Khaazi 8

1Sawulu aakhupaleliye wuuliiwa wa Shiteevawu.

Sawulu oniwaalupattha anamalottela a Yinsa

Siikhu zaya epile yaapuwiye lupattha khuluyeene ya ojama wa Nluku wa Yeruzaleemu wooshi, khumwazeyela miti za Yudeya na Samariiya, owaalikha maaswihaapa. 2Alume akina ooshapweya rooho khunthuula Shiteevawu khulawa khunzikha eettaka onlilela channu. 3Ila Sawulu aari wojilipisa yoori eeshise ojama wa Nluku. Ye aari ovira nyuupa khwa nyuupa khusala awaakhola alume na aakha noowaattha nkalapooso.

Oshaahiti wa Filiipe nti wa Samariiya

4Atthu apale amwazeyiyeeyo aari ovira atafusiraka hapari zooshapweya wakhula vahali aari ofiyaavo. 5Filiipe eettiye sitati ya nti wa Samariiya, noofiya khusala alaleya monkoni wa Al-Masiihu. 6Wakathi atthu asiiliyeevo saaneene hapari epile aari olupaazo Filiipe na khoona minjuza aari orettaazo, yo aashututeliye mattakhuzi apale aari olupaaye. 7Masheethwani aari osaruwa mmwiili wa atthu enkeene eettaka onyakula, anamarakala enkeene na apale oopiwa ti supiyaani aari wiiya oovona. 8Sitati etile yaapuwiyewo furaha khuluyeene.

Simawu namajintta

9Aarivo mwinyi mmote aari wiitthiwaaye Simawu, aari wiikhalaaye sitati ethiitile, raku aari orettakaaye majintta, na owaazinkula asamariiya ooshi, ajoonaka ye wiiya munumunu. 10Atthu ooshi aari onsiilaaye, waaza nttunkhulu mpakha nsimaana eetta onttottopela araka: “Opu owahi wa Nluku, otthuupo oniitthiwaaye yoori Owahi Nwulweene.” 11Aphano, yo khusala ansiileza othuuto, mwaasa aaziye raku owaazinkula na vitthu za majintta. 12Ila paata ya Filiipe owaatafusirela monkoni wa hapari zooshapweya za ofwalume wa Nluku khwa nzina la Yinsa Al-Masiihu, yo khukhupali na khulawa khoosiwa, alume mpakha aakha. 13Simawu na ye khukhupali khoosiwa, khusala anlottelela Filiipe oonaka alama zootikinisa na minjuza miwuluzene zaari orettikhanaazo.

14Wakathi maaswihaapa asiiliyeevo Yeruzaleemu, yoori atthu a Samariiya akhupali nttakhuzi la Nluku, khumperekhawo Pheeturu na Yaahaya. 15Yo, noofiya, khuwaalompela atthu aya apale yoori apokherele Rooho Ttakatthiifu. 16Maana, nalelo yaari ehinaweeshukhele Rooho Ttakatthiifu ila eettiye woosiwa paasi khwa nzina la Mbwana Yinsa. 17Pheeturu na Yaahaya khuwaattheela makhono khupokherela Rooho Ttakatthiifu. 18Simawu nawoona yoori ntthu aari opokherela Rooho Ttakatthiifu paata ya ottheeliwa makhono ti maaswihaapa, ye khulaza nzurukhu khuwenkha, 19khuwooza maaswihaapa yoori: “Mwikinkhe na miiyo owahi waya opo yoori amana kinttheela makhono ntthu asala apokherela Rooho Ttakatthiifu.”

20Ila Pheeturu khunjipu yoori: “Weeyo na nzurukhu awo otthuupo ti mwithowelele! Onoona yoori tthuvo ya Nluku enuuzanyiwa na nzurukhu? 21Weeyo khuna hatha phantte nkatthi wa khaazi eti, maana rooho yawo khahi rooho saana mmakhono wa Nluku. 22Othupwiye zootakhala zawo na onvekele Mbwana. Yoori talili ooswamihi khwa ofikhiri wa nroho mwawo, 23maana kinoona yoori weeyo yawiitaala katapu na washawiwa ti twampi.”

