukha khuwaasikana khuwooza yoori: “Otu mwinimweekesaaye ti miiyo. Mwateela ni?”

22Yo khujipu yoori: “Fweeyo neetta orumiwa ti namalokozela wa anajanka aniitthiwaaye Koroneele. Ye ntthu wa shariya na woomoova Nluku na ntthu wooshitahiwa pi atthu ooshi a Yudeya. Nlayikha limote ttakatthiifu ti limuuziyeeyo yoori onkhuwele olawe owawe asiile mattakhuzi onlalelaaye.” 23Pheeturu khuwooza yoori avire nnyupa amake. Siikhu ya phiiri Pheeturu khulankha na atthu apale, vamote na mamuumini akina a Yoope khusala amperekha.

Amalapo noosiila oshaahiti wa Pheeturu khupwekherela Rooho Ttakatthiifu

24Mmeesho mwaya khufiya Sezareeya. Koroneele na ajamaaze na maswaahipu zawe, awaalaleyiyeeyo eetta onweja. 25Wakathi Pheeturu afiiyeevo atakhaka ovira nnyupa, Koroneele khunkokhorela nshini wa moolu awe khumwaaputu. 26Ila Pheeturu khumuuza yoori: “Olankhe, miiyo ki pinaatamu nkhama weeyo.”

27Khweemela khupiyana mwaasa, nawiisha Pheeturu khuvira nnyupa khuwaasikana atthu awaatta athukumaniye. 28Khuwooza yoori: “Mweeyo mwinjuwa yoori okusanyeya mayaahuuti na mmalapo, ama owaathotola enkhattaziwa. Ila Nluku ti akithoonyeziyeeyo yoori akina haakhi ya onharamusha ntthu wala omoona ohifwayi. 29Tiito mwiriiye nookikhuwela khusala kita woohiina hatha hoofu. Apha kintakha kiwuuzele yoori warumiseliyeni okhuweliwa miiyo?”

30Koroneele khunjipu yoori: “Zavira siikhu nne payina ya saakhentta. Kiri onti keettaka olompa, Nasaapiru khupuwa mwinyi awaliye kuwo zoolakala. 31Khukuuza yoori: ‘Koroneele, Nluku asiila lompa yawo na onfwahamu zimola epi oniwinkhaaye atthu. 32Orume weetteliwa Simawu aniitthiwaaye Pheeturu, ariiyeeyo nti wa Yoope amakiyeeyo vaje wa Simawu, namawala shapala, aniikhalaaye nshini wa pahari.’ 33Aphano, miiyo khuwaaruma atthu wuuteela nasaapiru, kinuushukhurwela mwaasa wa ota. Nasaapi eti fooshi niri omaasho wa Nluku yoori nisiile wakhula etile Mbwana oorumiyeeyo onuuza.” 34Pheeturu khwaaza ottakhula araka: “Aphano, enikeeleya saaneene yoori Nluku atthu ooshi oniwoonela sawasawa, 35khwa wakhula khapila ye oniwaakhupalela atthu apale animoovaaye na anrettaaye epile ziiyiyeeyo za shariya. 36Mweeyo mwinjuwa nttakhuzi Nluku aaperekhiyeeyo vakatthi wa atthu a Ezirayiilu, alaleyaka monkoni wa hapari zooshapweya za heeri khwa Yinsa Al-Masiihu, Mbwana wa atthu ooshi. 37Mweeyo mwinjuwa vitthu zirettikhaniyeeyo Yudeya yooshi eti, waaza nti wa Kalileya paata ya njampo la woosa ntthile Yaahaya alaleyiyeeyo, 38mweeyo mwinjuwa khwa nanna Nluku anthawaziyeeyo Yinsa wa Nazareeti khwa Rooho Ttakatthiifu na owahi, ethiito yanlawaniye phantte zinkizene arettaka vitthu zooshapweya na owaavonisa atthu ooshi apale aari ohoochiwaaye ti sheethwani, maana Nluku aari vamote na ye. 39Fweeyo namashaahiti wa zooshi epile arettiyeezo nti wa mayaahuuti mpakha Yeruzaleemu, ottuukho akhomeliweewo vansalapa khuuliiwa. 40Ila Nluku khunsisimula siikhu ya ttaatthu, khunsarula yoori ooniwe, 41khahiyo phi atthu ooshi, ila fweeyo, namashaahiti nithawuliweeyo ti Nluku ehinarettikhane epo zaya. Najana na nanywana maati paata ya Nluku onsisimula muufwa. 42Ye ti anirumiyeeyo yoori niwaatafusirele atthu na nilawele oshaahiti, yoori othuuto Nluku amwinkha wiiya namaphuka wa apale ariiye haayi mpakha apale afwiiyeeyo. 43Hatha na manapiyu ooshi anlawela oshaahiti yoori wakhula otule aninkhupalaaye onswamihiwa twampi zawe khwa nzina lawe ye.”

44Pheeturu nalelo eettaka othatela mattakhuzi apale atthu ooshi aari osiilaaye khuweeshukhela Rooho Ttakatthiifu. 45Mamuumini apale amayaahuuti aalankhiyeeyo Yoope na Pheeturu khwiiya ooshanka maana Nluku aawenkhiye woohirupazivo Rooho Ttakatthiifu hatha na amalapo, 46maana yo awaasiiliye ansifwaka Nluku khwa luuka pheeya.

Elottelanaka Pheeturu khulupa yoori: 47“Owaapho antakhaaye okhattaza maati yoori atthu apa ahoosiwe? Yo apokherela Rooho Ttakatthiifu nkhama fweeyo!” 48Aphano ye khuruma yoori oosiwe khwa nzina la Yinsa Al-Masiihu. Nawiisha khunvekela Pheeturu yoori eekhale nenkawu siikhu vattitthiiru vamote na yo.

Currently Selected:

Khaazi 10: eko

Highlight

Copy