Khaazi 9

Okhupali wa Sawulu

1Sawulu aarettiye nalelo awaatuturushanaka owoola anakhiyoni a Mbwana. Khulankha khulawa wa haakhimu nwulu wa tiini, 2khunvekela warakha ya ruhusa yoori alawe mmasinakooka ya sitati ya Tamaashiku, amana awaasikanamo anamalottela a Yinsa, waaza alume mpakha aakha awaathuule awaalawane Yeruzaleemu awaatthe nkalapooso. 3Khulankha khusala alotta tarikhi, asaleelaka ofiya Tamaashiku, khumpuwelela nuuru yoolankha pinkuuni khunmwasikhela. 4Aphano ye khukwela vathi, khusiila huula yaari oraaye: “Sawulu, Sawulu, niini onikilupatthelaaye?”

5Sawulu khuri: “Mwa a paani mweeyo, Mwinyi?”

Ye khujipwiwa yoori: “Miiyo ki Yinsa, otu weeyo oninlupatthaaye. 6Olankhe olawe ositati, ottuukho onttela wuuziwa etthu yooretta.”

7Ashirikha aari olawanaaye khweemela ari awoova khunyamala, mwaasa woosiila huula etile ila khuhisala amoona hatha ntthu. 8Aphano Sawulu khulankha vathi aphale afunulaka maasho khuhisala awahi woona hatha etthu, atthu khunkholela khunlawana mpakha Tamaashiku. 9Khwiikhala siikhu ttatthu ari woohooni, woohiji na woohinywi.

10Tamaashiku aariwo nakhiyoni wa Yinsa aari wiitthiwaaye Ananiiya. Mbwana khunkhuwela nkatthi wa jozi araka: “Ananiiya!”

Ye khujipu: “Lape, Mbwana!”

11Mbwana khumuuza yoori: “Olawe owawe Yuuda, aniikhalaaye tarikhi eniitthiwaaye Yoolotteya, wamuuzelele ntthu mmote wa Taarusu aniitthiwaaye Sawulu. Maana ye eetta olompa; 12nkatthi wa jozi khumoona mwinyi aniitthiwaaye Ananiiya anttheeliye makhono yoori arutele woona, Ananiiya khujipu yoori:”

13“Mbwanaaka, kaaza raku osiila vitthu monkoni wa ntthu oto, na vitthu zooshi zootakhala aniwaarettelaazo attakatthiifu awo Yeruzaleemu. 14Ye ata okhuno khwa ruhusa ya mahaakhimu a tiini yoori awaakhole ooshi apale ansifwaaye nzina lawo.”

15Ila Mbwana khumuuza Ananiiya yoori: “Olawe, maana ntthu oto khwa miiyo, yoopo yoothawuliwa yoori ethuule nzina laka ewaalawanele amalapo na afwalume aya, na vakatthi wa atthu a Ezirayiilu. 16Kinlawa kanthoonyeze Sawulu nanna anttelaaye ohoowa mwaasa wa nzina laka.” 17Aphano, Ananiiya khulankha khulawa. Noofiya khuvira nnyupa khunttheela makhono khumuuza yoori: “Ttwiiyaku Sawulu, Mbwana Yinsa, otule oopuweleliyeeyo ntarikhi otaaka, akiperekha miiyo yoori orutele woona na wiiye wa wiitaala Rooho Ttakatthiifu.” 18Nasaapiru vitthu nkhama mavalako khunsaruwa mmaasho, khwaaza woona opheya. Noopattha ashikhaali khulawa khoosiwa. 19Ajiiyeevo etthu yoojiwa, khupattha kuvu.

Sawulu onlawela oshaahiti hapari zooshapweya

Sawulu aavirisiye siikhu vattitthiiru aari vamote na anakhiyoni a Yinsa, Tamaashiku. 20Wakathi otthuupule khwaaza olaleya mmasinakooka araka Yinsa Mwaana wa Nluku. 21Ooshi apale aari onsiilaaye khwiiya ootikinisiwa channu, khusala alupa yoori: “Khahiyo othuutu aari owaalupatthaaye anamalottela a Yinsa a Yeruzaleemu? Aatiiye okhuno oteela owaakhola yoori awaalawane Yeruzaleemu wa mahaakhimu a tiini?” 22Ila wakhula swaafu mattakhuzi a Sawulu aari wiiya oowahi. Na mithoonyezo aari olazaazo yoori Yinsa ti Al-Masiihu zaari zookhomaala mpakha mayaahuuti aari wiikhalaaye Tamaashiku khuhisala ajuwa etthu yoolupa.

