Khaazi 7

Ojaakisa wa Shiteevawu nnyupa khuulu ya Mashawuriiya

1Aphano, haakhimu nwulu wa tiini khumuuzela Shiteevawu yoori: “Mattakhuzi apa onlokoveziwaaye khweele?”

2Shiteevawu khujipu araka: “Attwiizaku na apapazaku, mwisiileze! Nluku wa siifwa ampuweleliye Eburahiima, papeetthu, wakathi ari nti wa Mezapotaamiya ahinalawe wiikhala Harani, 3khumuuza yoori: ‘Olikhe tuniya yawo, na ajamaazo, na vaje wa apapazo olawe tuniya kinttelaaye wuuthoonyeza.’#7:3 Woone kithaapu ya Mwanzo 12:1. 4Aphano Eburahiima khulankha nti wa Makaliteewu#7:4 Nti wa Makaliteewu nzina likina liniitthiwa yoori Mezapotaamiya., khulawa khwiikhala Harani. Paata yoofwa papaawe, Nluku khuntiisa nti otthuupu mwiniikhalaaye. 5Nluku khamwinkhiye hatha etthu moote yoori arithi, wala puuro ya luwattho yawe, ila amwaahitiye omwinkha nti, paata ya ye, waari weettela wiiya wa ojama awe. Wakathi aya opo aari waahitiwaavo ti Nluku aarettiye ahineeyane mwaana. 6Nluku anttakhulaniye amuuzaka yoori: ‘ojama awe onttela osafirela nti wa malaponi, ottuukho onlawa warettiwe oviitthwaana na ohukhumwiwa nyaakha miiya nne.’ 7Nluku khurutela olupa theenya yoori: ‘Miiyo kinteela ohukhumu khapila ethiito enttelaaye owaaretta oviitthwaana, paata ya toowo anlawa aleewo ate akaaputu puuro ethiiti.’ 8Aphano Nluku khumwinkha Eburahiima wahati#7:8 Woone kithaapu ya Mwanzo 17:1-10. wa okhiriya. Tiito, Eburahiima khunvokola Esiyaakha khunkhiriyisa siikhu ya naane yoovokoliwa wawe. Elottelanaka Esiyaakha khunvokola Yaakhumpa, na ye khuwaavokola apaapa apale khumi na awiri.”

9Shiteevawu khurutela olupa yoori: “Apapazetthu aya atthaapo khunlazela nrima Yuusufu. Khumuuzanyisa awoozanyezaka amisuri, ila Nluku aari vamote na ye. 10Khuntaphula tafwawuti zawe zooshi khumwiishushela rehema na akhili omaasho wa Firawuuna, mfwalume wa Misuri. Othuuto aamwinkhiye Yuusufu owaziri wa Misuri na khumwinkha ottunkhulu wa atthu ooshi a vaje vawe.

11“Paata ya toole, nti wooshi wa Misuri mpakha Kanaani khupuwa jala na tafwawuthi khuluzeene, amarehemu apapazetthu khuhisala awahi opattha etthu yoojiwa. 12Yaakhumpa noosiila yoori ewaapho tiriku Misuri, khuwaaruma amarehemu apapazetthu swaafu yamwanzo. 13Swaafu ya phiiri Yuusufu khujijuwisa a attwiize, na khujuwiwa ajama a Yuusufu ti Firawuuna. 14Aphano Yuusufu khuwaaruma atthu omweettela Yaakhumpa papaawe na ajamaaze ooshi, aari saapiini na athaanu atthu ene. 15Yaakhumpa khulawa Misuri, ottuukho afwiyeewo ye na amarehemu apapazetthu akina aya. 16Khuthuuliwa khulawa khuzikhiwa Shekemu vilalo oozanyiyeeyo Eburahiima na aana a Hamori. 17Maana waari osaleela ofiya wakathi wa ahiti etile Nluku aarittiyeeyo na Eburahiima, atthu khweekezeleya na khwaattelana nti wa Misuri. 18Aphano Misuri Khuthawala mfwalume nkinoko, ahaari ojuwaaye monkoni wa Yuusufu. 19Mfwalume otule khusala awaaveyisa amarehemu apapazetthu na owaahukhumu, awaakhanyarelaka aana aya yoori afwe.