24Simawu khujipu yoori: “Mwilompe okhu wa Mbwana khwa miiyo, yoori zooshi epo mwilupiyeezo zihikirettikhanele.”

25Paata ya Pheeturu na Yaahaya olawela oshaahiti na otafusiri nttakhuzi la Nluku khulankha khusala arutela Yeruzaleemu, alawaka aari ovira atafusiraka miti mikina za Samariiya.

Filiipe na mwiitiyoopiya

26Nlayikha la Mbwana khumuuza Filiipe yoori: “Weette ntarikhi ya mmakuluttu phantte ya kusini elankhiyeeyo Yeruzaleemu eniishukhelaaye sitati ya Kaaza.” 27Filiipe khulankha khusala alawa. Ntarikhi khunsikana mwinyi mmote wa Etiyoopiya woohimemi, alankhaka Yeruzaleemu eettaka owawe. Oto aya aari nakhaazi nwulu enkhiweeyo othokorela nzurukhu wa Rayisi nwulu wa Etiyoopiya, Eettiye Yeruzaleemu omwaaputu Nluku. 28Eettaka orutela owawe, eekhaliye varikisho vawe khusala asoma kithaapu ya napiyu Ezaaya. 29Aphano, Rooho Ttakatthiifu khumuuza Filiipe yoori: “Waattame rikisho etile osala olottelela.”

30Filiipe khutthirela rikisho etile khusikana khusala ansiila mwiitiyoopiya otule asomaka kithaapu ya napiyu Ezaaya, ye khumuuzela yoori: “Mattakhuzi apo onsomaaye aniweeleya?” 31Ye khujipu araka: “Anikeeleya toovi kihina ntthu wookeeleza?” Khumuuza Filiipe yoori awele varikisho attaaphale aariivo ye. 32Zawaatikhiwa Ttakatthiifu za nkithaapu aari osomaaye mwiitiyoopiya otule zaari olupa toono:

“Ye aathuuliwe nkhama pwittipwitthi eneettelaaye wuuliiwa, khwiiya woonyamala,

ari vakatthi wa apale ankasaaye ovuzi,

Ye khaafunuliye milomo zawe.

33Ye wakathi wa ohoochiwa wawe khukatthaziwa shariya.

Khi paani ariina ruhusa ya ottakhula ojama awe?

Ye ohaayi awe walaziwavo vathi apha.”#8:33 Woone kithaapu ya Ezaaya 53:7-8.

34Aphano mwiitiyoopiya khumuuza Filiipe yoori: “Kinuuvekela yoori okeeleze, napiyu otu oninlupa paani? Ye mweenyewe ama ntthu nkina?” 35Elottelanaka Filiipe khwaaza omweeleza mwiitiyoopiya otule, khwa mattakhuzi atthaapale ari osomaaye a nkithaapu ya Ezaaya, khusala amuuza hapari zooshapweya monkoni wa Yinsa.

36Ari ntarikhi eettaka olawa, khufiya vahali aarivo maati. Mwiitiyoopiya otu khumuuza Filiipe yoori: “Apha awaapho maati. Niini enkhattazaaye woosiwa miiyo?” 37Filiipe khunjipu yoori: “Khahi haraamu amana okhupali na rooho yawo yooshi.” Ye khujipu yoori: “Miiyo kinkhupali yoori Yinsa Mwaana wa Nluku.”#8:37 Zawaatikhiwa za raku nsithari opu khina. 38Aphano, khweemesa rikisho etile, khwiishukhela mmaati oowiiri, Filiipe khulawa khumoosa mwiitiyoopiya otule. 39Wakathi avuwiyeemo mmaati, Rooho Ttakatthiifu khunthuula Filiipe, mwiitiyoopiya otule khuhimooni theenya, na ye khurutela safwari yawe etile ari woofurahi saaneene. 40Filiipe khulawaniwa sitati ya Azotu, khulikhiwa ottuukho khusala avira alawaka mpakha Sezareeya alaleyaka hapari zooshapweya wakhula sitati aari ofiyaaye.

Currently Selected:

Khaazi 8: eko

Highlight

Copy