23Ziviriyeevo siikhu zawaatta, mayaahuuti khuwaza shawuri zoomuula, 24ila Sawulu khwiiya woojuwa shawuri zaya epile. Nthana na osikhu aari wiiya oothotolela milako za sitati etile yoori apatthe omuula. 25Anakhiyoni awe khunthuula osikhu khunttha nkhelenke khumwiirusha muuri.

26Wakathi afiiyeevo Yeruzaleemu khusala atakha owaakusanya anakhiyoni a Yinsa, ila ooshi khusala amoova mwaasa woohinkhupali yoori khweele nakhiyoni. 27Aphano Baranabe khunthuula khunlawana wa maaswihaapa khusala awooza nanna Sawulu amooniyeezo Mbwana ntarikhi na nanna anttakhulaniyeezo. Baranabe khusala alupa theenya khwa nanna atafusiriyeezo woominyalavo nzina la Yinsa Tamaashiku. 28Khwiiya vamote na yo, Yeruzaleemu, alawaka othepela arutaka na ottakhula monkoni wa nzina la Yinsa woominyalavo. 29Aari ottakhula na okheetisana na mayaahuuti oottakhula ekereeku, ila yo aari owaza shawuri za omuula. 30Attwiize noojuwa shawuri za epile, khunthuula khunlawana nti wa Sezareeya khumpakhirisa yoori alawe sitati ya Taarusu.

31Siikhu zaya epo ojama wa Nluku waari wa heeri nti wooshi wa Yudeya, Kalileya na Samariiya, waari wookhomaala na wiikhala woomoova Mbwana alipiseliwaka ti Rooho Ttakatthiifu, atthu khusala eekezeleya.

Ovonisiwa wa Eneeya

32Aphano Pheeturu aviriyeevo phantte zooshi, khwiishukhela theenya nti wa Liida olawa owaathotola attakatthiifu apale aari wiikhalaaye ottuukho. 33Ottuukhule khunsikana ntthu woorakala aari wiitthiwaaye Eneeya aariina nyaakha minaane ari voolili. 34Pheeturu khumuuza yoori: “Eneeya, Yinsa Al-Masiihu onuuvonisa! Olankhe okhuje nrepa lawo.” Ye khulankha nasaapiru. 35Atthu ooshi apale aari wiikhalaaye Liida na Saroona, na woona vitthu epile, khunkhupali Mbwana.

36Yoope aariwo nakhiyoni wankha aari wiitthiwaaye Tabita, khwa luuka ya ekereeku enriwa Dooroka. Ye aari oretta vitthu zooshapweya na winkha zimola. 37Khumpattha olwele khufwa, mwiili awe khoosiwa khupwehiwa kaatthi ya vatulu. 38Liida yaattamananiye sitati ya Yoope. Wakathi asiiliyeevo anakhiyoni yoori Pheeturu ori nti wa Liida, khuwaaruma atthu awiri olawa omuuza yoori: “Ohirupaze ota okhuno niriiwo.”

39Pheeturu khulankha khulawa vamote na yo, noofiya khuthuuliwa khulawaniwa kaatthi etile ya vatulu. Anamafweliwa pi amanna zaya ooshi khunzukulela khusala alila na anthoonyezaka ajapi na kuwo kiina Dooroka aasoniyeezo ari vamote na yo.

40Pheeturu khuwaaruma ooshi osaruwa okatthi okhule, attaaphale khukokhora khusala alompa. Khuzukuluwa khumweekesa muufwi otule khuri: “Tabita, olankhe!” Ye khufunula maasho awe, khumoona Pheeturu khwiikhala. 41Khunkholela nkhono khunlansa khweemela, aphano khuwaakhuwela anakhiyoni na anamafweliwa pi amanna zaya apale khuwenkha ari haayi. 42Vitthu epile khwiiya zoojuwiwa sitati yooshi ya Yoope, atthu a waatta khunkhupali Mbwana. 43Pheeturu eekhaliye nti wa Yoope siikhu zawaatta, owawe mwinyi mmote aari wiitthiwaaye Simawu aari owalakaaye shapala ya nyama.

Currently Selected:

Khaazi 9: eko

Highlight

Copy