20“Pi wakathi otthuupo avokolaniweeyo Munsa, aari mwaana wooshapweya venkivene, khuleliwa vaje wa apapaze nyeezi mittatthu. 21Khulawa khulikhiwa otthwe, mwaana wa Firawuuna khunlokottha khusala anlela nkhama mwanawe. 22Munsa khunozeliwa akhili zooshi za amisuri, khwiiya ntthu wa owahi khwa mattakhuzi na khaazi.

23“Paata ya opattha hirimu ya nyaakha arupayiini, Munsa khulakela olawa owaathotola attwiize meezirayiilu. 24Amooniyeevo mmisuri mmote anhukhumwaka mwiizirayiilu, na ye khunzukuluwela khuumanana, mpakha omuula mmisuri otule. 25Munsa aari woona yoori meezirayiilu enlawa yaweeleye yoori Nluku aari otakha owaawuni khwa ye, ila yo khayaari oweeleya hatha etthu. 26Siikhu ya phiiri, Munsa khulawa vahali aari wumanaavo meezirayiilu awiri, khusala atakha yoori awaakise araka: ‘Alume, mweeyo mwa attwi; khi mwinuumanela ni?’

27“Ila otule aari onvulalisaaye nzaawe, khunsukhuma Munsa alupaka yoori: ‘Awinkhiyeeyo wiiya mfwalume wala namaphuka weetthu fweeyo ti paani? 28Ontakha okuule nkhama omuuliyeezo mmisuri taana?’#7:28 Woone kithaapu ya Olaawo 2:14. 29Noosiila mattakhuzi apale, Munsa khutthirela nti wa Midiyaani, khusala eekhala nkhama nletto, ottuukho khuwaapatthawo aana awe awiri.

30“Ziviriyeevo nyaakha arupayiini, khumpuwelela nlayikha vamweeke wa moottho wahaari ozimaaye n'yaara, kharipu ya mwaako Sinaayi. 31Aphano Munsa wakathi ooniyeevo etthu etile, khwiiya wootikinisiwa. Khususela attaaphale yoori oonachache, khusiila huula ya Mbwana yaari oraaye: 32‘Miiyo ki Nluku wa amarehemu apapazenu, Nluku wa Eburahiima, Esiyaakha na Yaakhumpa.’#7:32 Woone kithaapu ya Olaawo 3:6. Munsa eettaka othukumela mwaasa wa woova, khuhisala awahi ominyala yoori afunule maasho awe.

33“Aphano Mbwana Nluku khumuuza yoori: ‘Ovule jampali zawo epo, maana puuro eti oriivo ttakatthiifu. 34Weekhweele kiniwoonaka atthu aka eettaka ohukhumwiwa nti wa Misuri. Kasiila olila waya khwiishukha yoori kiwaataphule. Apho ote nasaapi ethiiti, miiyo kuurume nti wa Misuri.’

35“Munsa othuuto, yo ankatthaliyeeyo araka: ‘Awinkhiyeeyo wiiya mfwalume wala namaphuka weetthu fweeyo ti paani?’ Ye aaperekhiwe ti Nluku yoori eeye namalokozela na namwaawuni aya, ye alokoziwe ti nlayikha lampuweleliyeeyo vamweeke wa moottho wahaari ozimaaye. 36Ti othuuto awaalaziyeewo, arettaka vitthu zootikinisa na alama za minjuza za nti wa Misuri, mpakha Pahari Yookhuttuwa na n'yaara khwa nyaakha arupayiini.

37“Na aari Munsa othuuto awooziyeeyo meezirayiilu yoori: ‘Nluku onlawa ampuwise khwa attwiizenu napiyu mmote nkhama miiyo.’#7:37 Woone kithaapu ya Tetoronoomiyu 18:15. 38Ti Munsa othuuto aathukumaniyeeyo na atthu a Ezirayiilu amarehemu apapazetthu n'yaara, aari vamote na nlayikha vamwaako Sinaayi. Khupwekherela khwa ye hapari za khweele khunifiisela fweeyo.

39“Ila othuuto amarehemu apapazetthu khuhitakhi onshututela, na khwenkeza onkhijilela, nroho mwaya aari otakha orutela Misuri. 40Khumuuza Haruni yoori: ‘Onaattalele miluku yoori enilokoze maana Munsa aya otule anilaziyeeyo Misuri khanijuweeni etthu empatthiyeeyo.’ 41Wakathi otthuupule khwaattala sanamu nkhama mompe. Khuretta twaha enkhaka sanamu ethiitile afurahelaka etile aattaliyeeyo na makhono aya. 42Ila Nluku khuwaathekuwa khuwaalikha yoori aaputu matthottowa a pinkuuni, nkhama etthiipo yaatikhiweeyo nkithaapu za manapiyu yoori:

“ ‘Oo, atthu a Ezirayiilu, mwaakinkhiye miiyo twaha na zaakha khwa nyaakha arupayiini

wakathi opule mwariiyo n'yaara?

43Olikha toowo theenya, mweemesa likhapuri la omwaaputu Moloke

na matthottowa a nluku enu Refwaani,

mwaattala sanamu khusala mwaaputu,

khwa attaapho miiyo kintta owiikarelani ohali woolepawo ovikana Babilooniya.’

44“N'yaara amarehemu apapazetthu aarina heema ya wahati yaattaliweeyo khwa nanna etthiipo Nluku anrumiyeezo Munsa yoori aattale, nkhama etile anthoonyeziyeeyo. 45Ethiito amarehemu apapazetthu enkhiweeyo ti apapazaya, khuthuula Yoshuwa theenya wakathi enkhiweeyo miti za khapila epile eekariiyeeyo Nluku vakatthi wa apapazetthu, heema etile khwiiya nti otthuupule mpakha yenzi ya Daawuuda. 46Ye khupattha rehema mmakhono wa Nluku, khuveka yoori anjekele nyuupa Nluku wa Yaakhumpa. 47Ila ti Seleyimaana aajekiyeeyo nyuupa yaya eto.

48“Nakataalikha, Nluku Nwulu khaniikhala nnyupa yoojekiwa ti makhono apinaatamu, nkhama etthiipo alupiyeezo napiyu:

49“ ‘Pinku khukulu yaka,

vathi ti sakanso wa moolu aka.

Nyuupa ni mwinttelaaye okijekela mweeyo, alupaka Mbwana,

ama, yaari weettela wiiya vayi puuro yaka yoovumulavo?

50Khahiye makhono aka aattaliyeeyo vitthu zooshi?’#7:50 Woone kithaapu ya Ezaaya 66:1-2.

51“Atthu ookhijili, na oolipa rooho na oohisiili! Mweeyo mwazowerela okhijilela Rooho Ttakatthiifu, etthiipo aari orettaazo apapazenu na mweeyo mwinretta etthiipo! 52Napiyu ni amarehemu apapazenu ahinlupattheeni? Yo awoola apale aari olaleyaaye ota wa Nashariya, othuuto enasaapi eti mweeyo mwijirettiyeeyo onamanlupattha na namahusuti. 53Mweeyo mwipwekhereliyeeyo kano khwa khaazi za malayikha ila khuhishututeli!”

Ofwa wa Shiteevawu

54Paata ya yo osiila mattakhuzi apale khuwaapattha katapu nroho mwaya, khusala anwinela meeno. 55Ila Shiteevawu wawiitaala wene Rooho Ttakatthiifu khweekesa otulu khoona nuuru ya Nluku na Yinsa ari nkhono nlume. 56Khulupa yoori: “Moone! Miiyo kinoona pinku eri yoofukuwa na Mwaana wa Pinaatamu eemeliye nkhono nlume wa Nluku!”

57Yo khusala akhuwa anyakulaka, khuttiyela mashiilo aya khunrikaanyela. 58Khumweselela othetekele wa sitati khusala anvonya, oshaahiti aya khulikheliwa kuwo zawe shaapu mmote aari wiitthiwaaye Sawulu.

59Eettaka onvonya etthiipile, Shiteevawu khusala akhuwa araka: “Mbwana aka Yinsa, pwekherela rooho yaka.” 60Attaaphale khukokhora khusala akhuwa channu araka: “Mbwanaaka, ohiwenkhe paathuli khwa twampi eti!” Nawiisha olupa mattakhuzi apale, khufwa.

Currently Selected:

Khaazi 7: eko

Highlight

Copy